ທ່ານ ຮອງເຈົ້າແຂວງ ຕ້ອນຮັບການມາຢ້ຽມຢາມ ແລະ ເຮັດວຽກຂອງ ຄອບຄົວ ທ່ານ ຄຳຫຼ້າ ໜໍ່ແກ້ວ ຢູ່ແຂວງສາລະວັນ

ເວລາ 8: 30 ໂມງ ຂອງວັນ​ທີ 30 ມີນາ 2015 ຢູ່ທີ່ຫ້ອງຮັບຮອງ 207 ຂອງຫ້ອງວ່າການປົກ ຄອງແຂວງ ສາ​ລະ​ວັນ, ທ່ານ ສີ​ສຸ​ວັນ ວົງ​ຈອມ​ສີ ກຳ​ມະ​ການ​ປະ​ຈຳ​ພັກ​ແຂວງ, ຮອງ​ເຈົ້າ​ແຂວງໆສາ​ລະ​ວັນ (ຜູ້​ຊີ້​ນຳ​ວຽກ​ງານ​ວັດ​ທະ​ນະ​ທຳ-ສັງ​ຄົມ) ໃຫ້​ກຽດ​ຕ້ອນ​ຮັບການມາພົບປະ​​ຢ້ຽມ​ຢາມ ແລະ ເຮັດ​ວຽກ​ຂອງ ທ່ານ ຄຳຫຼ້າ ໜໍ່​ແກ້ວ ພ້ອມ​ດ້ວຍ​ຄອບ​ຄົວ, ເຊິ່ງ ແມ່ນ​ລູກຫຼານ​ຂອງ ອົງ​ແກ້ວ ວິ​ລະ​ບູລຸ​ດ​ຂອງ​ຊາດ (ກ່ອນ​ມີ​ພັກ​ນຳ​ພາ) ເຊິ່ງ​ມີ​ຜູ້​ເຂົ້າ​ຮ່ວມຈຳ​ນວນ 12 ທ່ານ, ທີ່​ມາ​ຈາກ​ພາກ​ສ່ວນ​ຕ່າງໆ​ທີ່​ກ່ຽວ​ຂ້ອງ​ແຂວງ.

ການມາພົບປະ​ຢ້ຽມ​ຢາມ ແລະ ເຮັດ​ວຽກ​ຢູ່​ແຂວງ​ສາ​ລະ​ວັນ ຂອງ​ຄອບ​ຄົວ​ ທ່ານ ຄຳຫຼ້າ ໜໍ່​ແກ້ວ ​ໃນ​ຄັ້ງ​ນີ້ ແມ່ນເພື່ອ​ປຶກ​ສາ​ຫາ​ລື​ກັນ​ລະ​ຫວ່າງ​ແຂວງສາ​ລະ​ວັນ ກັບ​ຄອບ​ຄົວ​ກ່ຽວ​ກັບ​ປະ​ຫວັດ​ຄວາມ​ເປັນ​ມາຂອງ ອົງ​ແກ້ວ ວິ​ລະ​ບູ​ລຸດ​ຂອງ​ຊາດ (ກ່ອນ​ມີ​ພັກ​ນຳ​ພາ) ໃນ​ແຕ່​ລະ​ໄລ​ຍະ ເພື່ອ​ນຳ​ໄປ​ປັບ​ປຸງ​ປຶ້ມ​ການ​ເຄື່ອນ​ໄຫວ​ຂອງ ອົງ​ແກ້ວ ໃຫ້​ມີ​ເນື້ອ​ໃນ​ດີ​ຂຶ້ນກວ່າ​ເກົ່າ. ນອກນັ້ນ ຄອບ​ຄົວ ທ່ານ ຄຳຫຼ້າ ໜໍ່​ແກ້ວ ຍັງ​ໄດ້​ໄປ​ວາງ​ພວງ​ມະ​ລາ​ຢູ່​ອະ​ນຸ​ສາ​ວະ​ລີ ຕໍ່​ໜ້າ​ຮູບຫຼໍ່​ເໝືອນ​ອົງ​ແກ້ວ​ນຳ​ອີກ.