ທ່ານ ຮອງເຈົ້າແຂວງໆ ສາລະວັນ ຕ້ອນຮັບທ່ານ ຮອງ ປະທານກຳມາທິການເສດຖະກິດການເງິນຂອງສະພາແຫ່ງຊາດ

ເວລາ 8: 30 ໂມງຂອງ ວັນທີ 20 ເມສາ 2015 ຢູ່ທີ່ຫ້ອງຮັບຮອງ 207 ຂອງຫ້ອງວ່າການປົກຄອງແຂວງ ສາ​ລະ​ວັນ, ທ່ານ ສີ​ສຸ​ວັນ ວົງ​ຈອມ​ສີ, ກຳ​ມະ​ການ​ປະ​ຈຳ​ພັກ​ແຂວງ, ຮອງ​ເຈົ້າ​ແຂວງໆ ສາ​ລະ​ວັນ, ຜູ້​ຊີ້​ນຳ​ວຽກ​ງານ​ວັດ​ທະ​ນະ​ທຳ – ສັງ​ຄົມ ໃຫ້​ກຽດ​ຕ້ອນ​ຮັບການມາພົບປະ ແລະ ເຮັດ​ວຽກ​ຂອງ ທ່ານ ບຸນປອນ ສີສຸລາດ, ຮອງ​ປະ​ທານ​ກຳ​ມາ​ທິ​ການ​ເສດ​ຖະ​ກິດ​ການ​ເງິນ ສະ​ພາ​ແຫ່ງ​ຊາດ ພ້ອມ​ດ້ວຍ​​ຄະ​ນະຢ່າງ​ອົບ​ອຸ່ນ ເຊິ່ງ ມີ​​ຜູ້ເຂົ້າ​ຮ່ວມ ຈຳ​ນວນ 07 ທ່ານ. ການພົບປະລະ​ຫວ່າງ​ຄະ​ນະ​ນຳ​ແຂວງ​ສາ​ລະ​ວັນ ແລະ ຄະ​ນະ ຂອງ ທ່ານ ບຸນປອນ ສີສຸລາດ ໃນ​ຄັ້ງ​ນີ້ ແມ່​ນໄດ້​ຮ່ວມ​ກັນ​ປຶກ​ສາ​ຫາ​ລື ແລະ ແລກ​ປ່ຽນ​ຄຳ​ຄິດ​ຄຳ​ເຫັນ​ວຽກງານ​ຈຳ​ນວນ​ໜຶ່ງ ເປັນ​ຕົ້ນ ບັນ​ຫາເສດ​ຖະ​ກິດ​ທາງ​ດ້ານ​ການ​ເງິນ​ຂອງ​ແຂວງ, ​ພື້ນ​ຖານ​ໂຄງ​ລ່າງ, ການ​ສ້າງ​ນິ​ຕິ​ກຳ​ແຫ່ງ​ກົດ​ໝາຍ, ບັນ​ຫາ​ເງິນ​ເດືອນ​ຂອງ​ພະ​ນັກ​ງານ – ລັດ​ຖະ​ກອນ, ການ​ຜະ​ລິດ​​ເປັນ​ສິນ​ຄ້າຂອງ​ປະ​ຊາ​ຊົນ, ດ້ານ​ການ​ລົງ​ທຶນ ແລະ ອື່ນໆ. ເຊິ່ງ ​ທ່ານຮອງ​ປະ​ທານ​ກຳ​ມາ​ທິ​ການ​ເສດ​ຖະ​ກິດ​ການ​ເງິນ ສະ​ພາ​ແຫ່ງ​ຊາດ ຈະ​ໄດ້​ນຳ​ເອົາ​ເນື້ອ​ໃນ​ຈິດ​ໃຈ​ຂອງ​ການ​ພົບ​ປະ​ຄັ້ງ​ນີ້ ນຳ​ສະ​ເໜີ​ຕໍ່​ສະ​ພາ​ແຫ່ງ​ຊາດ ເພື່ອ​ຫາ​ວິ​ທີ​ແກ້​ໄຂ ແລະ ຈັດ​ຕັ້ງ​ປະ​ຕິ​ບັດ​ໃຫ້​ມີ​ປະ​ສິດ​ທິ​ຜົນ​ດີກວ່າ​ເກົ່າ.
ຕອນ​ທ້າຍ ທ່ານ ສີ​ສຸ​ວັນ ​ວົງຈອມ​ສີ ຕາງ​ໜ້າ​ຄະ​ນະ​ນຳ​ຂອງ​ແຂວງ​ສາ​ລະ​ວັນ ກໍ​​ໄດ້​ ​ສະ​ແດງ​ຄວາມ​ຂອບ​ອົກ​ຂອບ​ໃຈຕໍ່​ກັບການມາ​ພົບ​ປະ ແລະ ເຮັດ​ວຽກ​ຂອງ ທ່ານ ບຸນ​ປອ​ນ ສີ​ສຸ​ລາດ ພ້ອມ​ດ້ວຍ​ຄະ​ນະໃນ​ຄັ້ງ​ນີ້, ເຊິ່ງ​ຍາມ​ໃດ​ພັກ – ລັດ​ຖະ​ບານ ກໍ​ຄື​ສະ​ພາ​ແຫ່ງ​ຊາດ ແມ່ນ​ມີ​ຄວາມ​ເປັນ​ຫ່ວງ​ເປັນ​ໄຍ, ​ຊ່ວຍ​ເຫຼືອ​, ຊຸກ​ຍູ້, ຕິດ​ຕາມ​ການ​ຈັດ​ຕັ້ງ​ປະ​ຕິ​ບັດ​ໜ້າ​ທີ່​ການ​ເມືອງ​ຂອງ​ອົງ​ຄະ​ນະ​ພັກ​ແຂວງ​ສາ​ລະ​ວັນ​ຕະຫຼອດ​ມາ.
ມາ​ຮອດ​ເວ​ລາ 9: 00 ໂມງ ຂອງວັນ​ດຽວ​ກັນ​ການ​ພົບ​ປະ​ກໍ​ໄດ້​ສິ້ນ​ສຸດ​ລົງ.