ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ໃຫ້ກຽດຕ້ອນຮັບທ່ານ ສີທົງ ທອງແກ້ວ ລັດຖະມົນຕີຊ່ວຍ ກະຊວງໄປສະນີໂທລະຄົມມະນາຄົມ ແລະ ການສື່ສານ

ຕອນບ່າຍ ຂອງວັນທີ 28 ກັນຍາ 2015 ທ່ານ ສີທົງ ທອງແກ້ວ ລັດຖະມົນຕີຊ່ວຍ ກະຊວງໄປສະນີໂທລະຄົມ, ມະນາຄົມ ແລະ ການສື່ສານ ແລະ ຫົວໜ້າພະແນກໄປສະນີໂທລະຄົມມະນາຄົມ ແລະ ການສື່ສານ ແຂວງ ສາລະວັນ ພ້ອມດ້ວຍຄະນະທິມງານ ວິຊາການ ໄດ້ເຂົ້າພົບ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ທີ່ຫ້ອງຮັບແຂກຂອງຫ້ອງວ່າການປົກຄອງແຂວງ ສາລະວັນ. ການເຂົ້າມາພົບປະ ແລະ ແລກປ່ຽນຄຳຄິດຄຳເຫັນ ຂອງ ທ່ານ ສີທົງ ທອງແກ້ວ ລັດຖະມົນຕີຊ່ວຍ ກະຊວງໄປສະນີໂທລະຄົມມະນາຄົມ ແລະ ການສື່ສານ ພ້ອມຄະນະທິມງານ ຄັ້ງນີ້, ມີຈຸດປະສົງ ເພື່ອລາຍງານການເຄື່ອນໄຫວ ແລະ ເຮັດວຽກຮ່ວມກັບແຂວງ ສາລະວັນ ໂດຍສະເພາະ ການຈັດຕັ້ງປະຕິບັດຂອງຂະແໜງການໄປສະນີໂທລະຄົມ, ມະນາຄົມ ປະຈຳສົກປີ 2014 – 2015 ໂດຍຫຍໍ້ໄດ້ຍົກໃຫ້ເຫັນວຽກງານອັນທີ່ພົ້ນເດັ່ນ, ການຈັດຕັ້ງປະຕິບັດວຽກງານສາມສ້າງ, ໃນນັ້ນ ແມ່ນລົງເລິກການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນ ຫຼື ມາດຖານການນຳໃຊ້ໄອທີ ( IT ) ທີ່ກະຊວງກຳນົດອອກ.
ພາຍຫຼັງທີ່ ທ່ານ ສີທົງ ທອງແກ້ວ ລັດຖະມົນຕີຊ່ວຍ ກະຊວງໄປສະນີໂທລະຄົມມະນາຄົມ ແລະ ການສື່ສານ ໄດ້ລາຍງານສະພາບລວມແລ້ວ ທ່ານ ສີສຸວັນ ວົງຈອມສີ, ເລຂາພັກແຂວງ, ເຈົ້າແຂວງ ສາລະວັນ ກໍໄດ້ລາຍງານສະພາບລວມຂອງແຂວງ ແລະ ສະເໜີຕໍ່ກະຊວງ ເພື່ອຊ່ວຍປະກອບກັບບໍລິສັດແມ່ໃນການປັບປຸງບູລະນະຫ້ອງການໄປສະນີໂທລະຄົມ, ມະນາຄົມ ແລະ ການສື່ສານ ແລະກ່ຽວກັບສັນຍານກວມຟື້ນຖີ່ຕາມຂອບເຂດໃກ້ຊາຍແດນຕ່າງປະເທດ.
ຕອນທ້າຍ ຂອງການເຂົ້າພົບປະ ແລກປ່ຽນຄຳຄິດຄຳເຫັນກັບການນຳຂັ້ນແຂວງແລ້ວ ທ່ານ ສີສຸວັນ ວົງຈອມສີ, ເລຂາພັກແຂວງ, ເຈົ້າແຂວງ ສາລະວັນ ແລະ ທ່ານ ສີທົງ ທອງແກ້ວ ລັດຖະມົນຕີຊ່ວຍ ກະຊວງໄປສະນີໂທລະຄົມມະນາຄົມ ແລະ ການສື່ສານກໍໄດ້ສະແດງຄວາມຂອບອົກຂອບໃຈເຊິ່ງກັນ ແລະ ກັນ.