ທ່ານ ພູທົງ ຄຳມະນີວົງ ຄະນະປະຈຳພັກແຂວງ, ຮອງເຈົ້າແຂວງໆ ສາລະວັນຕ້ອນຮັບຄະນະຜູ້ແທນສະມາຄົມມິດຕະພາບຫວຽດນາມ – ລາວ, ແຂວງດັກລັກ ສສ ຫວຽດນາມ.

ເຊົ້າຂອງວັນທີ 23 ຕຸລາ 2015 ເວລາ 8:00 ໂມງ ທີ່ຜ່ານມານີ້ ທ່ານ ພູທົງ ຄຳມະນີວົງ ຄະນະປະຈຳພັກແຂວງ, ຮອງເຈົ້າແຂວງໆ ສາລະວັນ ໄດ້ໃຫ້ກຽດຕ້ອນຮັບ ທ່ານ ຫວ່ງ ຈວຽນ ປະທານສະມາຄົມມິດຕະພາບຫວຽດນາມ – ລາວ ຂັ້ນແຂວງ ດັກລັກພ້ອມຄະນະ, ຢູ່ທີ່ຫ້ອງຮັບແຂກຂອງຫ້ອງວ່າການປົກຄອງແຂວງ ສາລະວັນ ໂດຍມີແຂກເຂົ້າຮ່ວມມາຈາກຫຼາຍພາກສ່ວນ.ເຊິ່ງ ທ່ານ ຂັນໄຊ ຣັດຖະເຮົ້າ ກໍາມະການພັກແຂວງ, ສະມາຊິກສາພະເຂດເລືອກຕັ້ງທີ 14, ຫົວໜ້າ ພະແນກການຕ່າງປະເທດ ກໍໄດ້ລາຍງານຈຸດປະສົງໃນການເຄື່ອນໄຫວ ແລະ ເຮັດວຽກ ຂອງບັນດາຄະນະຜູ້ແທນສະມາຄົມມິດຕະພາບຫວຽດນາມ – ລາວ, ໃນເວລາດຽວກັນນັ້ນ ທ່ານ ພູທົງ ຄຳມະນີວົງ ຄະນະປະຈຳພັກແຂວງ, ຮອງເຈົ້າແຂວງໆ ສາລະວັນ ກໍໄດ້ສະແດງຄວາມຂອບອົກຂອບໃຈຕໍ່ບັນທ່ານພ້ອມດ້ວຍຄະນະ ທີ່ໄດ້ມາເຄື່ອນໄຫວເຮັດວຽກຢູ່ແຂວງ ສາລະວັນໃນຄັ້ງນີ້.
ຕໍ່ຈາກນັ້ນ ທ່ານ ພັອ ພູວຽງ ຫຼ່ຽມມະວົງສາ ຄະນະປະຈໍາພັກແຂວງ, ຫົວໜ້າກອງບັນຊາການທະຫານແຂວງ ສາລະວັນ ກໍໄດ້ສືບຕໍ່່ເຮັດວຽກຮ່ວມກັບ ທ່ານ ຫວ່ງ ຈວຽນ ປະທານສະມາຄົມມິດຕະພາບຫວຽດນາມ – ລາວ ຂັ້ນແຂວງ ດັກລັກ. ການເຄື່ອນໄຫວ ແລະ ເຮັດວຽກ ລະຫວ່າງ ຄະນະຜູ້ແທນສາມະຄົມມິດຕະພາບຂັ້ນແຂວງ ກໍຄື: ແຂວງ ສາລະວັນ ສປປ ລາວ ແລະ ແຂວງ ດັກລັກ ສສ ຫວຽດນາມ ໃນຄັ້ງນີ້: ເພື່ອມາຢ້ຽມຢາມ ແລະ ຮ່ວມວຽກຖອດຖອນບົດຮຽນໃນການຈັດຕັ້ງປະຕິບັດວຽກງານມິດຕະພາບຂອງສອງແຂວງ ແລະ ຍັງເປັນການເພີ່ມພູນຄູນສ້າງສາຍພົວພັນມິດຕະພາບການຮ່ວມມືຮອບດ້ານຂອງສອງພັກ – ສອງລັດ ເວົ້າລວມ, ເວົ້າສະເພາະ ກໍຄື: ແຂວງ ສາລະວັນ ກັບ ແຂວງ ດັກລັກ ຍັງແມ່ນການໂຄສະນາມູນເຊື້ອອັນດີງາມຂອງຊາດອີກດ້ວຍ ແລະ ຍັງສຶກສາຄວາມເປັນໄປໄດ້ກັບບັນດາກົມກອງຫົວໜ່ວຍທຸລະກິດ ທີ່ອາດມີຄວາມສາມາດຮ່ວມມື ທາງດ້ານການລົງທຶນ,​ ປະສານສົບທົບສ້າງກິດຈະກໍາ ຫຼື ໂຄງການມິດຕະພາບ ແລະ ອື່ນໆ. ພ້ອມກັນນັ້ນ ທ່ານ ພັອ ພູວຽງ ຫຼ່ຽມມະວົງສາ ຄະນະປະຈໍາພັກແຂວງ, ຫົວໜ້າກອງບັນຊາການທະຫານແຂວງ ສາລະວັນ ກໍໄດ້ລາຍງານສະພາບລວມ ກ່ຽວກັບການພັດທະນາເສດຖະກິດ – ສັງຄົມຂອງແຂວງ ແລະ ທັງມີການແລກປ່ຽນຄຳຄິດຄໍາເຫັນຢ່າງມີຄວາມມ່ວນຊື່ນກົງໄປກົງມາ.

ພາຍຫຼັງທີ່ໄດ້ແລກປ່ຽນຄໍາຄິດຄໍາເຫັນລະຫວ່າງກັນແລ້ວ ທ່ານ ພັອ ພູວຽງ ຫຼ່ຽມມະວົງສາ ຄະນະປະຈໍາພັກແຂວງ, ຫົວໜ້າກອງບັນຊາການທະຫານຫານແຂວງ ສາລະວັນ ແລະ ທ່ານ ຫວ່ງ ຈວຽນ ປະທານສະມາຄົມມິດຕະພາບຫວຽດນາມ – ລາວ ຂັ້ນແຂວງ ດັກລັກ ກໍໄດ້ສະແດງຄວາມຂອບອົກຂອບໃຈເຊິ່ງກັນ ແລະ ພ້ອມທັງມອບຂອງຂວັນເປັນສິ່ງທີ່ລະນຶກ.