ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສາລະວັນ.

 ທ່ານ ປອ ບຸນ​ທອງ ຈິດ​ມະນີ ກຳມະການ​ກົມ​ການ​​ເມືອງ​ສູນ​ກາງ​ພັກ, ​ຄະນະເລຂາທິການ​ສູນ​ກາງ​ພັກ, ຮອງ​ນາຍົກລັດຖະມົນຕີ, ປະທານຄະນະ​ກວດກາ​ສູນ​ກາງ​ພັກ, ປະທານ​ອົງການ​ກວດກາ​ລັດຖະບານ, ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ ພ້ອມ​ດ້ວຍ​ຄະນະ​ ໄດ້​ເດີນທາງ​ດ້ວຍ​ເຮືອບິນ​ມາ​ຮອດ​ເທ​ສະບາ​ນ​ເມືອງ​ສາລະ​ວັນ, ​ແຂວງ​ສາລະ​ວັນ​ໃນ​ເວລາ 16:20 ​ໂມງ ຂອງ​ວັນ​ທີ 12  ກຸມພາ 2018 ທີ່​ຜ່ານ​ມາ​ນີ້, ​ໂດຍ​ໄດ້​ຮັບ​ການ​ຕ້ອນຮັບຈາກ​ທ່ານ ສີ​ສຸວັນ ວົງ​ຈອມ​ສີ ກຳມະການ​ສູນ​ກາ​ງພັກ, ​ເລຂາ​ພັກ – ​ເຈົ້າ​ແຂວງ​ໆ ສາລະ​ວັນ ພ້ອມ​ດ້ວຍ​ຄະນະ.

          ​ໃນ​ໂອກາດ​ເຄື່ອນ​ໄຫວ​ຢ້ຽມຢາມ​ແຂວງ​ສາລະ​ວັນ, ທ່ານ ປອ ບຸນ​ທອງ ຈິດ​ມະນີ ໄດ້ພົບປະກັບຄະນະນຳ ແລະ ພະນັກງານຫຼັກແຫຼ່ງຜູ່​ທີ່​ເຮັດ ວຽກ​ງານ​ກວດກາ​ຂອງ​ພະ​ແນ​ກການ – ອົງການ​ທຽບ​​ເທົ່າ​ອ້ອມ​ຂ້າງ​ແຂວງ ຢູ່ທີ່ຫ້ອງ​ປະຊຸມ​ພິ​ເສດຊັ້ນ II ຂອງ​ສະ​ໂມ​ສອນ​ໃຫ່ຍ ຂອງ​ແຂວງ​ສາລະ​ວັນ ໄດ້ຮັບຟັງການລາຍງານ ສະພາບການພັດທະນາວຽກງານຮອບ ດ້ານ​​ໂດຍ​ຫຍໍ້ຂອງ​ແຂວງ ຈາກ ທ່ານເຈົ້າແຂວງໆ ສາລະ​ວັນ ຊຶ່ງໂດຍລວມແລ້ວ ທົ່ວແຂວງ ສາລະ​ວັນ ແມ່ນມີຄວາມສະຫງົບ, ປະຊາຊົນມີຄວາມອຸ່ນອ່ຽງທຸ່ນທ່ຽງ ທຳມາຫາກິນປະກອບສ່ວນສ້າງສາພັດທະນາເສດຖະກິດ – ສັງຄົມ ແລະ ມີຊີວິດການເປັນຢູ່ນັບມື້ນັບດີຂຶ້ນ. ​ໃນ​ໂອກາດ​ນີ້ ທ່ານ ປອ ບຸນທອງ ຈິດມະນີ ກໍ​ໄດ້​ໃຫ້​ກຽດ​ໂອ້​ລົມ ​ໂດຍໄດ້ເນັ້ນ​ໜັກໃຫ້ສືບຕໍ່ເອົາໃຈໃສ່ຕໍ່ວຽກງານສືກສາອົບຮົມການເມືອງ – ແນວຄິດ ​ເປັນ​ກົກ, ຍົກ​ສູງ​ສະຕິ​ຄວາມ​ເປັນ​ເຈົ້າ​ໃນວຽກງານປ້ອງກັນຊາດ – ປ້ອງກັນຄວາມສະຫງົບ, ​ຖື​ເອົາ​ວຽກ​ງານ​ການ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ປະຊາຊົນ​ເປັນວຽກງານພື້ນຖານຍາວນານ ​ຊຸກຍູ້ສົ່ງ​ເສີມການປູກ – ການລ້ຽງ ໃຫ້ມີປະສິດທິຜົນ ດ້ວຍ​ການຫັນຈາກການຜະລິດ ແບບຄອບຄົວ ມາຜະລິດ ແບບເປັນກຸ່ມ – ເປັນຟາມ, ນໍາໃຊ້ເຕັກນິກວິທະຍາສາດ, ຈັດສັນພື້ນທີ່ທຳການຜະລິດ, ທີ່ຢູ່ອາໃສ ​ແລະ ອາຊີບຄົງທີ່ ໃຫ້ປະຊາຊົນຢ່າງລະອຽດ ເພື່ອກ້າວໄປສູ່ ຄອບຄົວພົ້ນທຸກເທື່ອລະກ້າວ, ຕ້ານທຸກກົນອຸບາຍຂອງສັດ​ຕູ ​ແລະ ອິດທິກຳລັງປໍລະປັກ​ຂອງກຸ່ມຄົນບໍ່ດີ ຫັນລົງກໍ່ສ້າງຮາກຖານການ​ເມືອງ, ປຸກລະດົມຈິດໃຈປະຊາຊົນ ໃຫ້ມີສະຕິຕື່ນ​ຕົວ, ​ເອົາ​ໃຈໃສ່ສະກັດກັ້ນ ປະກົດການຫຍໍ້ທໍ້ໃນສັງຄົມ, ການລັກລອບຊັບພະຍາກອນທຳມະຊາດ ບໍລິເວນຊາຍແດນ ໃຫ້ຫຼຸດນ້ອຍຖອຍລົງເທື່ອລະກ້າວ. ປະຕິບັດວຽກງານການກວດກາ​​ໃຫ້​ເປັນ​ປົກ ກະຕິ, ​ເອົາໃຈໃສ່ ກວດກາມະຕິ, ຄຳສັ່ງ, ກົດລະບຽບຂອງພັກ ແລະ ການປະຕິບັດລະບຽບກົດໝາຍຂອງລັດ, ແກ້ໄຂບັນຫາການສໍ້ລາດບັງຫຼວງ​, ການປະຕິບັດລະບຽບວິໃນທາງດ້ານບໍລິຫານດຳ​ເນີນ​ການລົງໂທດ, ປົດຕຳແໜ່ງ ຕາມລະບຽບກົດໝາຍຢ່າງ​ເຂັ້ມງວດ.