ທ່ານ ບົວທອງ ຄຸນຍອດປັນຍາ, ຮອງເລຂາພັກແຂວງ, ຮອງເຈົ້າແຂວງໆ ສາລະວັນ ຕ້ອນຮັບ ທ່ານ ປະທານສານປະຊາຊົນພາກໃຕ້

ເວລາ 10: 00 ໂມງ ຂອງວັນທີ 18 ທັນວາ 2015 ທີ່ຜ່ານມານີ້ ຢູ່ທີ່ຫ້ອງ 207 ຫ້ອງຮັບແຂກຂອງຫ້ອງວ່າການປົກຄອງແຂວງ ທ່ານ ບົວທອງ ຄຸນຍອດປັນຍາ, ຮອງເລຂາພັກແຂວງ, ຮອງເຈົ້າແຂວງໆ ສາລະວັນ ກໍໄດ້ໃຫ້ກຽດຕ້ອນຮັບ ທ່ານ ສົມພິດ ຊິນນະຈັກ ປະທານສານປະຊາຊົນພາກໃຕ້ ພ້ອມດ້ວຍຄະນະ. ການພົບປະຂອງທ່ານ ສົມພິດ ຊິນນະຈັກ ປະທານສານປະຊາຊົນພາກໃຕ້ ຄັ້ງນີ້ ເພື່ອເປັນການຢ້ຽມຢາມຖາມຂ່າວ ທັງໄດ້ປຶກສາຫາລື ຫຼື ລາຍງານວຽກງານຕ່າງໆຂອງສານໃນເຂດທ້ອງຖິ່ນເປັນຕົ້ນ ແມ່ນການສ້າງພື້ນຖານໂຄງລ່າງແຕ່ລະສານເຂດຂອງທ້ອງຖິ່ນ ໂດຍແມ່ນການສ້າງຕຶກອາຄານ, ຫ້ອງການ ແລະ ຍັງໄດ້ສະເໜີໃຫ້ທາງແຂວງມີຄຳເຫັນກ່ຽວກັບຄະດີຕ່າງໆ ເພື່ອແກ້ໄຂໃຫ້ສອດຄ່ອງ – ຖືກຕ້ອງຕາມຄວາມຮຽກຮ້ອງຕ້ອງການຂອງປະຊາຊົນ.
ຕອນທ້າຍ ທ່ານ ບົວທອງ ຄຸນຍອດປັນຍາ ຮອງເລຂາພັກແຂວງ, ຮອງເຈົ້າແຂວງໆ ສາລະວັນ ກໍໄດ້ສະແດງຄວາມຊົມເຊີຍ ແລະ ຂອບອົກຂອບໃຈຕໍ່ທ່ານພ້ອມຄະນະ ທີ່ໄດ້ລາຍງານສະພາບວຽກງານຕ່າງໆໃຫ້ແຂວງຮັບຊາບ ແລະ ຈະໄດ້ນຳເອົາການສະເໜີ, ເພື່ອຈະນຳໄປລາຍງານຕໍ່ຂັ້ນເທິງ, ຫຼັງຈາກນັ້ນ ທ່ານ ສົມພິດ ຊິນນະຈັກ ປະທານສານປະຊາຊົນພາກໃຕ້ ພ້ອມດ້ວຍຄະນະ ກໍໄດ້ມອບກະຕ່າດອກໄມ້ ເພື່ອສະແດງຄວາມຮັກແພງເນື່ອງໃນໂອກາດສົ່ງທ້າຍປີເກົ່າ, ຕ້ອນຮັບປີໃໝ່ ທີ່ຈະມາເຖິງໃນໝໍ່ໆນີ້.