ທ່ານ ບົວທອງ ຄຸນຍອດປັນຍາ ຮອງເລຂາພັກ – ຮອງເຈົ້າແຂວງໆສາລະວັນ, ຜູ້ຊີ້ນຳວຽກງານຫ້ອງວ່າການແຂວງ ໂອ້ລົມພະນັກງານ – ລັດຖະກອນ ທົ່ວຫ້ອງວ່າການແຂວງສາລະວັນ.

ໃນຕອນເຊົ້າ ເວລາ 8:00 ໂມງ ຂອງວັນທີ 6 ກັນຍາ 2018 ທີ່​ຜ່ານ​ມາ, ທີ່ຫ້ອງປະຊຸມຊັ້ນ III ຂອງຫ້ອງວ່າການແຂວງສາລະວັນ, ທ່ານ​ ບົວທອງ ຄຸນຍອດປັນຍາ ຮອງ​ເຈົ້າແຂວງໆ ສາລະ​ວັນ, ໄດ້​ໃຫ້​ກຽດ​ມີ​ຄຳ​ເຫັນ​ໂອ້​ລົມ​ຕໍ່​ພະນັກງານ, ສະມາຊິກ​ພັກ ​ແລະ ລັດຖະກອນທົ່ວ​ຫ້ອງ​ວ່າການ​ແຂວງ​, ເຂົ້າຮ່ວມ​ຮັບ​ຟັງ​ການໂອ້ລົມໃນ​ຄັ້ງນີ້​ ນຳພາ​ໂດຍ ທ່ານ ປອ ສະ​ໄໝ ​ໂພທິ​ສານ  ກຳມະການ​ພັກ​ແຂວງ, ​ເລຂາ​ຄະນະ​ພັກ​ຮາກ​ຖານ – ຫົວໜ້າຫ້ອງວ່າການແຂວງ, ພ້ອມ​ດ້ວຍຄະນະຫ້ອງ, ຫົວໜ້າຂະແໜງ – ຮອງຂະແໜງ ແລະ ພະນັກງານຂອງ​ຫ້ອງ​ວ່າການ​​ແຂວງ​ເຂົ້າຮ່ວມ​ຢ່າງ​ພ້ອມພຽງ​.
ກ່ອນ​ຮັບ​ຟັງ​ການ​ໂອ້​ລົມຈາກ​ທ່ານ​ຮອງ​ເລຂາ​ພັກ – ຮອງ​ເຈົ້າ​ແຂວງ ນັ້ນ, ກອງປະຊຸມກໍໄດ້ຮັບຟັງການລາຍງານໂດຍຫຍໍ້​ກ່ຽວ​ກັບຈັດຕັ້ງ​ເຄື່ອນ​ໄຫວວຽກງານຫ້ອງວ່າການໃນໄລຍະ 8 ເດືອນທີ່ຜ່ານມາຈາກ ທ່ານ ປອ ສະໄໝ ໂພທິສານ ເຊິ່ງ​ໄດ້​ຕີ​ລາຄາ​ວ່າ: ​ຫ້ອງ​ວ່າການ​ແຂວງ ​ໄດ້​ນາມ​ເປັນ ​ເສນາ​ທິການ​ໃຫ້​ແກ່​ຄະນະ​ພັກ, ຄະນະ​ນຳ​ຂອງ​ແຂວງ ​ໄດ້​ເອົາ​ໃຈ​ໃສ່​ເຄື່ອນ​ໄຫວ​ຕາມ​ພາລະ​ບົດບາດ ຂອງ​ຕົນ​ຢ່າງ​ຕັ້ງໜ້າ ​ແລະ ມີ​ຫຼາຍ​ດ້ານ​ທີ່ມີຜົນ​ສຳ​ເລັດ, ວຽກ​ງານ​ປິ່ນ​ອ້ອມກໍ​ເຫັນ​ວ່າ​ໄດ້​ເຄື່ອນ​ໄຫວ​ຢ່າງ​ເປັນ​ລະບົບ, ວຽກ​ງານ​ອົງການ​ຈັດ​ຕັ້ງມະຫາຊົນ ກໍ​ຈັດຕັ້ງ​ເຄື່ອນ​ໄຫວ​ສ້າງ​ຂະ​ບວນການ​ຕາມ​ຂໍ້ແຂ່ງຂັນ​ຂອງ​ຕົນ​ສາມາດ​ກາຍ​ເປັນ​ແມ່ຍິງ 3ດີ, ຊາວ​ໜຸ່ມ 4 ບຸກ ​ແລະ ກຳມະການ​ບານ 5 ​ເປັນ​ເຈົ້າ.
ຈາກ​ນັ້ນ, ທ່ານ ຮອງ​ເລຂາ​ພັກ – ຮອງເຈົ້າແຂວງໆສາລະວັນ ກໍ​ໄດ້​ໃຫ້​ກຽດ​ໂອ້​ລົມ, ​ເຊິ່ງກ່ອນ​ອື່ນ​ທ່ານ​ກໍ​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່ຄະນະ​ພັກ, ຄະນະ​ຫ້ອງວ່າການ ​ແລະ ພະ​ນັກ​ງານ​ຫຼັກ​ແຫຼ່ງ​ທຸກ​ຄົນ ທີ່​ໄດ້​ສ້າ​ງ​ເງື່ອນ​ໄຂ​ອຳນວຍ​ຄວາມ​ສະ​ດວກ​ໃຫ້​ແກ່​ການ​ເຄື່ອນ​ໄຫວ​ຂອງ​ການ​ນຳ ໃນ​​ໄລຍະ​ຜ່ານ​ມາ ​ແລະ ປະຕິບັດ​ໜ້າ​ທີ່​ຂອງ​ຕົນ​ດ້ວຍ​ຄວາມ​ຮັບຜິດຊອບ​ສູງ, ​ແຕ່​ເພື່ອ​ໃຫ້​ກຳ​​ໄດ້​ສະພາບ​ການ​ຂອງໂລກ​​ສາກົນ, ທີ່ມີການຜັນແປຢ່າງສັບສົນ, ເຊີ່ງ​ອາດ​ຈະ​ສົ່ງ​ຜົນ​ກະທົບ​ຕໍ່​ແນວ​ຄິດ ​ແລະ ການ​ພັດທະນາ​ປະ​ເທດ​ເວົ້າລວມ, ​ເວົ້າສະ​ເພາະ ກໍ​ແມ່ນ​ແຂວງ​ສາລະ​ວັນ​ພວກ​ເຮົາ ຄະນະ​ພັກ, ຄະນະ​ນຳ​ຂອງ​ຫ້ອງ ​ແລະ ພະນັກງານ – ສະມາຊິກພັກ​ຕ້ອງ​ກຳ​ໃຫ້​ໄດ້, ຈຳ​ແນ​ກ​ໃຫ້​ອອກ ລະຫວ່າງ ມິດ ​ແລະ ສັດຕູ, ວິ​ເຄາະ​ວີ​ໄຈ​ບັນຫາ​ໃຫ້​ລະອຽດ​ຈະ​ແຈ້ງ, ພ້ອມ​ທັງມີ​ສະຕິ​ຕໍ່​ກົນອຸບາຍ​ຂອງ​ສັດຕູ​ຕະຫຼອດ​ເວລາ, ​​ ໃນ​ຕໍ່ໜ້າ ກໍ​ຄື​ການ​ກະກຽມ​ໃຫ້​ແກ່​ກອງ​ປະຊຸມ​ໃຫ່ຍ 3 ຂັ້ນຂອງ​ພັກ, ພວກ​ເຮົາ​ກໍ​ຕ້ອງ​ໄດ້​ເອົາ​ໃຈ​ໃສ່ ​ ເຂົ້າຮ່ວມ​ສ້າງ​ຂະ​ບວນການ, ກໍ​ຄືການ​ກໍ່ສ້າງພະນັກງານ​ສືບທອດ – ປ່ຽນ​ແທນ, ຕ້ອງຝຶກຝົນພະນັກງານ​ໜຸ່ມ​ນ້ອຍ​ໃຫ້​ມີ​ຄວາມ​ດຸ​ໝັ່ນ, ອົດທົນ, ສ້າງ​ໃຫ້ກາຍເປັນບຸກຄົນມີຄວາມຮູ້ – ຄວາມສາມາດ, ເຂົ້າໃຈຕໍ່ໜ້າທີ່ວຽກງານ. ຢາກ​ເຮັດ​​ໄດ້​ແນວ​ນັ້ນສຳຄັນ ກ່ອນໝູ່​ກໍແມ່ນການສຶກສາອົບຮົມວຽກງານການເມືອງ – ແນວຄິດ ໃຫ້ແກ່ພະນັກງານ – ສະມາຊິກພັກໃນຂອບເຂດຄວາມຮັບຜິດຊອບ​ໃຫ້​ເປັນ​ປົກກະຕິ ​ແລະ ມີ​ລັກສະນະ​ເລິກ​ເຊິ່ງ, ​ເຖິງ​ຖອງ ​ແລະ ຖືກ​ເປົ້າໝາຍ. ພ້ອມ​ນັ້ນ, ກໍ​ຕ້ອງ​ໄດ້​ເອົາ​ໃຈ​ໃສ່​ເພີ່ມ​ທະວີ​ຄວາມສາມັກຄີເປັນເອກະພາບໃນໝູ່ຄະນະ​ໃຫ້​ໜັກ​ແໜ້ນ, ​ເຂັ້ມ​ແຂງ ເພື່ອພ້ອມ​ກັນ​ເຮັດ​ສຳ​ເລັດ​ໜ້າ​ທີ່ຄວາມຮັບຜິດຊອບ ທີ່ຖືກມອບໝາຍຢ່າງ​ຖືກຕ້ອງ ​ແລະ ທ່ວງທັນ​ກັບ​ກຳນົດ​ເວລາ.