ທ່ານ ນາຍົກລັດຖະມົນຕີແຫ່ງ ສປປ ລາວ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງ ສາລະວັນ

ລະຫວ່າງວັນທີ 6 – 7 ມັງກອນ 2015 ທີ່ຜ່ານມານີ້ ທ່ານ ທອງສິງ ທຳມະວົງ ກຳມະການກົມການເມືອງສູນກາງ ພັກ – ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ສາລະວັນ. ເວລາ 7: 05 ໂມງ ຂອງວັນທີ 6 ມັງກອນ 2015 ທ່ານ ຄຳບຸ່ນ ດ້ວງປັນຍາ ກຳມະການສູນກາງພັກ, ເລຂາພັກ ແຂວງ,ເຈົ້າແຂວງໆ ສາລະວັນ,ທ່ານ ດຣ ບຸນຖອງ ດີວິໄຊ ເຈົ້າແຂວງໆ ຈຳປາສັກ ພ້ອມດ້ວຍຄະນະນຳຂອງ ແຂວງສາລະວັນ ແລະ ແຂວງຈຳປາສັກ ອອກຕ້ອນຮັບ ທ່ານ ນາຍົກລັດຖະມົນຕີ ຢູ່ທີ່ສະໜາມບິນປາກ​ເຊ, ​ແຂວງ​ຈຳປາ​ສັກ ຢ່າງອົບອຸ່ນ. ເວລາ 8:00 ໂມງ ຂອງວັນດຽວກັນ ທ່ານ ນາຍົກລັດຖະມົນຕີ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ເມືອງຄົງເຊ ໂດນ ແຂວງສາລະວັນ ເຊິ່ງມີການນຳຂອງເມືອງ, ປະຊາຊົນ​ອອກ​ຕ້ອນຮັບ ​ແລະເຂົ້າຮ່ວມຮັບຟັງຄຳໂອ້ລົມຂອງ​ທ່ານເປັນຈຳ ນວນຫຼວງຫຼາຍ ເຊິ່ງທ່ານນາຍົກລັດຖະມົນຕີ ໄດ້ມີ​ຄຳ​ເຫັນ​ຊີ້ນຳໃຫ້​ເມືອງ​ສຶບຕໍ່​ເອົາ​ໃຈ​ໃສ່ການພັດທະນາດ້ານເສດຖະກິດ – ສັງຄົມ, ເປັນຕົ້ນຂົງເຂດວຽກງານກະສິກຳ, ​ເອົາ​ໃຈ​ໃສ່ຊຸກຍູ້ພໍ່ແມ່ປະຊາຊົນທຳການຜະລິດຫຼາຍຂຶ້ນກວ່າເກົ່າ ເພື່ອ​ເຮັດໃຫ້ ເມືອງຫຼຸດພົ້ນອອກຈາກຄວາມທຸກຍາກ.
ເວລາ 14:00 ໂມງ ຂອງວັນດຽວກັນ ຢູ່ທີ່ຫ້ອງປະຊຸມ VIP ສະໂມສອນຂອງແຂວງສາລະວັນ ທ່ານ ນາຍົກລັດຖະມົນ ຕີ ໄດ້ເຂົ້າຮ່ວມ​ພົບ​ປະ ​ແລະໂອ້ລົມກັບຄະນະນໍາຂັ້ນແຂວງ, ຂັ້ນເມືອງ ແລະ ພະແນການ, ອົງການຂອງແຂວງ ມີຜູ້ເຂົ້າຮ່ວມ ທັງໝົດ 63 ທ່ານ, ຍິງ 4 ທ່ານ. ເຊິ່ງ ທ່ານ ຄຳບຸ່ນ ດ້ວງປັນຍາ ເຈົ້າແຂວງໆສາລະວັນ ຕາງໜ້າການນຳຂອງແຂວງ ຂຶ້ນ ລາຍງານສະພາບລວມຂອງແຂວງໂດຍຫຍໍ້ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຢູ່ແຂວງ ສາລະວັນໃນສົກປີຜ່ານມາ. ໂດຍສະເພາະ ແມ່ນສະພາບພາຍໃນແຂວງ ແມ່ນຍັງສືບຕໍ່ຮັກສາໄດ້ສະຖຽນລະພາບທາງດ້ານ ການເມືອງ, ສັງຄົມມີຄວາມສະຫງົບໂດຍພື້ນຖານ, ພື້ນຖານໂຄງລ່າງໄດ້ຮັບການພັດທະນາ, ຄວາມທຸກຍາກຂອງປະຊາຊົນ ໄດ້ຮັບການແກ້ໄຂດີຂຶ້ນເທື່ອລະກ້າວ, ປະຊາຊົນບັນດາເຜົ່າ ໄດ້ຮັບການສຶກສາອົບຮົມ ຮໍ່າຮຽນແນວທາງ-ນະໂຍບາຍຂອງ ພັກ-ລັດຖະບານ ຢ່າງກວ້າງຂວາງ, ມີຄວາມຕື່ນຕົວ ແລະ ສາມັກຄີປອງດອງ, ຕັ້ງໜ້າພັດ ທະນາເສດຖະກິດຄອບຄົວຂອງ ຕົນໃຫ້ດີຂຶ້ນເທື່ອລະກ້າວ. ເຊິ່ງສະແດງອອກໃນໄລຍະສົກປີທີ່ຜ່ານມາ ລວມຍອດຜະລິດຕະພັນພາຍໃນ ບັນລຸໄດ້ 3.300 ກວ່າຕື້ກີບ, ຂະຫຍາຍ ຕົວໃນລະດັບ 11-12%, ສະ ເລ່ຍລາຍຮັບຕໍ່ຫົວຄົນ ບັນລຸໄດ້ເຖິງ 1.072 ໂດລາຕໍ່ຄົນຕໍ່ປີ. ດ້ານ ການລົງທຶນແຂວງສາລະວັນ ໄດ້ຈັດຕັ້ງປະຕິບັດ 185 ໂຄງການ, ສາມາດປະຕິບັດສໍາເລັດແລ້ວ 179 ໂຄງການ, ມູນຄ່າ 60 ກວ່າຕື້ກີບ ທຽບໃສ່ແຜນການສາມາດປະຕິບັດໄດ້ 96,65%. ລາຍຈ່າຍສາມາດປະຕິບັດໄດ້ 362 ກວ່າຕື້ກີບ, ທຽບໃສ່ ແຜນການປະຕິບັດໄດ້ 98,08%. ໃນຂົງ ເຂດການຜະລິດກະສິກຳ, ການຜະລິດສະບຽງອາຫານ, ການປູກພືດເປັນສິນຄ້າ ເພື່ອສົ່ງອອກ ແລະ ການລ້ຽງສັດ ກໍ່ໄດ້ມີທ່າຂະຫຍາຍຕົວຢ່າງຕັ້ງໜ້າເຮັດໃຫ້ບ້ານທຸກຍາກທົ່ວແຂວງ ຍັງເຫຼືອ 13,78% ແລະ ຄອບຄົວທຸກຍາກ ຍັງເຫຼືອພຽງ 8,24%; ສໍາລັບວຽກງານການສຶກສາ ແມ່ນສາມາດລົບລ້າງຂັ້ນປະ ຖົມບໍາລຸງໃນທົ່ວ ແຂວງ. ນອກຈາກນັ້ນ ທ່ານເຈົ້າແຂວງໆສາລະວັນ ກໍໄດ້ມີຂໍ້ສະເໜີຈຳນວນໜຶ່ງໃຫ້ຂັ້ນເທິງ – ບັນດາກະຊວງຕ່າງໆຂັ້ນສູນ ກາງຄົ້ນຄວ້າພິຈາລະນາຊ່ວຍແຂວງຕື່ມອີກ.
ໃນໂອກາດນີ້ ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ບັນດາຜົນສຳເລັດຂອງແຂວງ, ເມືອງ ກໍ່ຄື ບ້ານ ໃນໄລ ຍະຜ່ານມາ ທີ່ໄດ້ມີຄວາມພະຍາຍາມສູງ ໃນການຈັດຕັ້ງປະຕິບັດ ນະໂຍບາຍຂອງ ພັກ-ລັດຖະບານ ເຊິ່ງເຮັດໃຫ້ມີຫຼາຍອັນ ໄດ້ຮັບການປ່ຽນແປງຢ່າງຕັ້ງໜ້າ ແລະ ມີການປັບປຸງດີຂຶ້ນ, ພື້ນຖານໂຄງລ່າງ ໄດ້ຮັບການພັດທະນາ. ນອກຈາກນັ້ນ, ວຽກ ງານການເມືອງ-ແນວຄິດ ກໍ່ໄດ້ມີການສຶກສາອົບຮົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວແຂວງມີ ຄວາມສະຫງົບຢ່າງໜັກແໜ້ນ, ເຮັດໃຫ້ຮາກຖານມີລະບົບປ້ອງກັນຊາດ-ປ້ອງກັນຄວາມສະຫງົບໜັກແໜ້ນ. ວຽກງານເສດ ຖະກິດ ກໍ່ມີບາດກ້າວຂະຫຍາຍຕົວພໍສົມຄວນ ເຊິ່ງເຮັດໃຫ້ລາຍຮັບຂອງແຂວງສູງຂຶ້ນ, ຊີວິດການເປັນຢູ່ຂອງປະຊາຊົນນັບ ມື້ນັບດີຂຶ້ນ ເຮັດໃຫ້ບັນດາຄອບຄົວທຸກຍາກມີຈຳນວນຫຼຸດລົງເທື່ອລະກ້າວ, ປະຊາຊົນມີຄວາມຕື່ນຕົວ ເປັນເຈົ້າຫຼາຍຂຶ້ນ ແລະ ອັນທີ່ພົ້ນດັ່ນກວ່າໝູ່ ກໍ່ແມ່ນການຜະລິດເປັນສິນຄ້າ, ການບໍລິການຢູ່ໃນແຂວງ ເຊິ່ງເປັນການປະກອບສ່ວນເຂົ້າໃນ ການບັນລຸເປົ້າໝາຍສະຫັດສະຫວັດ ດ້ານການພັດທະນາຢ່າງຕັ້ງໜ້າ. ແຕ່ເຖິງຢ່າງໃດກໍ່ດີໃນໂອກາດທີ່ມາຢ້ຽມຢາມນີ້, ທ່ານ ນາຍົກລັດຖະມົນຕີ ໄດ້ໃຫ້ທິດຊີ້ນໍາໃຫ້ແຂວງ ແລະ ເມືອງ ເອົາໃຈໃສ່ຕື່ມ ດັ່ງນີ້:
1.ດ້ານການເມືອງແນວຄິດ ຕ້ອງໄດ້ສຸມໃສ່ສຶກສາອົບຮົມພະນັກງານ, ທະຫານ, ຕຳຫຼວດ, ເຈົ້າໜ້າທີ່ທຸກຂັ້ນຕະຫຼອດຮອດ ພໍ່ແມ່ປະຊາຊົນໃຫ້ເຂົ້າໃຈເລິກເຊິ່ງເຖິງຖອງ, ມີຄວາມສະຫງົບ ອຸ່ນອ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ ກໍ່ຄືການພັດ ທະນາປະເທດ ໃນໄລຍະໃໝ່, ເຮັດໃຫ້ປະຊາຊົນເຂົ້າຮ່ວມໃນການພັດ ທະນາ ເພື່ອໃຫ້ທຸກຄົນມີຄວາມຕື່ນຕົວ ແລະໃຫ້ ການຮ່ວມມືໃຫ້ມີການເຄື່ອນໄຫວຢ່າງແຂງແຮງ ເພື່ອສ້າງເງື່ອນໄຂໃຫ້ແກ່ການພັດທະນາ.
2.ເອົາໃຈໃສ່ປັບປຸງຕາໜ່າງກຳລັງ ປກຊ-ປກສ ຢູ່ຮາກຖານ ໃຫ້ດີຂຶ້ນກວ່າເກົ່າ ໂດຍສະເພາະ ວຽກງານເຕົ້າໂຮມຄວາມສາ ມັກຄີປະຊາຊົນບັນດາເຜົ່າ ເພື່ອເປັນກຳລັງແຮງອັນສຳຄັນຂອງແຂວງ, ຊຸກຍູ້ໃຫ້ບັນດາອົງການຈັດຕັ້ງ ການເມືອງຢູ່ຮາກ ຖານ. ໂດຍສະເພາະ ແມ່ນຂັ້ນບ້ານ ມີການເຄື່ອນໄຫວ ຕາມພາລະບົດບາດຂອງຕົນ ແລະ ພ້ອມກັນສະກັດກັ້ນບັນດາປະ ກົດການຫຍໍ້ທໍ້ຕ່າງໆ.
3.ດ້ານເສດຖະກິດສືບຕໍ່ເສີມຂະຫຍາຍມູນເຊື້ອທີ່ມີຢູ່ແລ້ວນັ້ນ ໂດຍສະເພາະຢູ່ພາຍໃນແຂວງ, ເມືອງແມ່ນມີທ່າແຮງການ ຜະລິດກະສິກຳເປັນສິນຄ້າ ເພື່ອປະກອບສ່ວນເຂົ້າໃນການພັດທະນາເສດຖະກິດ ຂອງແຂວງ, ພະຍາຍາມຊຸກຍູ້ໃນການ ຫັນເປັນອຸດສາຫະກຳທັນສະໄໝເທື່ອລະກ້າວ ໂດຍຕິດພັນກັບການຜະ ລິດອຸດສາຫະກຳປຸງແຕ່ງ.
4.ດ້ານວຽກງານວັດທະນະທຳ-ສັງຄົມ ຕ້ອງເອົາໃຈໃສ່ ຈັດຕັ້ງບໍາລຸງການສຶກສາ ຕໍ່ຜູ້ທີ່ຍັງບໍ່ທັນມີຄຸນນະພາບ ເພື່ອຮັບປະ ກັນ ແລະ ບັນລຸເປົ້າໝາຍສະຫັດສະຫວັດ. ພ້ອມກັນນັ້ນ, ໃຫ້ສືບຕໍ່ປ້ອງກັນພະຍາດທີ່ເຄີຍລະບາດເປັນ ຕົ້ນ: ພະຍາດໄຂ້ ຍຸງລາຍ, ພະຍາດຕາມລະດູ…
5.ເອົາໃຈໃສ່ດໍາເນີນຊີວິດການເມືອງໃຫ້ເລິກເຊິ່ງເຖິງຖອງສາມາດຕີລາຄາຖອດຖອນໄດ້ບົດຮຽນທັງດ້ານດີ, ດ້ານອ່ອນ ແລະ ດ້ານຄົງຄ້າງ ການນໍາພາຂອງຄະນະພັກຕົນ ໃນໄລຍະຜ່ານມາ. ພ້ອມກັນນັ້ນ, ກໍ່ຈະຕ້ອງໄດ້ເອົາໃຈ ໃສ່ໃນການປັບປຸງລະບົບ ການເມືອງຢູ່ຂັ້ນຮາກຖານໃຫ້ເຂັ້ມແຂງກວ່າເກົ່າ.
6.ເອົາໃຈໃສ່ໃນການຈັດຕັ້ງຜັນຂະຫຍາຍ ຜົນກອງປະຊຸມສະຫຼຸບ ຖອດຖອນທົດລອງວຽກງານ 3 ສ້າງ ໃຫ້ລົງເລິກ ແລະ ເຂົ້າສູ່ຊີວິດຕົວຈິງ ເພື່ອເປັນການປະກອບສ່ວນ ໃນການຫັນປ່ຽນຮາກຖານໄປສູ່ຈຸດໝາຍສັງຄົມນິຍົມ. ໃນນັ້ນ, ໃຫ້ຕັ້ງໜ້າ ແກ້ໄຂບັນຫາຄວາມທຸກຍາກຂອງປະຊາຊົນ.
ໃນຕໍ່ໜ້າຕ້ອງໄດ້ເອົາໃຈໃສ່ໃນການຄັດເລືອກຍ້ອງຍໍບຸກຄົນທີ່ດີເດັ່ນຕໍ່ຜູ້ທີ່ມີຜົນງານ ໃນການຈັດຕັ້ງປະຕິບັດ ໜ້າທີ່ວຽກງານ ຕ້ອງຄັດເລືອກບຸກຄົນ, ນິຕິບຸກຄົນໃຫ້ໄດ້ນາມມະຍົດນັກຮົບແຂ່ງຂັນແຮງງານ, ວິລະຊົນແຮງງານ.

ຕອນເຊົ້າວັນທີ 7 ມັງກອນ 2015 ທ່ານນາຍົກລັດຖະມົນຕີ ພ້ອມດ້ວຍຄະນະ ກໍໄດ້ເດີນທາງໄປຢ້ຽມຢາມ ແລະ ເຮັດ ວຽກຢູ່ແຂວງເຊກອງຕື່ມອີກ ເຊິ່ງໃຫ້ກຽດອອກສົ່ງຄະນະຂອງທ່ານໃນຄັ້ງນີ້ ແມ່ນທ່ານເຈົ້າແຂວງໆສາລະວັນ ພ້ອມດ້ວຍຄະນະນຳຂອງແຂວງ.