ທ່ານ ນາງ ສູນທອນ ໄຊຍະຈັກ ກຳມະການສູນກາງພັກ, ຫົວໜ້າຄະນະພົວພັນ ຕ່າງປະເທດສູນກາງພັກ, ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງ ສາລະວັນ.

ໃນຕອນເຊົ້າຂອງວັນທີ 20 ສິງຫາ 2019 ທີ່ຜ່ານມານີ້, ທ່ານ ນາງ ສູນທອນ ໄຊຍະຈັກ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ພ້ອມດ້ວຍຄະນະ ໄດ້​ເດີນທາງ​ມາ​ຢ້ຽມຢາມ ​ແລະ ​ເຮັດວຽກຢູ່ແຂວງສາລະວັນ ໃນ​ໂອກາດ​ດັ່ງກ່າວນີ້, ກໍ​ໄດ້​ເຂົ້າຢ້ຽມ​ຂໍາ​ນັບ ທ່ານ ສີ​ສຸວັນ ວົງ​ຈອມ​ສີ  ກຳມະການ​ສູນ​ກາງ​ພັກ, ​ເລຂາ​ພັກ – ​ເຈົ້າ​ແຂວງໆ ສາລະ​ວັນ ​ເຊິ່ງທ່ານ ​ໄດ້ສະແດງຄວາມຍີນດີຕ້ອນຮັບອັນອົບອຸ່ນ ແລະ ​ຂອບ​ອົກ​ຂອບ​ໃຈ ຕໍ່ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ຂອງການມາຢ້ຽມຢາມໃນຄັ້ງນີ້.

ທ່ານ ນາງ ສູນທອນ ໄຊຍະຈັກ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ກໍໄດ້ແຈ້ງຈຸດປະສົງຂອງການມາເຄື່ອນໄຫວ ເຊີ່ງທ່ານໄດ້ກ່າວເຖີງ ສະພາບການພົວພັນຂອງພາກພື້ນ ແລະ ສາກົນ, ການພົວພັນ ລາວ – ຫວຽດ, ລາວ – ຈີນ, ແລະ ເພື່ອມາເຜີຍແຜ່ພາລະບົດບາດ – ສິດ ຂອງຄະນະພົວພັນຕ່າງປະເທດ, ​ເຊິ່ງທ່ານ ​ເຈົ້າ​ແຂວງໆ ສາລະ​ວັນ ກໍໄດ້ເວົ້າເຖີງສະພາບໂດຍລວມຂອງແຂວງ ທາງດ້ານການສຶກສາ ແລະ ແຫຼ່ງທ່ອງທ່ຽວທາງທຳມະຊາດ ອັນສວຍສົດງົດງາມຂອງແຂວງສາລະວັນ, ພ້ອມກັນນັ້ນກໍສະແດງຄວາມຍີນດີຕ້ອນຮັບ ແລະ ສະ​ແດງ​ຄວາມ​ຂອບ​ອົກ​ຂອບ​ໃຈ ຕໍ່ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ຂອງການມາຢ້ຽມຢາມໃນຄັ້ງນີ້, ນອກນັ້ນ ທ່ານ ຫົວໜ້າຄະນະພົວພັນຕ່າງປະເທດສູນກາງພັກ, ພ້ອມດ້ວຍຄະນະ ຍັງໄດ້ມອບເຄື່ອງຄອມພິວເຕີຕັ້ງໂຕະ ຈຳນວນໜື່ງຊຸດ, ພ້ອມດຽວກັນນັ້ນ ທັງສອງຝ່າຍກໍໄດ້ມອບເຄື່ອງທີ່ລະນຶກໃຫ້ກັນ ແລະ ກັນນຳອີກ.