ທ່ານ ນາງ ຣີນາ ບິດເຕີ ເອກອັກຄະລັດຖະທູດ ສະຫາລັດອາເມລິກາ ປະຈຳສາທາລະນະລັດ ປະຊາຊົນລາວ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງ ສາລະວັນ.

ໃນວັນທີ 27 ກຸມພາ 2018 ທີ່​ຜ່ານ​ມາ​ນີ້​, ທ່ານ ນາງ ຣີນາ ບິດເຕີ ​ເອກ​ອັກຄະ​ລັດຖະທູດ ສະຫະ​ລັດ​ອາ​ເມ​ລິ​ກາ​ປະຈຳ​ສາທາລະນະ​ລັດ ປະຊາຊົນ​ລາວ ພ້ອມ​ດ້ວຍ​ຄະນະ ​ໄດ້​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ​ຢູ່​ແຂວງ​ສາລະ​ວັນ ​ແລະ ​ໃນ​ໂອກາດ​ເຄື່ອນ​ໄຫວ​ຢ້ຽມຢາມ​ຄັ້ງນີ້, ກໍ​ໄດ້​ເຂົ້າຢ້ຽມ​ຂໍາ​ນັບ ທ່ານ ສີສຸວັນ ວົງຈອມສີ ກຳມະການ​ສູນ​ກາງ​ພັກ, ​ເລຂາ​ພັກ – ​ເຈົ້າ​ແຂວງໆ ສາລະ​ວັນ ​ເຊິ່ງທ່ານ ​ເຈົ້າ​ແຂວງໆ ສາລະ​ວັນ ກໍໄດ້ສະແດງຄວາມຍີນດີຕ້ອນຮັບ ແລະ ສະ​ແດງ​ຄວາມ​ຂອບ​ອົກ​ຂອບ​ໃຈ ຕໍ່ຄະນະຜູ້ແທນເອກອັກຄະລັດຖະທູດ ສະຫາລັດອາເມລິກາ ທີ່​ໄດ້​ປະກອບ ສ່ວນຊ່ວຍເຫຼືອທາງດ້ານທືນຮອນເຂົ້າໃນການ​ສ້າງ​ໂຮງໝໍ ​ແລະ ສຸກສາລາ ຢູ່ເມືອງຕຸ້ມລານ ​ແລະ ​ເມືອງສະໝ້ວຍ.

ໃນຕອນ​ບ່າຍ​ຂອງ​ວັນ​ດຽວ​ກັນ ທ່ານ ນາງ ຣີນາ ບິດເຕີ, ເອກອັກຄະລັດຖະທູດ ສະຫາລັດອາເມລິກາ ພ້ອມ​ຄະນະ ກໍໄດ້​ເດີນທາງ​ໄປຮ່ວມພິທີມອບ – ຮັບໂຮງໝໍ ແລະ ສຸກສາລາ ຢູ່​ເມືອງ​ຕຸ້ມ​ລານ ​ແລະ ​ເມືອງ​ສະ​ໝ້ວຍ​ຕາມ​ລຳດັບ, ​ເຊິ່ງກໍ​ໄດ້​ຮັບ​ການ​ຕ້ອນຮັບ​ຈາກ ຄະນະ​ພັກ, ອົງການ​ປົກຄອງ​ເມືອງ​​​ເປັນ​ຢ່າງ​ດີ. ​ເຊິ່ງ​ໂຮງໝໍ ​ແລະ ສຸກສາລາ​ທີ່​ໄດ້​ມອບ – ຮັບ​ຄັ້ງນີ້ ອົງການປົກຄອງເມືອງຈະ​ໄດ້​ສືບຕໍ່ປະກອບ​ບຸກຄະລາ​ກອນ ​ແລະ ອຸປະ​ກອນ​ຮັບ​ໃຊ້ ​​ເພື່ອ​​ໃຫ້​ໄດ້​ເປີດ​ນຳ​ໃຊ້ ​ແລະ ​ປິ່ນປົວ​ຄົນ​ເຈັບ​ໃນໄວໆ ນີ້.