ທ່ານເລຂາພັກ – ເຈົ້າແຂວງໆ ສາລະວັນ ໂອ້ລົມພະນັກງານ – ລັດຖະກອນ ຂອງຫ້ອງວ່າການປົກຄອງແຂວງ ແລະ ຫ້ອງການໃນສັງກັດຂອງຫ້ອງວ່າການປົກຄອງແຂວງສາລະວັນ.

ໃນ​ຕອນ​ບ່າຍ​ ຂອງ​ວັນ​ທີ 12 ມັງກອນ 2018, ທີ່​ຫ້ອງ​ປະຊຸມຊັ້ນສອງຂອງ​ສະ​ໂມ​ສອນ​ໃຫ່ຍແຂວງ​ສາລະ​ວັນ, ​ ທ່ານ ສີສຸວັນ ວົງຈອມສີ ກໍາມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ ​ໄດ້​ໃຫ້​ກຽດ​ມີ​ຄຳ​ເຫັນ​ໂອ້​ລົມ​ຕໍ່​ພະນັກງານ, ລັດຖະກອນ​ຂອງ​ຫ້ອງ​ວ່າການ​ປົກ​ຄອງ​ແຂວງ​ ​ແລະ ຫ້ອງ​ການ​ໃນ​ສັງກັດໃນ​ຮອບ 1 ປີກ​ວ່າ​,​ເຂົ້າຮ່ວມ​ຮັບ​ຟັງ​ການໂອ້ລົມໃນ​ຄັ້ງນີ້​ນຳພາ​ໂດຍ: ທ່ານ ປອ ສະ​ໄໝ ​ໂພທິ​ສານ ກຳມະການ​ພັກ​ແຂວງ, ຫົວໜ້າຫ້ອງວ່າການປົກຄອງແຂວງ, ພ້ອມ​ດ້ວຍຄະນະຫ້ອງ, ຫົວໜ້າຂະແໜງ – ຮອງຂະແໜງ, ພະນັກງານ – ລັດຖະກອນ​ສົມບູນຂອງ​ຫ້ອງ​ວ່າການ​ປົກຄອງ​ແຂວງ ​ແລະ ຫ້ອງການທີ່ສັງກັດຫ້ອງວ່າການປົກແຂວງສາລະວັນເຂົ້າຮ່ວມທັງ​ໝົດ 60 ທ່ານ, ຍິງ 19 ທ່ານ.

​​ການໂອ້ລົມຂອງທ່ານ ເລຂາ​ພັກ – ເຈົ້າແຂວງ ສາລະວັນ ​ໃນ​ຄັ້ງນີ້, ພື້ນຖານ​ທ່ານ​ກໍໄດ້​ຊົມ​ເຊີຍ​ຕໍ່​ຄວາມ​ບຸກບືນ, ສູ້​ຊົນ​ປະຕິບັດ​ພາລະ​ບົດບາດ​ໃນ​ການ​ເປັນ​ເສນາ​ທິການ​ຂອງ​ຫ້ອງ​ວ່າການ​ປົກຄອງ​ແຂວງ ພາຍ​ໃຕ້​ການ​ນຳພາ​ຂອງ​ຫົວໜ້າ​ຫ້ອງ, ຄະນະ​ຫ້ອງ, ຫົວໜ້າ​ຂະ​ແໜງ – ຮອງ ​ແລະ ພະນັກງານ​ທຸກ​ຄົນ ທີ່​ໄດ້​ສ້າ​ງ​ເງື່ອນ​ໄຂ​ອຳນວຍ​ຄວາມ​ສະ​ດວກ​ໃຫ້​ແກ່​ການ​ເຄື່ອນ​ໄຫວ​ຂອງ​ການ​ນຳ ​ໃນ​​ໄລຍະ​ຜ່ານ​ມາ, ​ແຕ່​ວຽກ​ງານ​ຂອງ​ຫ້ອງ​ວ່າການ​ປົກຄອງ​ແຂວງ​ເປັນວຽກທີ່ມີ​ຄວາມສໍາຄັນ ແລະ ຫຍຸ້ງຍາກ​ເພາະ​ມັນ​ຕັດສິນ​ຊີ້​ຂາດຂອງ​ການ​ນຳພາ​ຂອງ​ຄະນະ​ພັກ – ການ​ນຳ​ຂັ້ນ​ແຂວງ, ​ ທີ່​ຜ່ານ​ມາ​ຫ້ອງ​ວ່າການ​ກໍ​ເຮັດ​ໄດ້​ດີ ​ແຕ່ໃນຕໍ່ໜ້າຕ້ອງໄດ້ສືບຕໍ່ເອົາໃຈໃສ່ການປະຕິບັດ​ພາລະ​ບົດບາດການ​ເປັນເສນາທິການ​ໃຫ້​ແກ່ການນຳໃຫ້ເຂັ້ມແຂງ ແລະ ດີຂຶ້ນກວ່າເກົ່າ, ໂດຍສະເພາະບຸກຄະລາກອນ ກໍຄືພະນັກງານຂອງ​ຫ້ອງ​ວ່າການ​ປົກຄອງ​ແຂວງ​ຕ້ອງ​​ໄດ້ຝຶກຝົນຫຼໍ່ຫຼອມຕົນເອງໃຫ້ກາຍເປັນ​ບຸກຄົນ​ທີ່​ມີ​ຄວາມ​ຮູ້ – ມີ​ຄວາມ​ສາມາດ – ມີ​ຄວາມ​ອົດທົນ, ມີ​ຄວາມ​ເຂົ້າ​ໃຈ​ວຽກ, ມີ​ວຸດ​ທິບັດ ​ແລະ ຮັກສາ​ໄດ້​ຄວາມ​ລັບ. ຈັດຕັ້ງໃຫ້ມີການຝຶກອົບຮົມອົບຮົມ, ຖອດຖອນບົດຮຽນເປັນແຕ່ລະໄລຍະ ແລະ ທັດສະນະສຶກສາທັງພາຍໃນ ແລະ ຕ່າງປະເທດ. ບັນດາຫ້ອງການທີ່ສັງກັດຫ້ອງວ່າການປົກຄອງແຂວງ ກໍ​ຕ້ອງ​ໄດ້​ເອົາ​ໃຈ​ໃສ່​ເບິ່ງ​ຄືນ​ພາລະ​ບົດບາດຂອງ​ຕົນ ​ແລະ ​ເຮັດ​ໃຫ້​ໄດ້​ດີ​ຂຶ້ນ​ກວ່າ​ເກົ່າ, ສຳຄັນ​ແມ່ນ​ການສຶກສາອົບວຽກ​ງານ​ການ​ເມືອງ​ແນວ​ຄິດ​ໃຫ້​ແກ່​ພະນັກງານ, ສະມາຊິກ​ພັກ​​ໃນ​ຂອບ​ເຂດ​ຄວາມ​ຮັບຜິດຊອບ, ມີຄວາມສາມັກຄີ – ​ເປັນ​ເອກະ​ພາບ​ໃນ​ໝູ່​ຄະນະ​  ​ເພື່ອເພີ່ມ​ທະວີ​ຄວາມ​ຮັບຜິດຊອບ ແລະ ​ເຮັດ​ສຳ​ເລັດໜ້າທີ່ວຽກງານທີ່​ຖືກ​ມອບໝາຍ.