ຍົກລະດັບດ່ານທ້ອງຖີ່ນຂື້ນເປັນດ່ານສາກົນລະໄລ ສາລະວັນ-ກວ່າງຈິ

ວັນທີ 25 ມິຖຸນາ 2014. ຢູ່ທີ່ດ່ານລະໄລ ເມືອງສະໝ້ວຍ ແຂວງສາລະວັນ, ໄດ້ຈັດພິທີການຍົກລະດັບດ່ານທ້ອງຖີ່ນໃຫ້ເປັນດ່ານສາ ກົນລະໄລ ( ສາລະວັນ-ກວ່າງຈິ) ຂື້ນຢ່າງເປັນທາງການ.ໂດຍການໃຫ້ກຽດເປັນປະທານຮ່ວມຂອງ ທ່ານ ທອງລຸນ ສີສຸລິດ, ກົມການເມືອງສູນກາງພັກ, ຮອງນາຍຍົກລັດຖະມົນຕີ ລັດຖະມົນ ຕີວ່າການກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ຟາມບິ່ງມີງ, ກົມການເມືອງສູນກາງພັກ, ຮອງນາຍຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດແຫ່ງ ສສ. ຫວຽດນາມເຊີ່ງມີເຈົ້າແຂວງສາລະວັນ ແລະ ເຈົ້າແຂວງກວ່າງຈິ ພ້ອມທັງ ບັນດາການນຳທັງສອງແຂວງ, ການນຳຈາກສູນກາງ, ວິຊາການຈາກຂະແໜງການທີ່ກ່ຽວຂ້ອງ ບັນດາແຂກທີ່ຖຶກເຊີນ, ຕະຫຼອດຮອດ ພໍ່ແມ່ປະຊາຊົນທີ່ອາໄສຢູ່ບໍລິເວນໃຫ້ຄຽງເຂົ້າຮ່ວມຢ່າງພ້ອມພຽງ.
ໃນພິທີອັນສະຫງ່າລາສີ ແລະ ເປັນປະຫວັດສາດນີ້, ປະທານຮ່ວມ ແລະ ການນຳຂອງສອງແຂວງ ໄດ້ຜັດປ່ຽນກັນຂື້ນກ່າວຄຳປາໄສ ແລະ ຕັດແຖບຜ້າເປີດດ່ານສາກົນລະໄລ ເຊີ່ງໃນນັ້ນ: ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ໄດ້ກ່າວຄຳປາໄສ ອັນມີ ເນື້ອ ໃນບາງຕອນທີ່ສຳຄັນວ່າ: ພາຍຫຼັງສຳເລັດການປັກຫຼັກໝາຍຖີ່ ແລະ ບູລະນະລະບົບຫຼັກໝາຍຊາຍແດນ ລາວ-ຫວຽດ ນາມ ເພື່ອເຮັດໃຫ້ເສັ້ນຊາຍແດນຂອງສອງປະເທດມີຄວາມຈະແຈ້ງ ແລະ ຊັດເຈນຕະຫຼອດການ, ເປັນເສັ້ນຊາຍແດນ ແຫ່ງສັນຕິພາບ, ມິດຕະພາບ ແລະ ການຮ່ວມມື ເພື່ອຄວາມສົມບູນພູນສຸກ ແລະ ເປັນມໍລະດົກອັນລ້ຳຄ່າໃຫ້ບັນດາອະ ນຸຊົນຮຸ້ນຫຼັງຂອງສອງປະເທດໄດ້ສຶບທອດຕໍ່ໄປ. ຄຽງຄູ່ກັນນັ້ນ, ການທີ່ສອງປະເທດໄດ້ຮ່ວມກັນສ້າງສາພັດທະນາຊາຍ ແດນນຳກັນ ກໍ່ເພື່ອແນໃສ່ຄວາມສົມບູນພູນສຸກ.,ການຍົກລະດັບດ່ານລະໄລຂື້ນເປັນດ່ານສາກົນນີ້ ຈະເປັນການຊຸກຍູ້ໃຫ້ ແກ່ການພັດທະນາເສດຖະກິດ-ສັງຄົມ ລະຫວ່າງ ແຂວງສາລະວັນ-ແຂວງກວ່າງຈິ ໃຫ້ມີການຂະຫຍາຍຕົວຂື້ນກວ່າເກົ່າ ແລະ ຍັງປະກອບສ່ວນເຂົ້າໃນການນຳຜົນປະໂຫຍດມາສູ່ສອງປະເທດຫຼາຍສົມຄວນໃນການສົ່ງເສີມມູນຄ່າການຄ້າ ຕາມບໍລິເວນຊາຍແດນເຊີ່ງມີເຖີງ 900 ລ້ານໂດລາໃນປີຜ່ານມາ, ພ້ອມດຽວກັນ ກໍ່ເປັນການສ້າງເງື່ອນໄຂໃຫ້ເປັນເສັ້ນ ທາງໜື່ງທີ່ສໍາຄັນໃຫ້ແກ່ການເຊື່ອມເສດຖະກິດໃນພູມີພາກນີ້, ໃນໂອກາດນີ້, ທ່ານ ທອງລຸນ ສີສຸລິດ ຮອງນາຍົກ ກໍ່ໄດ້ສະ ແດງຄວາມຊົມເຊີຍມາຍັງຄະນະກຳມະການຊາຍແດນແຫ່ງຊາດລາວ-ຫວຽດນາມ, ການນຳແຂວງສາລະວັນ, ແຂວງກວ່າງຈິ, ຕະ ຫຼອດເຖີງພໍ່ແມ່ພີ່ນ້ອງ ແລະ ປະຊາຊົນບັນດາເຜົ່າຂອງສອງປະເທດທີ່ໄດ້ປະກອບສ່ວນເຂົ້າໃນການສ້າງສາພັດທະນາ ແລະ ຮ່ວມ ມື ຊ່ວຍເຫຼືອເຊີ່ງກັນ ແລະ ກັນຕະຫຼອດມາ ໃນການເຮັດໃຫ້ຊາຍແດນດັ່ງກ່າວນີ້ເປັນຊາຍແດນແຫ່ງສັນຕິພາບ, ມິດຕະພາບ ແລະ ການ ຮ່ວມມືຢ່າງແທ້ຈິງ.
ດ່ານສາກົນລະໄລເປັນດ່ານທຳອິດຂອງແຂວງສາລະວັນ ແລະ ເປັນດ່ານສາກົນອັນດັບທີ 8 ຂອງ ສປປ ລາວ ທີ່ເຊື່ອມຈອດກັບ ສສ. ຫວຽດນາມ. ມາຮອດປັດຈຸບັນ ສປປ ລາວ ມີດ່ານສາກົນທັງໝົດໃນທົ່ວປະເທດຈຳນວນ 25 ແຫ່ງ, ເຊີ່ງໃນນີ້ເຊື່ອມຈອດກັບ ສສ ຫວຽດນາມ 8 ແຫ່ງ, ສປ ຈີນ 2 ແຫ່ງ, ກຳປູເຈຍ 1 ແຫ່ງ, ລາຊະອານາຈັກໄທ 10 ແຫ່ງ ແລະ ດ່ານສະໝາມບິນສາກົນ 4 ແຫ່ງ.
ດ່ານສາກົນລະໄລນີ້ ຕັ້ງຢູ່ຍຸດທະສາດອັນສຳຄັນຂອງເສັ້ນທາງ 15 A ທີ່ເຊື່ອມຕໍ່ຊາຍແດນ ລາວ- ຫວຽດນາມ ຫາເທດສະບານແຂວງ ສາລະວັນທີ່ມີຄວາມຍາວ 147 ກິໂລແມັດ ແລະ ມີເສັ້ນທາງ 15 B ເຊື່ອມຕໍ່ຈາກເທດສະບານແຂວງອີກ 75 ກິໂລແມັດ ໄປຈອດ ໃສ່ເສັ້ນທາງເລກທີ 13 ໃຕ້ ທີ່ບ້ານນາປົ່ງ.
ດ່ານຊາຍແດນສາກົນ ລະໄລ ຍັງຈະກາຍເປັນດ່ານທີ່ໄດ້ຮັບໃຊ້ໃຫ້ແກ່ແຜນພັດທະນາເສດຖະກິດ-ສັງຄົມຂອງລາວແລະເສດຖະກິດຕາ ເວັນອອກ-ຕາເວັນຕົກແລະ ຕິດຈອດກັບບັນດາປະເທດເພື່ອນບ້ານ, ຊຶ່ງທັງໝົດນີ້ໄດ້ສ້າງຜົນດີໃຫ້ການເຊື່ອມໂຍງຂອງອາຊຽນເຊີ່ງຈະ ກາຍເປັນສະມາຄົມອາຊຽນໃນປີ 2015. ເພື່ອແນໃສ່ຕໍ່ການອຳນວຍຄວາມສະດວກການໄປມາຫາສູ່ກັນ ກໍ່ເພື່ອເພີ່ມທະວີການຄ້າຂາຍ ຮ່ວມກັນ ແລະ ສົ່ງເສີມການທ່ອງທ່ຽວຂອງສອງຊາດອີກດ້ວຍ ພ້ອມນັ້ນ, ດ່ານສາກົນລະໄລນີ້ຍັງອາດສາມາດທີ່ຈະກ້າວໄປສູ່ເປັນ ດ່ານສາກົນກວດກາເຂົ້າ-ອອກ ຜ່ານປະຕູດຽວ ໃນເວລານັ້ນ, ແຂວງສາລະວັນ ແລະ ແຂວງກວ່າງຈິ ຍິ່ງຈະມີທ່າແຮງສູງໃນການສ້າງ ສາພັດທະນາເຂດແຄວ້ນ. ພ້ອມກັບໂຄງການເຊື່ອມໂຍງຂອງພູມມິພາກ ແລະ ສາກົນອື່ນໆອີກດ້ວຍ.