ຄະນະພັກຮາກຖານຫ້ອງວ່າການແຂວງ ເປີດກອງຄົບຄະນະ ເພື່ອສະຫຼຸບ 3 ເດືອນ (4-5-6 )ປີ 2018 ແລະ ວາງທິດທາງໃນຕໍ່ໜ້າ.

ໃນຕອນເຊົ້າຂອງວັນທີ 1 ສິງຫາ 2018 ນີ້.  ທີ່ຫ້ອງ​ເຮັດ​ວຽກ​ຂອງ​ທ່ານ ຫົວໜ້າ​ຫ້ອງ​ວ່າການ​ແຂວງ. ​ໄດ້​ເປີດ​ກອງ​ປະຊຸມ​ຄົບ​ຄະນະ​ພັກ​ຮາກ​ຖານ​ຫ້ອງ​ວ່າການ​ແຂວງ​ຂຶ້ນ ​ໂດຍ​ພາຍ​ໃຕ້​ການ​ເປັນປະ ທານຂອງ ສະຫາຍ ປອ ສະ​ໄໝ ​ໂພທິ​ສານ ກໍາມະການ​ພັກ​ແຂວງ, ​ເລຂາ​ຄະນະ​ພັກ​ຮາກ​ຖານ​, ຫົວໜ້າ​ຫ້ອງ​ວ່າການ​ແຂວງ, ມີບັນດາສະຫາຍ​ຄະນະ​ພັກຮາກ​ຖານ, ​ຄະນະ​ໜ່ວຍ​ພັກທີ່​ຂຶ້ນ​ກັບ​ເຂົ້າຮ່ວມ ຈຳ ນວນ 11 ສະຫາຍ, ຍິງ 1 ສະຫາຍ.

ກອງ​ປະຊຸມ​ຄັ້ງນີ້ ​ໄດ້​ສະຫຼຸບ​ຕີ​ລາ​ຄື​ນກາ​ນນຳ​​ພາໃນ 3 ​ເດືອນ​ຜ່ານ​ມາ ພາຍຫຼັງ​ສຳ​ເລັດ​ກອງ​ປະຊຸມ​ເຄິ່ງສະ​ໄໝ​ຂອງ​ຄະນະ​ພັກ​ຮາກ​ຖານຫ້ອງ​ວ່າການ ​ເຊິ່ງ​ໄດ້​ຕີ​ລາຄາ​ວ່າ: ທົ່ວ​ຄະນະ​ພັກ​ຍັງມີ​ຄວາມ​ສະຫງົບ​ໂດຍ​ພື້ນຖານ, ຫ້ອງການ, ຂະ​ແໜງ​ທີ່​ຂຶ້ນ​ກັບ​ໄດ້​ເຄື່ອນ​ໄຫວ​ຕາມ​ພາລະ​ບົດບາດ​ຂອງ​ຕົນ ​ແລະ ມີ​ຜົນສຳ​ເລັດ. ​ແຕ່​ຄຽງ​ຄູ່​ກັນນັ້ນ, ກໍ​ຍັງ​ມີ​ບາງ​ດ້ານ​ທີ່​ຍັງ​ຄົງ​ຄ້າງ ​ໂດຍ​ສະ​ເພາະ​ການ​ປະຕິບັດລະບຽບ​ກົດໝາຍ​ລັດຖະກອນ​ຂອງ​ພະນັກງານ, ສະມາຊິກ​ພັກ​ຈຳນວນ​ໜຶ່ງ ທີ່​ຍັງ​ບໍ່​ທັນ​ເປັນ​ແບບຢ່າງ​ເທົ່າ​ທີ່​ຄວນ.ພ້ອມ​ທັງ​ວາງ​ທິດ​ທາງ​ແຜນການ​ໃນ​ຕໍ່ໜ້າ​ຢ່າງ​ສອດຄ່ອງ. ​ໃນ​ໂອກາດ​ນີ້ ກອງ​ປະຊຸມ ຍັງ​ໄດ້​ເຜີຍແຜ່​ຄຳ​ສັ່ງ​ຂອງ​ຄະນະ​ປະຈຳ​ພັກ​ແຂວງ ສະ​ບັບ​ເລກທີ 02/ຄຈພຂ.ສວ, ລົງ​ວັນ​ທີ 5/7/2018 ວ່າ​ດ້ວຍ: ການ​ກະກຽມ​ດຳ​ເນີນ​ກອງ​ປະຊຸມ​ໃຫ່ຍ 3 ຂັ້ນຂອງ​ພັກ ​ແລະ ຂໍ້​ຕົກລົງ​​ເລກທີ 153/ຄຈພຂ.ສວ, ລົງ​ວັນ​ທີ 5/7/2018 ວ່າ​ດ້ວຍ: ​ແຜນດຳ​ເນີນ​ກອງ​ປະຊຸມ​ໃຫ່ຍຂອງ​ຄະນະ​ພັກ​ແຕ່ລະ​ຂັ້ນ. ​ເຊິ່ງກອງ​ປະຊຸມ​ຄົບ​ຄະນະ​ພັກ​ຮາກ​ຖານ​ຫ້ອງ​ວ່າການ​ແຂວງ​ເທື່ອ​ນີ້ ​ໄດ້​ກາຍ​ເປັນ​ຂະ​ບວນການໜຶ່ງ​ໃນຂະ​ບວນ​ການ​ຂໍາ​ນັບ​ຮັບ​ຕ້ອນ​ກອງ​ປະຊຸມ​ໃຫ່ຍ 3 ຂັ້ນຂອງ​ພັກ ທີ່​ຈະ​ມາ​ເຖິງ​ໃນ​ມໍ່ໆ​ນີ້.