ຄະນະບໍລິຫານງານສະຫະພັນແມ່ຍິງແຂວງສາລະວັນ ສຳເລັດກອງປະຊຸມໃຫຍ່ ຄັ້ງທີ V

ລະຫວ່າງ​ວັນ​ທີ 11-12 ພຶດສະພາ 2015 ນີ້ ຄະນະ​ບໍລິຫານ​ງານ​ສະຫະພັນ​ແມ່ຍິງ​ແຂວງ​ສາລະ​ວັນ ​ໄດ້​ດຳ​ເນີນ​ກອງ​ປະ ຊຸມ​ໃຫຍ່​ຜູ້​ແທນ​ຄັ້ງ​ທີ V ຂຶ້ນຢ່າງເປັນທາງການ ຢູ່ທີ່ສະໂມສອນ ເມືອງສາລະວັນ. ພາຍໃຕ້ການເປັນປະທານຂອງ ສະ ຫາຍ ບົວສີ ຄ່ຽມມະນີຂັນໄຊ ຮອງເລຂາພັກແຂວງ, ປະທານແນວລາວສ້າງຊາດແຂວງ ທັງແມ່ນຜູ້ຊີ້ນຳວຽກງານອົງການຈັດຕັ້ງມະຫາຊົນ ແລະ ສະຫາຍ ນາງ ບັນດິດ ປະທຸມວັນຮອງປະທານສູນກາງສະຫະພັນແມ່ຍິງລາວ, ສະຫາຍ ນາງ ບຸນທະວີ ດວງລາສີ ກຳມະການພັກແຂວງປະທານຄະນະບໍລິຫານງານສະຫະພັນແມ່ຍິງ ແຂວງ. ກອງປະຊຸມຄັ້ງນີ້ມີຜູ້ ເຂົ້າຮ່ວມ ຈຳນວນ 220 ສະຫາຍ, ຍິງ 199 ສະຫາຍ. ໃນນັ້ນ; ແຂກຖືກເຊີນ 37 ສະຫາຍ ຊາຍ 21 ສະຫາຍ, ຜູ້ແທນສົມບູນ 183 ສະຫາຍ ເຊິ່ງເປັນຕົວ ແທນໃຫ້ແກ່ສະມາຊິກສະຫະພັນແມ່ຍິງໃນທົ່ວແຂວງ ຈຳນວນ 44.442 ສະຫາຍ.

ກອງປະຊຸມໄດ້ຮັບຟັງລາຍງານການເມືອງ ເຊິ່ງສະເໜີໂດຍ ສະຫາຍ ນາງ ບຸນທະວີ ດວງລາສີ. ເຊິ່ງຄະນະບໍລິ ຫານງານສະຫະພັນແມ່ຍິງແຂວງກໍ່ໄດ້ເອົາໃຈໃສ່ຜັນຂະຫຍາຍ ແລະ ຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ IV ຂອງຕົນໄດ້ຮັບຜົນສຳເລັດຫຼາຍດ້ານ. ນອກຈາກນັ້ນ,​ ກໍ່ຍັງໄດ້ຈັດຕັ້ງປະຕິບັດວຽກງານ 3 ສ້າງຂອງພັກ, 7 ແຜນງານຂອງລັດຖະ ບານ, 9 ເປົ້າໝາຍ ສະຫັດສະວັດ, 6 ແຜນ ງານ 32 ໂຄງການຂອງຄະນະບໍລິຫານງານສະຫະພັນແມ່ຍິງ ແລະ 5 ແຜນງານ 17 ໂຄງການຂອງສະຫະພັນແມ່ຍິງແຂວງວາງອອກ. ເຊິ່ງໄດ້ສ້າງຄວາມເຊື່ອໝັ້ນ ໃຫ້ຖັນແຖວພະນັກງານ, ສະມາ ຊິກພັກ, ພໍ່ແມ່ປະຊາຊົນ ໂດຍສະເພາະ ແມ່ນອົງການຈັດຕັ້ງແມ່ຍິງແຕ່ລະຂັ້ນ. ເພາະວ່າຍາມໃດຄະນະສະຫະພັນແມ່ ຍິງແຂວງ ກໍ່ໄດ້ຖືສຳຄັນວຽກງານສຶກສາ ອົບຮົມການເມືອງ-ແນວຄິດໃຫ້ຖັນແຖວພະນັກງານສະມາ ຊິກສະຫະພັນແມ່ ຍິງ, ແມ່ຍິງບັນດາເຜົ່າ ດ້ວຍຫຼາຍຮູບແບບທີ່ ​ເຫັນ​ວ່າ​ມີຄວາມສອດຄ່ອງ ແລະ ເໝາະສົມກັບແຕ່ລະກຸ່ມເປົ້າ ໝາຍ; ​ເອົາ​ໃຈ​ໃສ່ໂຄສະນາເຜີຍແຜ່ຂໍ້ມູນຂ່າວສານ ລວມທັງສາລະໜ້າຮູ້ຕ່າງໆ ໃຫ້​ແກ່ເອື້ອຍນ້ອງແມ່ຍິງແຕ່ລະຂັ້ນຢ່າງທົ່ວເຖິງ; ເອົາໃຈໃສ່ປັບປຸງກົງຈັກການຈັດຕັ້ງ ໃຫ້ມີຄວາມໜັກແໜ້ນ ເຂັ້ມແຂງ ໂດຍປະສານສົມທົບກັບອຳນາດການປົກຄອງຂອງແຂວງ, ຂອງເມືອງ, ຂະແໜງການທີ່ກ່ຽວຂ້ອງໃນການຈັດວາງ ສັບຊ້ອນ ແຕ່ງຕັ້ງ ແລະ ກຳນົດຕຳແໜ່ງງານ ຂຶ້ນແຜນກຳນົດ ພະນັກງານນຳພາຄຸ້ມຄອງຂັ້ນແຂວງ, ຕີລາຄາປະເພດພະນັກງານ ເພື່ອຍ້ອງຍໍສັນລະເສີນ ແລະ ຂະຫຍາຍເຂົ້າອົງການຈັດຕັ້ງຕ່າງໆ. ພ້ອມກັນນັ້ນ ກໍ່ຍັງໄດ້ຈັດສົ່ງໄປຍົກລະດັບທາງດ້ານ ທິດສະດີ ແລະ ວິຊາສະເພາະຢູ່ພາຍໃນ ແລະ ຕ່າງປະເທດຢ່າງເປັນປົກະຕິ; ໄດ້ປະສານສົມທົບກັບຄະນະພັກ-ອຳນາດການປົກຄອງທີ່ຂຶ້ນກັບ ແລະ ພາກສ່ວນທີກ່ຽວຂ້ອງໃນການໄກ່ເກ່ຍ, ແກ້ໄຂບັນຫາຕ່າງໆ ເພື່ອປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ; ເອົາໃຈໃສ່ຊີ້ນຳຄອບຄົວແມ່ຍິງໃນການພັດທະນາຄອບຄົວໃຫ້ມີຢູ່ມີກິນ, ມີເຮືອນຢູ່, ມີອາຊີບ ຄົງທີ່, ມີລາຍຮັບທີ່ໝັ້ນຄົງ; ໄດ້ເຜີຍແຜ່ເນື້ອໃນຂໍ້ແຂ່ງຂັນ < 3 ດີ > ຕິດພັນກັບເນື້ອໃນຂໍ້ແຂ່ງຂັນ < ຮັກຊາດ ແລະ ພັດທະນາ > ຕິດພັນກັບວຽກງານ 3 ສ້າງ ຢ່າງເປັນຂະບວນການ ກວ້າງຂວາງ; ​ເອົາ​ໃຈ​ໃສ່ປຸກລະດົມເອື້ອຍນ້ອງແມ່ຍິງບັນດາເຜົ່າເຂົ້າຮ່ວມ​ເປັນ​ສ່ວນໜຶ່ງ ຕໍ່​ກັບວຽກງານປ້ອງກັນຊາດ -ປ້ອງກັນຄວາມສະຫງົບທົ່ວ​ປວງ​ຊົນຮອບດ້ານ ສະ​ແດງ​ອອກ​ໃນ​ການ​ສຶກສາ​ອົບຮົມ​ໃຫ້​ເຂົາ​ເຈົ້າ​ມີ​ສະຕິ​ລະວັງ​ຕົວ ຕໍ່​ກົນ ອຸບາຍ​ຫັນປ່ຽນ​ໂດຍ​ສັນຕິ​ຂອງ​ກຸ່ມ​ຄົນ​ບໍ່​ດີ, ປຸກລະດົມ​ຄອບຄົວລູກ – ຫຼານ ປະກອບສ່ວນ​ເຂົ້າ​ເປັນ​ທະຫານ​ພັນທະ, ​ເປັນ​ກຳລັງ​ປ້ອງ​ກັນ​ຄວາມ​ສະຫງົບ – ​ເປັນ​ກອງຫຼອນ ຮັບ​ໃຊ້​ປະ​ເທດ​ຊາດ ​ແລະ ປະຊາຊົນ; ປຸກລະດົມ​ເອື້ອຍ​ນ້ອງ​ແມ່ຍິງ​ບັນດາ​ເຜົ່າ​ເປັນ​ເຈົ້າ​ການ​ໃນ​ການ​ອະນຸລັກ, ປົກ​ປັກ​ຮັກສາ ​ແລະ ​ເສີມ​ຂະຫຍາຍ​ມູນ​ເຊື້ອ​ວັດທະນະທຳ, ຮີດຄອງ​ປະ​ເພນີ​ອັນ​ດີງາມຂອງ​ຊາດ – ຂອງ​ເຜົ່າ​ໄວ້​ໃຫ້ໝັ້ນຄົງ. ນອກ​ຈາ​ກນີ້, ຍັງ​ໄດ້​ຊຸກຍູ້​ໃຫ້​ເອື້ອຍ​ນ້ອງ​ແມ່ຍິງ​ທີ່​ເປັນ​ຄູ-ອາຈານ​​ເອົາ​ໃຈ​ໃສ່​ເຊີດ​ຊູ​ບົດບາດ​ແມ່ພິມ​ຂອງ​ຊາດ,​​ເປັນ​ຄູ​ສອນ​ດີ-ສອນ​ເກັ່ງ, ​ເສີມ​ຂະຫຍາຍ​ນ້ຳ​ໃຈ​ຮັກ​ອາຊີບ, ສຸມ​ທຸກ​ສະຕິ​ປັນ ຍາ ຄວາມ​ຮູ້-ຄວາມ​ສາມາດ​ທີ່​ມີ​ເຂົ້າ​ໃນ​ການ​ຄົ້ນຄວ້າ ຂຶ້ນ​ຫ້ອງ​ສິດສອນ​ເຮັດ​ໃຫ້ການ​ສອບ​ເສັງ​ເລື່ອນ​ຂັ້ນ-​ເລື່ອນ​ຊັ້ນ ​ບັນລຸ​ຕາມ​ລະ ດັບ​ຄາດໝາຍ; ​ເປັນ​ເຈົ້າ​ການ​ປະສານ​ສົມທົບ​ກັບ​ຂະ​​ແໜງ​ແມ່ ​ແລະ ​ເດັກ ​ເພື່ອ​ໂຄສະນາ​ສຸຂະ​ສຶກສາ​ໃຫ້​ແກ່​ແມ່ຍິງ​ໃນ​ການ​ດຳລົງ​ຊີວິດ ຕາມ​ຫຼັກການອະນາ​ໄມ 3 ສະອາດ, ສຸ​ຂະພາບ​ຈະ​ເລີ​ນພັນ​ມີ​ໂພ​ສະນາ​ການ​ທີ່​ຖືກຕ້ອງ ​ແລະ ຫຼຸດຜ່ອນ​ແນວ​ຄິດ​ເຊື່ອ​ຖື​ງົມງວາຍ, ປຸກລະດົມ​ໃຫ້​ແມ່ຍິງ​ເອົາ​ໃຈ​ໃສ່​ຮັກສາ​ສຸຂະພາບ​ແມ່ ​ແລະ​ ລູກ. ​ໃນ​ນັ້ນ, ສຳ ຄັນ​ແມ່ນ​ປຸກລະດົມ​ແມ່ຍິງ​ຖືພາ​ໄປ​ຝາກ​ທ້ອງ ​ແລະ ​ເກີດ​ລູກ​ຢູ່​ໂຮງໝໍ ຫຼື ສຸກສາລາ, ນຳ​ເອົາ​ລູກຫຼານ​ໄປ​ຢອດ​ຢາ-ສັກ​ຢາ​ກັນ​ພະຍາດ​ໃຫ້​ຄົບ​ຖ້ວນ ​ແລະ ຖືກ​ຕາມ​ກຳນົດ​ເວລາ ​ເພື່ອຫຼຸດຜ່ອນ​ການ​ຕາຍ​ຂອງ​ແມ່ ​ແລະ ​ເດັກ.

ກອງ​ປະຊຸມ​ໄດ້​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ສະຫະພັນ​​ແມ່ຍິງ​ແຂວງ​ຊຸດ​ໃໝ່ ​ເຊິ່ງມີ​ຜູ້​ເຂົ້າສະໝັກ​ເລືອກ​ຕັ້ງ​ທັງໝົດ 31 ສະຫາຍ. ຜ່ານ​ການ​ປ່ອນ​ບັດ​ເລືອກ​ຕັ້ງ​ສາມາດ​ເລືອກ​ຄະນະ​ບໍລິຫານ​ງານ​ແມ່ຍິງ​ແຂວງ​ຊຸດ​ໃໝ່​ໄດ້ 27 ສະຫາຍ; ກອງປະຊຸມຄັ້ງປະຖົມມະລຶກ ເລືອກເອົາ ​ສະຫາຍ ນາງ ບຸນ​ທະວີ ດວງ​ລາສີ ​ເປັນ​ປະທານ​ຄະນະ​ບໍລິຫານ​ງານ​ສະຫະພັນ​ແມ່ຍິງ​ແຂວງ​ຄັ້ງ​ທີ VI, ສະຫາຍ ນາງ ດວງ​ມະລາ ສີສະໝຸດ ​ເປັນ​ຮອງ​ປະທານ-ປະທານ​ກວດກາ​ ​ແລະ ສະຫາຍ ນາງ ວາດ​ສະໜາ ​ໂພ​ໄຊ​ຍະ​ວົງ ​ເປັນ​ຮອງ​ປະທານ ແລະ ປ່ອນບັດເລືອກຕັ້ງເອົາຜູ້ແທນສົມ ບູນ 11 ສະຫາຍ, ສຳຮັງ 2 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນສູກາງສະຫະພັນແມ່ຍິງລາວທົ່ວປະເທດ ຄັ້ງທີ VII ທີ່ນະ ຄອນຫຼວງວຽງຈັນ.

ຕອນ​ທ້າຍ, ກອງ​ປະຊຸມ​ຍັງ​ໄດ້​ຮັບ​ຟັງ​ຄຳ​ເຫັນ​ໂອ້​ລົມ​ຈາກ ສະຫາຍ ນາງ ບັນດິດ ປະທຸມ​ວັນ ຮອງ​ປະທານ​ສູນ​ກາງ​ສະຫະພັນ​ແມ່ຍິງ​ລາວ ​ເຊິ່ງສະຫາຍ​ໄດ້​ຕີ​ລາຄາ​ສູງ​ຕໍ່​ຜົນງານ ​ແລະ ​ຊົມ​ເຊີຍ​ຜົນ ສຳ​ເລັດ​ທີ່​ຄະນະ​ບໍລິຫານ​ງານ​ສະຫະພັນ​ແມ່ຍິງ​ແຂວງ​ສາລະ​ວັນ​ຊຸດ​ເກົ່າ (ຊຸດ​ທີ IV) ຍາດ​ມາ​ໄດ້. ນອກຈາກ​ນັ້ນ; ສະຫາຍ​ກໍ່​ຍັງ​ໄດ້​ໂອ້​ລົມ​ຊີ້​ທິດ​ເຍືອງ​ທາງ​ໃຫ້​ຄະນະ​ບໍລິຫານ​ງານ​ສະຫະພັນ​ແມ່ຍິງ​ແຂວງ​ຊຸດ​ໃໝ່ (ຊຸດ​ທີ V) ​ເພື່ອ​ນຳ​ໄປ​ຈັດ​ຕັ້ງ​ປະຕິບັດ ​ແລະ ​ເຜີຍ​ແຜ່​ມະຕິ​ຂອງ​ກອງ​ປະຊຸມ​ຄັ້ງ​ນີ້​ໃຫ້​ເປັນ​ແຜນ​ງານ-​ໂຄງການ​ລະອຽດ​ໃຫ້​ມີ​ຜົນສຳ​ເລັດ​ຕາມ​ລະດັບ​ຄາດໝາຍທີ່​ວາງ​ໄວ້.