ຄະນະບໍລິຫານງານຊາວໜຸ່ມແຂວງສາລະວັນ ສຳເລັດກອງປະຊຸມໃຫຍ່ຜູ້ແທນ ຄັ້ງທີ VI

ກອງປະຊຸມໃຫຍ່ຄັ້ງທີ VI ຂອງຜູ້ແທນຊາວໜຸ່ມແຂວງສາລະວັນໄດ້ໄຂຂຶ້ນຢ່າງເປັນທາງການ ແລະ ດຳເນີນມາເປັນເວລາ 2 ວັນເຕັມ ຄື: ເລີ່ມແຕ່ວັນທີ 13-14 ພຶດສະພາ 2015 ທີ່ສະໂມສອນເມືອງສາລະວັນ. ໃຫ້ກຽດເປັນປະທານກອງປະຊຸມຄັ້ງນີ້ມີສະຫາຍບຸນທຽມແກ້ວໄຊຍະວົງກຳມະການປະຈຳພັກແຂວງ, ປະທານສານປະຊາຊົນແຂວງ ແລະ ສະຫາຍ ດຣ ຄຳຜາ ພີມມະສອນ ຄະນະພັກ, ຮອງ ເລຂາ-ປະທານກວດກາຄະນະບໍລິຫານງານຊາວໜຸ່ມປະຊາຊົນປະຕິວັດລາວ; ມີບັນດາແຂກທີ່ຖືກເຊີນຈາກສູນກາງຊປປລ, ຕ່າງແຂວງ, ກະຊວງແຮກສ່ຽວ, ບັນດາພະແນກການ ອ້ອມຂ້າງ, ບັນດາເມືອງເຂົ້າຮ່ວມຈຳນວນ 254 ສະຫາຍຍິງ 43 ສະຫາຍ; ມີຜູ້ແທນສົມບູນ 167 ສະຫາຍ, ຍິງ 28 ສະຫາຍທີ່ມາຈາກພະແນກການ, ອົງການທຽບ ເທົ່າ 85 ສະຫາຍ; ເມືອງ ທ້ອງຖິ່ນ ແລະ ຮາກຖານບ້ານຈຳນວນ 86 ສະຫາຍ ທີ່ເປັນຕົວແທນໃຫ້ແກ່ຊາວໜຸ່ມທັງໝົດໃນທົ່ວແຂວງຈຳນວນ 20.198 ສະຫາຍ.

ກອງປະຊຸມໄດ້ຮັບຟັງລາຍງານການເມືອງທັງ 2 ພາກຈາກ ສະຫາຍ ຈັນສີລອນ ສີສົມບູນ ຮັກສາການເລຂາຄະນະບໍລິຫານງານຊາວໜຸ່ມແຂວງສາລະວັນ. ເຊິ່ງລາຍງານການເມືອງໄດ້ຕີລາ ຄາສູງ ເຖິງຜົນງານ, ຜົນສຳເລັດຂອງການຈັດຕັ້ງປະຕິບັດແນວທາງມະຕິກອງປະຊຸມໃຫຍ່ຄັ້ງທີ IX ຂອງພັກ,​ ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງສາລະວັນ, ມະຕິ ກອງປະຊຸມໃຫຍ່ຄັ້ງທີ VI ຂອງຜູ້ແທນຊາວໜຸ່ມທົ່ວປະເທດແລະມະຕິກອງປະຊຸມໃຫຍ່ຄັ້ງທີ V ຂອງຜູ້ແທນຊາວໜຸ່ມແຂວງສາລະວັນ.

ຕະຫຼອດໄລຍະຂອງການດຳເນີນກອງປະຊຸມແມ່ນເຕັມໄປດ້ວຍບັນຍາກາດອັນຟົດຟຶ້ນແລະມີຄວາມໝາຍສຳຄັນຍິ່ງບັນດາຜູ້ແທນກອງປະຊຸມໃຫຍ່ໄດ້ເອົາໃຈໃສ່ຄົ້ນຄວ້າ,​ ປະກອບຄຳຄິດຄຳເຫັນຢ່າງກົງໄປກົງມາຕໍ່ບົດລາຍງານການ ເມືອງ 2 ພາກແລະບົດສຳຫຼວດການນຳພາຂອງຄະນະບໍລິຫານງານຊາວໜຸ່ມແຂວງສາລະວັນ. ກອງປະຊຸມໃຫຍ່ຄັ້ງທີ VI ຂອງຜູ້ ແທນຊາວໜຸ່ມແຂວງສາລະວັນໄດ້ເຫັນດີເປັນເອກະພາບ ແລະ ຕົກລົງຮັບຮອງເອົາບັນດາເນື້ອໃນທີ່ສຳຄັນດັ່ງນີ້:

ຮັບຮອງເອົາບົດລາຍງານການເມືອງແລະບົດສຳຫຼວດການນຳພາຂອງຄະນະບໍລິຫານງານຊາວໜຸ່ມແຂວງສາລະວັນທີ່ໄດ້ສະຫຼຸບຕີລາຄາຊີ້ໃຫ້ເຫັນດ້ານດີ,ດ້ານອ່ອນຂໍ້ຄົງຄ້າງແລະບົດຮຽນທີ່ ຖອດຖອນໄດ້ຈາກການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ຂອງຜູ້ແທນຊາວໜຸ່ມແຂວງສາລະວັນໃນໄລຍະຜ່ານມາ ແລະ ກຳນົດທິດທາງແຜນການເຄື່ອນໄຫວໃນຕໍ່ໜ້າແຕ່ປີ 2015-2020.
ຮັບຮອງເອົາຜົນຂອງການໃຊ້ສິດປະຊາທິປະໄຕປ່ອນບັດຄັດເລືອກຄະນະບໍລິຫານງານຊາວໜຸ່ມແຂວງສາລະວັນຄັ້ງທີ VI ຂອງຜູ້ແທນກອງປະຊຸມບົນພຶ້ນຖານຄວາມຖືກຕ້ອງຕາມລະ ບຽບກົດໝາຍແລະສອດຄ່ອງກັບມາດຕະຖານເງື່ອນໄຂທີ່ກຳນົດໄວ້. ເຊີ່ງມີຜູ້ເຂົ້າຮ່ວມຮັບເລືອກຕັ້ງທັງໝົດ 37 ສະຫາຍ,​ ຍິງ 7 ສະຫາຍ. ໃນນັ້ນເລືອກໄດ້ 33 ສະຫາຍ, ຍິງ 6 ສະຫາຍ.​ ກອງປະຊຸມຄັ້ງປະຖົມມະລຶກໄດ້ເລືອກເອົາຄະນະປະຈຳຄະນະບໍລິຫານງານຊາວໜຸ່ມແຂວງສາລະວັນຈຳນວນ 9 ສະຫາຍ, ຍິງ 1 ສະຫາຍ. ເຊິ່ງວ່າ ສະຫາຍຈັນສີລອນສີສົມບູນເປັນເລຂາຄະນະ ບໍລິຫານງານຊາວໜຸ່ມແຂວງສາລະວັນຊຸດໃໝ່ (ຄັ້ງທີVI), ສະຫາຍ ຈັນເພັງ ສາຍທຳມະວົງ ເປັນຮອງເລຂາ, ສະຫາຍ ສຸວຽງທອງ ສຸຂະວົງ ເປັນຮອງເລຂາທັງຖືກຄັດເລືອກໃຫ້ເປັນປະທານ ກວດກາ. ກອງປະຊຸມຍັງໄດ້ປ່ອນບັດເລືອກຕັ້ງເອົາຜູ້ແທນສົມບູນ 17 ສະຫາຍແລະສຳຮອງ 2 ສະຫາຍເພື່ອໄປຮ່ວມກອງປະຊຸມໃຫຍ່ຜູ້ແທນຊາວໜຸ່ມປະຊາຊົນປະຕິວັດລາວທົ່ວປະເທດຄັ້ງທີ VII ທີ່ນະຄອນຫຼວງວຽງຈັນນຳອີກ.
ຕອນທ້າຍກອງປະຊຸມຍັງໄດ້ຮັບຟັງການໂອ້ອົມຈາກສະຫາຍບຸນທຽມແກ້ວໄຊຍະວົງກຳມະການປະຈຳພັກແຂວງ, ປະທານສານປະຊາຊົນແຂວງ ແລະ ສະຫາຍ ດຣ ຄຳຜາ ພີມມະສອນ ຄະນະ ພັກ, ຮອງເລຂາ-ປະທານກວດກາຄະນະບໍລິຫານງານຊາວໜຸ່ມປະຊາຊົນປະຕິວັດລາວ. ເຊິ່ງທັງສອງສະຫາຍລ້ວນແລ້ວແຕ່ໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະບໍລິ ຫານງານຊາວໜຸ່ມແຂວງສາລະວັນໃນໄລຍະຜ່ານມາ.​ ພ້ອມກັນນັ້ນ, ກໍ່ຍັງສະແດງຄວາມເປັນຫ່ວງເປັນໄຍແລະໃຫ້ທິດຊີ້ນຳບາງບັນຫາຕໍ່ການຊີ້ນຳ-ນຳພາຂອງຄະນະບໍລິຫານງານຊາວໜຸ່ມ ແຂວງສາລະວັນຊຸດໃໝ່ໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ.