ຄະນະນຳແຂວງສາລະວັນ ຕ້ອນຮັບຄະນະຜູ້ແທນຂັ້ນສູງ ແຂວງເທືອທຽນເຫວ້ ສສ ຫວຽດນາມ

ເພື່ອສຶບຕໍ່​ຮັກສາ ​ແລະ ​ຂະຫຍາຍ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ອັນ​ດີງາມ​ ລະຫວ່າງ​ 2 ​ປະ​ເທດ ລາວ-ຫວຽດ ນາມ ​ເວົ້າ​ລວມ, ​ເວົ້າ​ສະ​ເພາະ ​ແຂວງ​ສາລະ​ວັນ ສປປລາວ ກັບ ​ແຂວງ​ເທື່ອ​ທຽນ​ເຫວ້ ສສ ຫວຽດນາມ ​ແລະ ​ເພື່ອ​ເປັນ​ການ​ທົບ​ທວນຄືນ​ບົດ​ບັນທຶກ​ການ​ພົບ​ປະລະ​ຫວ່າງ 2 ​ແຂວງ ຄັ້ງ​ວັນ​ທີ 23 ມິຖຸນາ 2011. ຕອນ​ເຊົ້າ​ວັນ​ທີ 19 ມັງກອນ 2015 ຜ່ານ​ມາ​ນີ້ ຢູ່​ທີ່​ເຮືອນ​ຮັບ​ແຂກ​ຂອງ​ແຂວງສະຫາຍ ຄຳ​ບຸ່ນ ດ້ວງ​ປັນຍາ ກຳມະການ​ສູນ​ກາງ​ພັກ,​​ ເລຂາ​ພັກ​ແຂວງ-​ເຈົ້າ​ແຂວງໆສາລະ​ວັນ ພ້ອມ​ດ້ວຍ​ພະນັກງາ​ນການ​ນຳ​ຂອງ​ແຂວງ ​ໃຫ້ກຽດອອກ​ຕ້ອນຮັບ ສະຫາຍ ຫງວຽນງອກທ້ຽນ ກຳມະການ​ສູນ​ກາງ​ພັກ​ຄອມ​ມຸຍນິດ​ຫວຽດນາມ, ​ເລຂາ​ພັກ​ແຂວງ​, ປະທານ​ສະພາ​ປະຊາຊົນ, ຫົວໜ້າຄະນະ​ຜູ້​ແທນ​ສະພາ​ແຫ່ງ​ຊາດ ແຂວງເທືອ​ທຽນ​ເຫວ້ ພ້ອມ​ດ້ວຍ​ຄະນະ ທີ່​ໄດ້​ເດີນທາງ​ມາ​ຢ້ຽມຢາມ ​ແລະ​ເຮັດ​ວຽກຢູ່​ແຂວງ​ສາລະ​ວັນ ຢ່າງ​ອົບ​ອຸ່ນ ​ແລະ ​ສະໜິດສະໜົມ.

​ເວລາ 8:00​ ໂມງ ຂອງ​ວັນ​ທີ 20 ມັງກອນ 2015 ຢູ່​ທີ່​ສະ​ໂມ​ສອນ ພະ​ແນ​ກ​ແຜນການ ​ແລະ​ການ​ລົງທຶນ​ແຂວງ​ສາລະ​ວັນ ບັນດາ​ຜູ້​ແທນ​ຂັ້ນ​ສູງ​ທັງ​ 2 ຝ່າຍ​ ກໍ່​ໄດ້​ເຂົ້າ​ຮ່ວມ​​ປະຊຸມ​ພົບ​ປະ​ຫາລື ​ແລກປ່ຽນບົດຮຽນນຳ​ກັນ. ທຳ​ອິດ ສະຫາຍ​ ຄຳ​ບຸ່ນ​ ດ້ວງ​ປັນຍາ ​ກໍ່​ໄດ້​ກ່າວ​ຕ້ອນຮັບ ສະຫາຍ ຫງວຽນງອກທ້ຽນ ພ້ອມ​ດ້ວຍ​ຄະນະ ​ແລະ ​ໄດ້ຝາກ​ຄວາມ​ຢື້​ຢາມ​ຖາມ​ຂ່າວ​ອັນ​ອົບ​ອຸ່ນ, ຄວາມ​ສາມັກຄີ​ຮັກ​ແພງ​ອັນ​ສະໜິດສະໜົມ​ໄປ​ເຖິງ​ຄະນະ​ພັກ, ສະມາ​ຊິກພັກ, ພະນັກງານ, ກຳລັງ​ປະ ກອບ​ອາວຸດ ​ແລະ​ປະຊາຊົນ​ບັນດາ​ເຜົ່າ​ໃນ​ທົ່ວ​ແຂວງ​ເທືອ​ທຽນ​ເຫວ້. ພ້ອມ​ກັນ​ນັ້ນ; ສະຫາຍ ກໍ່​ໄດ້​ລາຍ​ງານ​ສະພາບ​ການ​ພັດທະນາ​ເສດຖະກິດ-ສັງຄົມ​ ຂອງ​ແຂວງ​ສາລະ​ວັນໂດຍ​ຫຍໍ້ ຕໍ່​ຄະນະ​ຜູ້​ແທນ​ຂັ້ນ​ສູງ​ແຂວງ​ເທືອ​ທຽນ​ເຫວ້​ຮັບ​ຊາບ. ຜ່ານ​ການ​ປຶກສາ​ຫາລື ​ແລະ ​ແລກປ່ຽນຄຳ​ຄິດ​ຄຳ​ເຫັນ​ທັງ​ 2 ​ຝ່າຍ​ ໄດ້​ຕີ​ລາຄາ​ສູງ​ຕໍ່​ການ​ພົວພັນ​ຮ່ວມ​ມື​ມິດຕະພາບ ​ລະ ຫວ່າງ ​2 ແຂວງ​ໃນ​ໄລຍະ​ຜ່ານ​ມາ ​ແລະ​ ຈະຮ່ວມ​ກັນ​ເສີມ​ຂະຫຍາຍ​ການ​ພົວພັນ​ຮ່ວມ​ມື​ມິດຕະພາບ ​ໃຫ້​ໄດ້​ຮັບ​ການ​ພັດທະນາ​ຍິ່ງໆຂຶ້ນ ​ໃນ​ທຸກ​ຂົງ​ເຂດວຽກງານ​ໃນ​ຊຸມ​ປີ​ຕໍ່​ໄປ.

ການ​ພົບ​ປະຫາລື ​ແລກປ່ຽນບົດຮຽນ​ນີ້ ​ໃນ​ແຕ່ລະ​ປີ​ 2 ​ແຂວງ​ພວກ​ເຮົາ​ ແມ່ນ​ໄດ້​ສຶບຕໍ່​ຜັດປ່ຽນກັນ​ເດີນທາງ​ໄປ ​ແລກປ່ຽນບົດຮຽນ ລະຫວ່າງ ຄະນະ​ຜູ້​ແທນ​ຂັ້ນ​ສູງ,​ ຄະນະ​ວິຊາ​ການ​ ຂອງ​ແຕ່ລະ​ຂະ​ແໜງການ (ລວມທັງ​ຂົງ​ເຂດ​ພັກ-ລັດ, ຕຸລາການ, ​ອົງການ​ຈັດ​ຕັ້ງ​ມະຫາຊົນ ​ແລະ ​ລວມທັງພະນັກງານ​ບຳນານ​ປະຕິວັດ​ອາວຸ​ໂສ) ຢ່າງ​ເປັນ​ປົກກະຕິ​ຕໍ່​ເນື່ອງ. ​ເພື່ອ​ເປັນ​ການ​ຖອດ​ຖອນ​ບົດຮຽນ, ຊ່ວຍ​ເຫຼືອ ​ແລະ​ ຮ່ວມ​ມື​ກັນ​ຫຼາຍ​ດ້ານ ​ເປັນ​ຕົ້ນ: ​ການ​ພົວພັນ​ມິດຕະພາບ, ດ້ານ​ການ​ສຶກສາ, ດ້ານ​ວັດທະນະທຳ,​ ດ້ານ​ຄົມມະນາຄົມ, ວຽກງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ແລະ​ອື່ນໆ.

ຫຼັງຈາກ​ນັ້ນ; ​ເວລາ 14:00 ​ໂມງ ຄະນະ​ຜູ້​ແທນ​ຂັ້ນ​ສູງ​ຂອງ​ແຂວງ​ເທືອ​ທຽນ​ເຫວ້ ສສ ຫວຽດນາມ ກໍ່​ໄດ້​ເດີນທາງ​ໄປ​ຢ້ຽມຢາມ ​ແລະ ​ເຮັດ​ວຽກຢູ່​ແຂວງ​ເຊກອງຕື່ມ​ອີກ.