ຄະນະນຳຂອງແຂວງສາລະວັນລົງເຄື່ອນໄຫວຊຸກຍູ້ຕິດຕາມການຜັນຂະຫຍາຍມະຕິກອງປະຊູມໃຫ່ຍອົງຄະນະພັກເມືອງຂອງແຂວງ

ລະຫວ່າງ ວັນທີ 20 – 30 ເມສາ 2015 ຜ່ານມານີ້ ສະຫາຍ ຄໍາບຸ່ນ ດ້ວງບັນຍາ ກໍາມະການສູນກາງ, ເລຂາ ພັກແຂວງ, ເຈົ້າແຂວງໆສາລະວັນ ພ້ອມດ້ວຍພະນັກງານການນໍາຂອງພະແນກການ 14 ພະແນກອ້ອມຂ້າງແຂວງ ໄດ້ລົງເຄື່ອນໄຫວຊຸກຍູ້ຕິດ ຕາມການຜັນຂະຫຍາຍເນື້ອໃນມະຕິກອງປະຊູມໃຫ່ຍ ຂອງອົງຄະນະພັກເມືອງຕ່າງໆພາຍໃນແຂວງ. ເຊີ່ງມາຮອດປັດຈຸບັນ ການລົງເຄື່ອນໄຫວວຽກງານດັ່ງກ່າວສໍາເລັດແລ້ວ 7 ເມືອງຄື: ເມືອງສະໝ້ວຍ, ຕະ​ໂອ້ຍ, ຕູ້ມລານ, ເລົ່າງາມ, ວາປີ, ລະຄອນເພັງ ແລະ ເມືອງຄົງເຊໂດນ ແລະ ຍັງບໍ່ທັນໄດ້ລົງຊຸກຍູ້ຕິດຕາມ 1 ເມືອງຄື: ສາລະວັນ. ເປົ້າໜາຍຂອງເມືອງທີ່ເຂົ້າ ຮ່ວມກອງປະຊູມດັ່ງກ່າວມີ: ບັນດາຄະນະປະຈໍາພັກເມືອງ, ກໍາມະການພັກເມືອງ, ປະທານກູ່ມ, ນາຍບ້ານເທດສະບານ ແລະ ຫົວ ໜ້າຫ້ອງການ – ຮອງຫ້ອງການຕ່າງໆອ້ອມຂ້າງເມືອງ.
ທໍາອິດກອງປະຊູມໄດ້ຮັບຟັງລາຍງານຜົນການຈັດຕັ້ງປະຕິບັດມະຕິກອງປະຊູມໃຫ່ຍຂອງອົງຄະນະພັກເມືອງ ຈາກສະຫາຍ ເລຂາພັກ – ເຈົ້າເມືອງ ພ້ອມດ້ວຍການຊີ້ແຈງວິທີການຈັດຕັ້ງປະຕິບັດວຽກງານຕ່າງໆຂອງແຕ່ລະຂະແໜງການຂອງເມືອງ ເຊີ່ງການເຈາະຈີ້ມ ຊັກຖາມຕ່າງໆແມ່ນດໍາເນີນໄປຢ່າງມີບັນຍາກາດຟົດຟື້ນ, ມີເນື້ອໃນສອດຄ່ອງກັບແນວທາງນະໂຍບາຍຂອງພັກ.
ຈາກນັ້ນ; ສະຫາຍ ເລຂາພັກ – ເຈົ້າແຂວງ ໄດ້ເນັ້ນໜັກໃຫ້ຄະນະນໍາຂອງເມືອງ ພ້ອມດ້ວຍຂະແໜງການຕ່າງໆທີ່ກ່ຽວ ຂ້ອງໃຫ້ສືບຕໍ່ຈັດຕັ້ງປະຕິບັດ ແລະ ເອົາໃຈໃສ່ຕື່ມບາງບັນຫາຄື:ໃຫ້ເອົາໃຈໃສ່ຕິດຕາມ ແລະ ແກ້ໄຂຢ່າງວ່ອງໄວທັນການ ກ່ຽວກັບບັນຫາປະກົດການຫຍໍ້ທໍ້ຕ່າງໆພາຍໃນເມືອງເປັນຕົ້ນ.(ຢາເສບຕິດ ,ຂີ້ລັກງັດແງະ, ນັກເລງອັດຕະພານ, ໂສເພ ນີ….); ເອົາໃຈໃສ່ສຶກສາອົບຮົມວຽກງານການເມືອງ – ແນວຄິດ ໃຫ້ແກ່ພະນັກງານ-ສະມາຊິກພັກ ແລະພໍ່ແມ່ປະຊາຊົນ ໃຫ້ເລີກເຊີ່ງ; ລົງຊຸກຍູ້ຕິດຕາມກູ່ມ-ບ້ານ ເພື່ອໃຫ້ເຂົົາເຈົ້າເຂົ້າໃຈ ແລະ ຊໍານິຊໍານານໃນການເຮັດວຽກ, ປັບປຸງລະບົບການ ຈັດຕັ້ງຂອງບ້ານໃຫ້ຖືກຕ້ອງຕາມລະ ບຽບການຂອງບ້ານ; ການສ້າງບຸກຄະລະກອນຄວນເລືອກເຟັ້ນເອົາຜູ້ທີ່ມີຄວາມຮູ້-ຄວາມສາມາດ, ມີຄວາມຫ້າວຫັນ, ວ່ອງໄວ ແລະບໍ່ຄວນຈໍາແນກເພດ-ເຜົ່າ; ໃຫ້ເອົາໃຈໃສ່ສ້າງຂະບວນການຕ່າງໆ ເພື່ອຂໍາ ນັບຮັບຕ້ອນກອງປະຊູມໃຫ່ຍຄັ້ງທີ VIII ຂອງອົງຄະນະພັກແຂວງ ໃຫ້ມີບັນຍາກາດຟົດຟື້ນ ແລະມີຄວາມສະຫງົບຮຽບ ຮ້ອຍ; ການຍ້ອງຍໍກົມກອງ, ບຸກຄົນຜູ້ທີ່ມີຜົນງານກໍຄວນຄົ້ນຄວ້າເບິ່ງຕາມຕົວຈິງ, ຍ້ອງຍໍໃຫ້ຖືກເປົ້າໝາຍຂອງຂະບວນ ການ ​ແລະ ສະຫາຍ​ກໍ່​ຍັງ​ໄດ້​ຊີ້​ນຳ​ບັນ​ຫາ​ອື່ນໆອີກ​ຈຳນວນໜຶ່ງ.