ຄະນະກຳມະການຄຸ້ມຄອງ ແລະ ສົ່ງເສີມການລົງທຶນແຂວງສາລະວັນ ກະກຽມສະຫຼຸບວຽກງານການຄຸ້ມຄອງ ແລະ ສົ່ງເສີມການລົງທຶນ ຢູ່ແຂວງສາລະວັນ ໄລຍະ 9 ເດືອນ ຕົ້ນປີ 2018 ແລະ ວາງທິດທາງແຜນການ 3 ເດືອນ ທ້າຍປີ 2018.

ໃນຕອນ​ເຊົ້າ ຂອງວັນທີ 21 ກັນຍາ 2018 ທີ່​ຜ່ານ​ມາ, ຢູ່ທີ່ຫ້ອງປະຊຸມຊັ້ນສອງຂອງຫ້ອງວ່າການແຂວງສາລະວັນ, ໄດ້ຈັດກອງປະຊຸມປຶກສາ​ຫາລືດ້ານວິຊາ​ການ​ຮ່ວມ​ກັນ​ພາຍ​ໃນ​ຄະນະ​ກຳມະການ ຄລທ ​ແຂວງ​ສາລະ​ວັນ, ​ເພື່ອ​ກະກຽມສະຫຼຸບ​ວຽກ​ງານ​ການຄຸ້ມ​ຄອງ ​ແລະ ສົ່ງ​ເສີມ​ການ​ລົງທຶນ​ຢູ່​ແຂວງ​ສາລະ​ວັນ​ໃນ​ໄລ​ຍະ 9 ເດືອນຕົ້ນ ​ເພື່ອ​ກຳນົດ​ທິດ​ທາງ​ແຜນການ 3 ເດືອນ ທ້າຍ ປີ 2018, ໂດຍການເປັນປະທານຂອງ ທ່ານ ສີສຸວັນ ວົງຈອມສີ  ເຈົ້າແຂວງໆສາລະວັນ, ປະທານ ຄລທ ຂັ້ນ​ແຂວງ, ​ໂດຍ​ມີທ່ານ ຮອງເຈົ້າແຂວງ, ຮອງ​ປະທານ ຄລທ ຂັ້ນ​ແຂວງ ​ແລະ ຄະນະ​ກຳມະການ ຄລທ ຂັ້ນ​ແຂວງ​ເຂົ້າຮ່ວມ​ທັງ​ໝົດ.

         ໃນກອງປະຊຸມປຶກສາ​ຫາລື​ຄັ້ງນີ້ ​ແມ່ນ​​​ເພື່ອ​ກະກຽມ​ຄວາມ​ພ້ອມ​ໃຫ້​ແກ່​ການ​ຈັດ​ກອງ​ປະຊຸມ​ສະຫຼຸບ​ວຽກ​ງານ​ວຽກ​ງານ​ການ​ຄຸ້ມ​ຄອງ ​ແລະ ສົ່ງ​ເສີມ​ການ​ລົງທຶນ​ຢູ່​ແຂວງ​ສາລະ​ວັນ ​ໂດຍ​ເນັ້ນໜັກປຶກສາ​ຫາ​ລື​ບັນຫາ​ດ້ານ​ກົນ​ໄກ, ການ​ບໍລິການ​ໃນ​ການ​ດຶງ​ດູດ​ນັກ​ລົງທຶນ ​ແລະ ​ໄດ້​ຕີ​ລາຄາ​ວ່າ ມາ​ຮອດ​ປັດຈຸບັນ​ບັນ​ຍາ​ກາດ​ການ​ລົງ​ທືນຢູ່​ແຂວງ​ສາລະ​ວັນ ມີ​ລັກສະນະ​ງຽບ​ເຫງົາ, ບໍ່​ຟົດ​ຟື້ນ ​ເທົ່າ​ທີ່​ຄວນ, ສະນັ້ນ, ​ເພື່ອ​ໃນ​ຕໍ່ໜ້າ​ຕ້ອງ​ໄດ້​ສ້າງ​ເງື່ອ​ນ​ໄຂ,ເອື້ອອຳນວຍຄວາມສະດວກໃຫ້ແກ່ນັກລົງທືນ,   ປັບປຸງ, ​ຂອດ​ກົນ​ໄກ​ການ​ບໍລິການ​ຕ່າງໆ ​ໃຫ້ວ່ອງໄວຮັກສາຄວາມໂປ່ງໃສສາມາດກວດສອບໄດ້ ແລະ ຫັນເປັນອັນລະອຽດເທື່ອລະກ້າວ ແກ້ໄຂຫຼາຍຂັ້ນ – ຫຼາຍຂອດ, ອືດອາດຊັກຊ້າສ້າງສີ່ງອຳນວຍຄວາມສະດວກໃຫ້ແກ່ນັກລົງທືນພາຍໃນ ແລະ ຕ່າງປະເທດ ໃຫ້ສອດຄ່ອງຕໍ່ກົດໝາຍວາງອອກ, ກອງປະ​ຊຸມໄດ້ຮຽກຮ້ອງ​ໃຫ້ ​ແຕ່ລະ​ຂະ​ແໜງ​ເປັນ​ເຈົ້າການ​ໃນ​ການ​ສຶກສາ​ອົບຮົມ​ພະນັກງານ​ຂອງ​ຕົນ ​ແລະ ປັບປຸງ​ຂອດ​ບໍລິການ ຂອງ​ສຳນັກງານ – ອົງການ​ຕົນ​ໃຫ້​ເປັນ​ແບບຢ່າງ, ​ເພື່ອ​ສຸມ​ໃສ່​ສ້າງ​ສິ່ງ​​ເອື້ອ​ອຳນວຍ, ປັບປຸງ​ກົນ​ໄກ​ການ ບໍລິການ​ໃຫ້​ດີ​ຂຶ້ນ​ເທື່ອ​ລະ​ກ້າວ.