ກຳມະບານແຂວງ ສາລະວັນຈັດພິທີປາຖະກະຖາລະນຶກວັນກຳມະກອນສາກົນຄົບຮອບ 129 ປີ

ຕອນ​ເຊົ້າຂອງວັນທີ 30 ເມສາ 2015 ທີ່​ຜ່ານ​ມາ​ນີ້ ຢູ່ທີ່ສະໂມສອນຂອງ ວິທະຍາໄລຄູສາລະວັນ ໄດ້ຈັດພິທີປາຖະກະຖາ ລະນຶກວັນກຳມະກອນສາກົນ ຄົບຮອບ 129 ປີ ພາຍໃຕ້ການເປັນປະທານຂອງ ທ່ານ ຄຳຈັນ ແຈ່ມສະໝອນ, ກຳມະ ການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງສາ​ລະ​ວັນ ແລະ ມີ​ແຂກ​ເຂົ້າ​ຮ່ວມຈາກ​ພະ​ແນ​ກການ, ອົງການ, ລັດ​ວິ​ສະຫະ​ກິ​​ດຕ່າງໆ ອ້ອມ​ຂ້າງ​ແຂວງ ຈຳ​ນວນ 278 ທ່ານ, ຍິງ 104 ທ່ານ. ​ເຊິ່ງທ່ານປະທານ ​ໄດ້​ເລົ່າ​ຄືນ​ມູນ​ເຊື້ອປະຫວັດ​ແຫ່ງ​ການ​ກຳ​ເນີ​ດ​ເຕີບ​ໃຫຍ່​ຂອງ​ຊົນ​ຊັ້ນ​ກຳມະກອນ ​ແລະ ພາລະ​ກຳ​ປະຫວັດ ສາດ​ຂອງ​ຂະ​ບວນການກຳມະກອນ​ສາກົນ, ສະພາບ​ການ​ຕໍ່ສູ້​ຂອງ​ຊົນ​ຊັ້ນ​ກຳມະກອນ​ໃນ​ທົ່ວ​ໂລກ​ ຫຼັງ​ວັນ​ທີ 1 ພຶດສະພາ 1886, ​ເສີມ​ຂະຫຍາຍ​ທາດ​ແທ້​ ​ແລະ ລັກສະນະ​ດີ​ເລີດ​ຂອງ​ຊົນ​ຊັ້ນ​ກຳມະກອນ​ຂອງ​ວັນ​ກຳມະກອນ​ສາກົນ, ​ໂດຍສະ​ເພາະ ກຳ​ມະກອນ​ລາວ​ເຮົາ​ຍັງ​​ປະກອບສ່ວນ​ໃນ​ພາລະກິດ​ປະຕິວັດ ​ໃນກາ​ນຕໍ່ສູ້​ຕ້ານ​ລັດທິ​ລ່າ​ເມືອງ​ຂຶ້ນ​ແບບ​ເກົ່າ ​ແລະ ​ແບບ​ໃໝ່, ປົກ​ປັກ​ຮັກສາມູນ​ເຊື້ອ​ອັນ​ດີ​ງາມຂອງ​ຊົນ​ຊັ້ນ​ກຳມະກອນ ​​ໃນ​ການພັດ ທະນາ​ປະ​ເທດ​ຊາດ ​ແລະ ພັດທະນາ​ຊົນ​ຊັ້ນ​ກຳມະກອນ​ລາວ​ໃຫ້​ມີ​ສີມື​ແຮງ​ງານ​ນັບ​ມື້​ນັບ​ສູງ​ຂຶ້ນ, ກາຍ​ເປັນ​ການ​ຜະລິດ​ທີ່​ມີ​ເຕັກນິກ – ວິທະຍາສາດ​ທີ່​ທັນ​ສະ​ໄໝ, ພັດ ທະນາ​ແຮງ​ງານ​ໄປ​ສູ່​ຄຸນະພາບ​ໃໝ່ ​ເພື່ອຫັນ​ເປັນ​ອຸດ​ສະຫະ​ກຳ ​ແລະ ທັນ​ສະ​ໄໝ,​ ເອົາ​ໃຈ​ໃສ່​ກໍ່ສ້າງ​ກຳມະກອນ​ລຸ້ນໜຸ່ມ​ນ້ອຍ​ໃຫ້​ເຂົາ​ເຈົ້າ​ມີ​ລະດັບ​ຄວາມ​ຮູ້, ຄວາມ​ສາມາດ​ທາງ​ດ້ານ​ວິຊາ​ການ, ວິຊາ​ສະ​ເພາະ​ຂອງ​ຕົນ​ໃຫ້​ສູງ ​ເພື່ອ​​ໃຫ້​ມີ​ລະດັບ​ເທົ່າ​ທຽມ​ກັບ​ຂົງ​ເຂດ ​ແລະ ສາກົນ​ໃຫ້​ດີ​ຂຶ້ນ​ເລື້ອຍໆ.
ຕອນ​ທ້າຍ ທ່ານ ຄຳຈັນ ແຈ່ມສະໝອນ, ກຳມະການປະຈຳພັກແຂວງ, ຫົວໜ້າ ຄະນະໂຄສະນາອົບຮົມແຂວງ ສາ​ລະ​ວັນ ​ໃຫ້​ກຽດມອບ​ລາງວັນ​​ເປັນ ​ຂັນ​ຊະນະ​ເລີດ​ ຂອງຄະນະ​ປະຈຳ​ພັກ​ແຂວງ ປະ​ເພດ ກິລາ​ປະ​ເພດ​ເປ​ຕັງ ​ເນື່ອງ​ໃນ​ ວັນ​ກຳມະກອນ​ສາກົນ 1 ພຶດສະພາ ຄົບຮອບ 129 ປີ. ​ເຊິ່ງມີ​ 3 ປະ​ເພດຄື: ອາວຸ​ໂສ​ຊາຍ ​ແມ່ນ​ທິມພະ​ແນ​ກ ຊັບພະຍາກອນ​ທຳ​ມະ​ຊາດ ​ແລະ ສິ່ງ​​ແວດ​ລ້ອມ​, ຊາຍ​ທົ່ວ​ໄປ ​ແມ່ນທິມທະຫານ​ແຂວງ ສາລະ​ວັນ ​ແລະ ຍິງ​ທົ່ວ​ໄປ​ແມ່ນ ທິມ ມສ ສາລະ​ວັນ. ຈາກນັ້ນ ປະທານ ກໍສະ​ແດງ​ຄວາມ​ຂອບ​ອົກ​ຂອບ​ໃຈມາ​ຍັງ​ທຸກ​ທ່ານ​ທີ່​ໄດ້​ເສຍສະຫຼະ​ເວລາ​ອັນ​ມີ​ຄຸນ ຄ່າມາ​ຮ່ວມ ​ແລະ ຮັບ​ຟັງ​ໃນ​ຄັ້ງ​ນີ້, ມາ​ຮອດ​ເວ​ລາ 10: 00 ໂມງ ຂອງວັນ​ດຽວ​ກັນ​ການປະຖະກະຖາ​ລະນຶກ​ວັນ​ກຳມະ ກອນ​ສາກົນ ຄົບຮອບ 129 ປີ ​ກໍ​ໄດ້​ສິ້ນ​ສຸດ​ລົງ.