ການພົບປະ ແລະ ເຮັດວຽກ ລະຫວ່າງຄະນະຜູ້ແທນຂອງແຂວງ ສາລະວັນ ສປປ ລາວ ກັບ ຄະນະຜູ້ແທນຂອງແຂວງ ດົງຖາບ ສສ ຫວຽດນາມ.

ຕອນເຊົ້າວັນທີ 22 ທັນວາ 2015 ເວລາ 8: 30 ໂມງ ຜ່ານມານີ້ ຢູ່ທີ່ ຫ້ອງປະຊຸມ VIP ຂອງສະໂມສອນ ໃຫຍ່ຂອງແຂວງ ໄດ້ຈັດກອງປະຊຸມພົບປະ ລະຫວ່າງ ຄະນະຜູ້ແທນຂັ້ນສູງ ແຂວງ ດົງຖາບ ສສ ຫວຽດນາມ ກັບ ຄະນະຜູ້ ແທນຂັ້ນສູງ ແຂວງ ສາລະວັນ ສປປ ລາວ ນຳໂດຍ: ທ່ານ ບົວທອງ ຄຸນຍອດປັນຍາ, ຮອງເລຂາພັກແຂວງ, ຮອງເຈົ້າແຂວງໆ ສາລະວັນ ປະທານສາມະຄົມ ມິດຕະພາບ ລາວ – ຫວຽດນາມ ແຂວງ ສາລະວັນ ແລະ ຄະນະຜູ້ແທນຂັ້ນສູງແຂວງ ດົງຖາບ ສສ ຫວຽດນາມ ນຳໂດຍ ທ່ານ ດ່ວານ ກັວກ ເກື່ອງ ຮອງເລຂາພັກແຂວງ, ຜູ້ປະຈໍາການຄະນະພັກແຂວງ, ປະທານສະພາປະຊາຊົນ ແຂວງ ດົງຖາບ ພ້ອມດ້ວຍແຂກເຂົ້າຮ່ວມທັງສອງຝ່າຍ. ເຊິ່ງ ທ່ານ ບົວທອງ ຄຸນຍອດປັນຍາ, ຮອງເລຂາພັກແຂວງ, ຮອງເຈົ້າແຂວງໆ ສາລະວັນ ປະທານສາມະຄົມມິດ ຕະພາບ ລາວ – ຫວຽດນາມ ກໍໄດ້ຕ້ອນຮັບຢ່າງອົບອຸ່ນ ແລະ ສົມກຽດ ແລະ ຍັງໄດ້ນຳເອົາຄວາມຢ້ຽມຢາມຖາມຂ່າວຂອງ ທ່ານເລຂາພັກແຂວງ, ເຈົ້າແຂວງໆ ສາລະວັນ ເຖິງບັນດາສະຫາຍອ້າຍນ້ອງຫວຽດນາມ ກໍຄື:​ ຄະນະຜູ້ແທນຂັ້ນສູງ ແຂວງ ດົງຖາບ ສສ ຫວຽດນາມ ທີ່ໄດ້ເດີນທາງມາພົບປະ ແລະ ແລກປ່ຽນບົດຮຽນຢູ່ແຂວງ ສາລະວັນ ໃນຄັ້ງນີ້, ພ້ອມທັງລາຍງານສະພາບ ການພັດທະນາເສດຖະກິດ – ສັງຄົມຂອງແຂວງໂດຍຫຍໍ້ ຈຸດປະສົງໃນການມາພົບປະທັງສອງຝ່າຍໄດ້ທົບທວນຄືນການຈັດ ຕັ້ງປະຕິບັດບົດບັນທຶກຄວາມຊົງຈຳ ລະຫວ່າງ ແຂວງ ສາລະວັນ ສປປ ລາວ ກັບ ແຂວງ ດົງຖາບ ສສ ຫວຽດນາມ ພ້ອມ ກັນຕີລາຄາຄືນຕໍ່ການພົວພັນ ແລະ ຮ່ວມມືຊ່ວຍເຫຼືອເຊິ່ງກັນ ແລະ ກັນ ໃນຊຸມປີທີ່ຜ່ານມາ ໂດຍສະເພາະ ການຮ່ວມມືໃນ ການສ້າງຊັບພະຍາ ກອນມະນຸດ ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ໂຮງຮຽນການເມືອງ – ການປົກຄອງແຂວງ ສາລະວັນ ກັບ ແຂວງ ດົງຖາບ, ການພົວພັນລະຫວ່າງ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງ ສາລະວັນ ແລະ ຄະນະບໍລິຫານງານ ຊາວໜຸ່ມໂຮ່ຈີມິງແຂວງ ດົງຖາບ ໃຫ້ໄດ້ມີການພົບປະເຊິ່ງກັນ ແລະ ກັນ ມີຜົນສຳເລັດເປັນຢ່າງ ດີ, ສະໜັບສະໜູນໃນພາກສ່ວນ ທຸລະກິດທັງສອງແຂວງ ໄດ້ມີການພົວພັນ ແລະ ຮ່ວມມືໃນຂົງເຂດການຄ້າ – ການລົງທຶນ ແລະ ການທ່ອງທ່ຽວ.
ສ່ວນແຂວງ ດົງຖາບ ສສ ຫວຽດນາມ ຍິນດີຊ່ວຍເຫຼືອສ້າງເງື່ອນໄຂອຳນວຍຄວາມສະດວກໃຫ້ນັກສຶກສາແຂວງ ສາລະວັນ ໄປສຶກສາຮ່ຳຮຽນຕໍ່ໃນຂົງເຂດແພດສາດ ແລະ ຂົງເຂດອື່ນໆຢູ່ມະຫາວິທະຍາໄລດົງຖາບ ແລະ ວິທະຍາໄລອື່ນໆອີກຂອງແຂວງດົງຖາບ ສສ ຫວຽດນາມ.

ຫຼັງຈາກນັ້ນ ທ່ານ ບົວທອງ ຄຸນຍອດປັນຍາ, ຮອງເລຂາພັກແຂວງ, ຮອງເຈົ້າແຂວງໆ ສາລະວັນ ປະທານສາມະຄົມ ມິດຕະພາບ ລາວ – ຫວຽດນາມ ແຂວງ ສາລະວັນ ແລະ ທ່ານ ດ່ວານ ກັວກ ເກື່ອງ ຮອງເລຂາພັກແຂວງ, ຜູ້ປະຈໍາການຄະນະ ພັກແຂວງ, ປະທານສະພາປະຊາຊົນ ແຂວງ ດົງຖາບ ພ້ອມຄະນະຜູ້ ແທນ ທັງສອງຝ່າຍ ກໍໄດ້ລົງນາມລາຍເຊັນບົດບັນທຶກການພົບປະ ແລະ ເຮັດວຽກຮ່ວມກັນໃນຄັ້ງນີ້.
ຕອນທ້າຍ ຄະນະຜູ້ແທນທັງສອງຝ່າຍ ກໍໄດ້ມອບຂອງຂວັນເຊິ່ງກັນ ແລະ ກັນ ເພື່ອເປັນທີ່ລະລຶກ ແລະ ສະແດງ ຄວາມຂອບອົກຂອບໃຈທັງເປັນຄວາມຮັກແພງ ແລະ ຄວາມສາມະຄີໃຫ້ແໜ້ນແຟ້ນຂຶ້ນຕື່ມ ຫຼື ຄວາມສຳພັນ ເພື່ອໃຫ້ບັນ ລຸຕາມເປົ້າໝາຍ.