ກອງເລຂາຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ວຽກແມ່ ແລະ ເດັກແຂວງ ສາລະວັນ ມອບໃບຢັ້ງຢືນໃຫ້ບ້ານທີ່ປະຕິບັດສິດສະເໝີພາບ ລະຫວ່າງ ຍິງ-ຊາຍ, ປາສະຈາກການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຢູ່ກຸ່ມ 8 ແລະ ກຸ່ມ 10 ເມືອງສາລະວັນ

ລະຫວ່າງວັນທີ 27 ພຶດສະພາ 2015 – ວັນທີ 5 ມິຖຸນາ 2015 ຜ່ານ​ມາ​ນີ້ ກອງເລຂາຄະນະກຳມາທິການເພື່ອຄວາມກ້າວໜ້າຂອງ ແມ່ຍິງ, ວຽກແມ່ ແລະເດັກແຂວງສາລະ​ວັນ ເຂົ້າຮ່ວມພິທີ​ປະກາດບ້ານ​ພັດທະນາ ​ແລະ ​ໄດ້ມອບໃບຢັ້ງຢືນໃຫ້ບ້ານທີ່ມີຄວາມສະເໝີພາບຍິງ-ຊາຍ, ປາສະຈາກການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍຈຳນວນ 9 ບ້ານ ທີ່​ຂື້ນ​ກັບ​ກຸ່ມ 8 ​ແລະ ກຸ່ມ 10 ​ເມືອງສາລະ​ວັນ ​ຄື: ບ້ານ ໜອງບູ່ຫີນ, ບ້ານ ຜັກແພວທົ່ງ, ບ້ານ ວັງງົວ, ບ້ານ ຈານວົງ, ບ້ານ ນາໂພເລີນ, ບ້ານ ດ່ານໃຫ່ຍ, ບ້ານ ນາ ບອນ, ບ້ານ ໂນນສະຫວັນ ແລະ ບ້ານ ນາຫວ້າ. ​ໃຫ້ກຽດ​ເຂົ້າ​ຮ່ວມ ​ແລະ ​ເປັນ​ປະທານ​ຂອງ ທ່ານ ບຸນທຽມ ພົມມະສະຖິດ ກຳມະການປະຈຳພັກແຂວງ, ປະທານຄະນະ​ກຳມະການກວດກາແຂວງ, ປະທານ​ຄະນະ​ສະມາຊິກ​ສະພາ​ແຫ່ງ​ຊາດ ປະຈຳ​ເຂດ​ເລືອກ​ຕັ້ງ​ທີ 14 ​ແຂວງສາລະ​ວັນ ​ແລະ ມີ​ຜູ້​ເຂົ້າ​ຮ່ວມ​ຈາກ​ຫ້ອງການ​ພັດທະນາ​ຊົນນະບົດ ​ແລະ ລຶບລ້າງ​ຄວາມທຸກ​ຍາກ​ແຂວງ, ພະ​ແນ​ກການ​ອ້ອມ​ຂ້າງ​ແຂວງ, ຫ້ອງການ​ຂັ້ນ​ເມືອງ, ​ເລຂາ​ຄະນະ​ພັກ​ກຸ່ມ ພ້ອມ​ດ້ວຍ​ພໍ່​ແມ່​ປະຊາຊົນ ​ແລະ ນ້ອງ​ນ້ອຍ​ນັກຮຽນ​ເຂົ້າ​ຮ່ວມ ຈຳນວນ 400 ກວ່າ​ຄົນ, ຍິງ 220 ຄົນ.

​​ໃນ​ພິທີ​ໄດ້​ຮັບ​ຟັງ​ການ​ລາຍ​ງານ​ຜົນສຳ​​ເລັດ​ຂອງ​ການຈັດ​ຕັ້ງ​ປະຕິບັດ​ວຽກງານ​ດ້ານ​ຕ່າງໆ​ ໂດຍ​ອີງ​ໃສ່​ມາດຖານ​ເງື່ອນ​ໄຂ​ຂອງ​ການ​ສ້າງ​ບ້ານ​ເປັນ​ຫົວໜ່ວຍພັດທະນາ​ໃນ​ຈຳນວນ 9 ບ້ານ​ດັ່ງກ່າວ ຈາກ​ເລຂາ​ພັກ​ກຸ່ມ​ທັງ 2 ກຸ່ມ. ນອກຈາກ​ນັ້ນ, ຍັງ​ໄດ້​ຮັບ​ຟັງ​ການ​ລາຍ​ງານ​ການ​ສ້າງ​ບ້ານ​ທີ່​ປະຕິບັດ​ສິດສະ​ເໝີພາບ ​ລະຫວ່າງ​ ຍິງ-ຊາຍ ​ແລະ​ ປາສະຈາກ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ ​ເດັກນ້ອຍ ​ນຳ​ອີກ. ​ເຊິ່ງ​ໃນ​ຈຳນວນ​ບ້ານ​ດັ່ງກ່າວ​ມີ​ລະບົບ​ການຈັດ​ຕັ້ງ​ຄົບ​ຊຸດໜັກ​ແໜ້ນ ​ເຂັ້ມ​ແຂງປະກອບ​ມີ​ເພດ​ຊາຍ ​ແລະ ​ເພດ​ຍິງ; ມີ​ຜູ້​ປະສານ​ງານ​ວຽກຄວາມ​ກ້າວໜ້າແມ່ຍິງ, ວຽກ​ແມ່ ​ແລະ ​ເດັກ​ຂອງ​ບ້ານ; ອົງການ​ປົກຄອງ​ບ້ານ, ຄະ​ນະ​ພັກ, ​ແນວ​ລາວ​ສ້າງ​ຊາດ, ອົງການ​ຈັດ​ຕັ້ງ​ມະຫາຊົນ ​ໄດ້​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ແລະສົ່ງ​ເສີມ​ໃຫ້​ແມ່ຍິງ ​ແລະ ​ເດັກນ້ອຍ​ພາຍ​ໃນ​ບ້ານ​ຫຼາຍ​ຢ່າງເປັນ​ຕົ້ນ: ຊຸກຍູ້ ​ແລະອຳນວຍ​ຄວາມ​ສະດວກ​ໃຫ້​ເດັກ​ຍິງ​ໄດ້​ເຂົ້າ​ຮຽນໜັງສື​ຢ່າງ​ທົ່ວ​ເຖິງ.

ມາຮອດປະຈຸບັນ, ທົ່ວແຂວງໄດ້ຮັບໃບຢັ້ງຢືນໃຫ້ຄອບຄົວທີ່ປະຕິບັດສິດສະເໝີພາບຍິງ-ຊາຍຈຳນວນ 7,694 ຄອບຄົວເທົ່າກັບ 10,8% ຂອງຄອບຄົວທັງໝົດ​ໃນທົ່ວແຂວງ ​ແລະໃບຢັ້ງຢືນ​ເປັນບ້ານປະຕິບັດສິດສະ ເໝີພາບລະຫວ່າງຍິງ-ຊາຍຈຳນວນ 66 ບ້ານ ເທົ່າກັບ 13,34% ຂອງຈຳນວນບ້ານ​ໃນທົ່ວແຂວງ.
ທັງນີ້ກໍ່ເພື່ອປະຕິບັດມະຕິ 03 ຂອງກົມການເມືອງສູນກາງພັກ ວ່າ​ດ້ວຍ: ການ​ສ້າງ​ແຂວງ​ເປັນ​ຫົວໜ່ວຍຍຸດ​ທະ​ສາດ, ສ້າງ​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ, ສ້າງ​ບ້ານ​ເປັນ​ຫົວໜ່ວຍພັດທະນາ ​ແລະ ປະຕິບັດ​ຕາມ​ມາດຖານ​ເງື່ອນ​ໄຂ​ຂອງ​ການ​ສ້າງ​ຄອບຄົວ, ບ້ານ, ​ເມືອງ​ພັດທະນາ​ຕິດ​ພັນ​ກັບກາ​ນປະຕິບັດ​ສິດສະ​ເໝີພາບ​ ລະຫວ່າງ ຍິງ-ຊາຍ, ປາສະຈາກ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ ​ເດັກນ້ອຍຂອງ​ຄະນະ​ກຳມາ​ທິການ​ເພື່ອ​ຄວາມ​ກ້າວໜ້າຂອງ​ແມ່ຍິງ​ແຫ່ງ​ຊາດ ​ໃຫ້​ໄດ້​ຖືກ​ຈັດ​ຕັ້ງ​ປະຕິບັດ​ຢ່າງ​ເປັນ​ຮູບ​ປະ​ທຳ​ເທື່ອ​ລະ​ກ້າວ.