ກອງເລຂາຄະນະກຳມາທິການເພື່ອແມ່ ແລະ ເດັກ ແຂວງ ສາລະວັນ ເຂົ້າຮ່ວມ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດຢູ່ທີ່ ແຂວງ ສະຫວັນນະເຂດ

ຕອນ​ເຊົ້າ​ຂອງ​ວັນ​ທີ 13 ມີ​ຖຸນາ 2015 ກອງ​ເລຂາ​ຄະນະ​ກຳມາ​ທິການ​ເພື່ອ​ຄວາມ​ກ້າວໜ້າຂອງ​ແມ່ຍິງ, ວຽກ​ແມ່ ​ແລະ ​ເດັກ​ແຂວງສາລະ​ວັນ ​ໄດ້​ເຂົ້າ​ຮ່ວມ​ພິທີ​ສະ​ເຫຼີ​ມສະຫຼອງວັນ​ເດັກນ້ອຍ​ສາກົນ ​ແລະວັນ​ປູກ​ຕົ້ນ​ໄມ້​ແຫ່ງ​ຊາດວັນ​ທີ 1 ມີ​ຖຸນາ 2015 ​ແລະວັນ​ສາກົນ​ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ 12 ມີ​ຖຸນາ 2015 ຢູ່​ທີ່​ຫໍ​ວັດທະນະທຳ ​ແຂວງສະຫວັນ​ນະ​ເຂດ ​ໂດຍ​ໃຫ້ກຽດ​ເຂົ້າ​ຮ່ວມ ​ແລະເປັນ​ປະທານຂອງ ​ທ່ານ ດຣ ພັນ​ຄຳ ວິພາ​ວັນ ກຳມະການ​ກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະມົນ​ຕີ (ລັດຖະມົນຕີ​ວ່າການ​ກະຊວງ​ສຶກສາ​ທິການ ​ແລະກິລາ), ທ່ານ ດຣ ສຸພັນ ​ແກ້​ວມີ​ໄຊ ​ເລຂາ​ພັກ​ແຂວງ-​ເຈົ້າ​ແຂວງໆສະຫວັນ​ນະ​ເຂດ, ມີ​ແຂກ​ທີ່​ມາ​ຈາກ 9 ​ແຂວງ ​ແລະ 6 ກະຊວງ, ອຳນາດ​ການ​ປົກຄອງ​ຂັ້ນ​ແຂວງ, ອົງການ​ຈັດ​ຕັ້ງ​ທີ່​ກ່ຽວຂ້ອງ, ພໍ່​ແມ່​ຜູ້​ປົກຄອງ​ເດັກ ​ແລະນ້ອງ​ນ້ອຍ​ນັກຮຽນ ​ແຂວງສະຫວັນນະ​ເຂດ ​ເຂົ້າ​ຮ່ວມ​ຈຳນວນ 500 ກວ່າ​ຄົນ.
ພິທີ​ໄດ້​ດຳ​ເນີນ​ໄປ​ດ້ວຍ​ບັນຍາກາດ​ທີ່​ຄຶກຄື້ນ ​ແລະມ່ວນ​ຊື່ນ ​ເຊິ່ງ​ໄດ້​ມີ​ການ​ເຂົ້າ​ຮ່ວມ​ປູກ​ຕົ້ນ​ໄມ້​ຢູ່​ທີ່​ເດີ່ນ​ຫໍ​ວັດທະນະທຳ​ແຂວງ, ຮັບ​ຊົມ​ລາຍການ​ສະ​ແດງ​ສິນລະປະ​ວັນນະຄະດີ, ສະ​ແດງ​ລະຄອນ ​ແລະຮ້ອງ​ເພງຈາກ​ນ້ອງ​ນ້ອຍ​ນັກຮຽນທີ່​ມາ​ຈາກ​ໂຮງຮຽນ​ແຫ່ງ​ຕ່າງໆຂອງ​ແຂວງສະຫວັນ​ນະ​ເຂດ. ນອກຈາກ​ນັ້ນ, ​ກໍ່​ຍັງ​ມີ​ບົດ​ຟ້ອນ​ຂອງ​ນ້ອງ​ນ້ອຍນັກຮຽນສາມັນ​ກິນນອນ​ຊົນ​ເຜົ່າ ​ແຂວງສາລະ​ວັນປະກອບສ່ວນ​ໃນ​ການສະ​ແດງ​ຄັ້ງ​ນີ້​ອີກ​ດ້ວຍ. ບົດ​ຟ້ອນ-ບົດ​ສະ​ແດງ, ບົດ​ລະຄອນ, ບົດ​ເພງທີ່​ນຳ​ມາສະ​ແດງ​ໃນ​ຄັ້ງ​ນີ້ລ້ວນ​ແລ້ວ​ແຕ່​ສ່ອງ​ແສງ​ໃຫ້​ເຫັນ​ເຖິງ​ຄວາມ​ສາມັກຄີ, ການ​ພ້ອມພຽງຮຽງໜ້າກັນ, ຮ່ວມ​ແຮງ​ຮ່ວມ​ໃຈ​ກັນ​ຢຸດ​ໃຊ້​ຄວາມ​ຮຸນ​ແຮງ​ຕໍ່​ເດັກ.
ຕອນ​ທ້າຍທ່ານຮອງ​ນາຍົກລັດຖະມົນຕີ ​ໄດ້​ໃຫ້ກຽດມອບ​ຂອງຂວັນ​ໃຫ້​ບັນດາ​ນ້ອງ​ນ້ອຍ​ນັກສະ​ແດງ​ທຸກ​ພາກສ່ວນ​ທີ່​ເຂົ້າ​ຮ່ວມ​ການສະ​ແດງ​ໃນ​ຄັ້ງ​ນີ້ ​ແລະພິທີ​ກໍ່​ໄດ້​ປິດ​ລົງ​ໃນ​ເວລາ 11:30 ​ໂມງຂອງ​ວັນ​ດຽວກັນ.