ກອງປະຊຸມ ລາຍງານ ຜົນການກວດສອບບົດສະຫຼຸບຂາດຕົວ ງົບປະມານແຫ່ງລັດ ປະຈຳ ສົກ ປີ 2012- 2013 ຂອງແຂວງສາລະວັນ

ເວລາ 14.00 ໂມງ ຂອງວັນທີ 24 ມີນາ 2015 ຜ່ານມານີ້ ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງ ແຂວງສາລະວັນໄດ້ຈັດກອງປະຊຸມລາຍງານຜົນການກວດສອບ ບົດສະຫຼຸບຂາດຕົວ ງົບປະມານແຫ່ງລັດ ປະຈຳປີ 2012- 2013 ໂດຍໃຫ້ກຽດການເປັນປະທານຂອງ ທ່ານ ສີເຮັງ ຫອມສົມບັດ ກໍາມະການປະຈຳພັກແຂວງ, ຮອງເຈົ້າແຂວງ (ຜູ້ຊີ້ນຳວຽກງານເສດຖະກິດ), ເຊິ່ງມີຄະນະນຳອົງການກວດສອບປະຈຳພາກໃຕ້ ແລະພະແນກ ການ, ອົງການກ່ຽວຂ້ອງຂອງແຂວງ ສາລະວັນ ເຂົ້າຮ່ວມເປັນຈຳນວນຫຼວງຫຼາຍ. ທຳອິດກອງປະຊຸມ ໄດ້ຮັບຟັງລາຍງານ ບົດແຈ້ງຜົນການກວດສອບ ສະຫຼຸບຂາດຕົວ ການຈັດຕັ້ງປະຕິບັດ ງົບ ປະມານແຫ່ງລັດ ປະຈຳສົກປີ 2012-2013 ຈາກ ຮອງຫົວໜ້າອົງການກວດສອບ ປະຈໍາພາກໃຕ້, ຮັບຟັງ ການຜ່ານມະຕິສະພາແຫ່ງຊາດ ແລະ ການມີຄຳເຫັນ ຕໍ່ບົດສະຫຼຸບຂາດຕົວຈາກ ທ່ານ ບຸນທຽມ ພົມມະສະຖິດ ກຳມະການປະຈຳພັກແຂວງ, ປະທານຄະນະກຳມະການກວດກາແຂວງ, ປະທານຄະນະສະ ພາແຫ່ງຊາດປະຈຳເຂດເລືອກຕັ້ງທີ 14 ; ຮັບຟັງການມີຄໍາເຫັນຕໍ່ວຽກງານກວດສອບ ແລະ ບົດແຈ້ງຜົນການ ກວດສອບ; ບົດສະ ຫຼຸບຂາດຕົວ ການຈັດຕັ້ງປະຕິບັດ ງົບປະມານແຫ່ງລັດ ສົກປີ 2012-2013 ຂອງແຂວງ ສາລະວັນ ຈາກ ທ່ານ ນະລົງສັກ ຊາດຕະກຸນ ຫົວໜ້າອົງການກວດສອບ ປະຈຳພາກໃຕ້ ແລະ ຫຼັງຈາກນັ້ນ ຜູ້ ເຂົ້າຮ່ວມທັງໜົດ ກໍ່ປະກອບຄໍາຄິດຄຳເຫັນ ຕໍ່ບົດສະຫຼຸບດັ່ງກ່າວ ຢ່າງມີບັນຍາກາດຟົດຟື້ນດີ.

ຕອນທ້າຍ ທ່ານ ຮອງເຈົ້າແຂວງສາລະວັນ ໄດ້ມີຄຳເຫັນ ແລະ ສະເໜີວິທີແກ້ໄຂ ຕໍ່ວຽກງານກວດສອບ ແລະ ຜົນການກວດສອບ ບົດສະຫຼຸບຂາດຕົວ ການຈັດຕັ້ງປະຕິບັດ ງົບປະມານແຫ່ງລັດ ປະຈຳປີ 2012-2013 ຂອງແຂວງສາລະວັນ.