ກອງປະຊຸມ ຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍ ຕາມຊາຍແດນ ລາວ – ໄທ ລະຫວ່າງ ແຂວງ ສາລະວັນ ສປປ ລາວ ກັບ ຈັງຫວັດອຸບົນຣາຊະທານີ ຣາຊະອະນາຈັກໄທ ຄັ້ງທີ XI ທີ່ແຂວງສາລະວັນ.

ໂດຍ​ສືບ​ຕໍ່​ປະຕິບັດ​ຕາມ​ບົດ​ບັນທຶກກອງປະຊຸມ ຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ – ໄທຄັ້ງທີ X ທີ່ຈັດຂື້ນ ໃນວັນທີ 27 ກັນຍາ 2016 ທີ່ຈັງຫວັດອຸບົນຮາດຊະທານີ ປະ​ເທດ​ໄທ​ເປັນ​ເຈົ້າພາບ. ມາໃນວັນທີ 22 ສິງຫາ 2018 ທີ່​ຜ່າ​ນມາ, ​ແຂວງ​ສາລະ​ວັນ​ໄດ້​ຮັບ​ກຽດ​ເປັນ​ເຈົ້າພາບຈັດ​ກອງ​ປະຊຸມ​ຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ – ໄທ ລະຫວ່າງແຂວງ ສາລະວັນ ກັບ ຈັງຫວັດອຸບົນຮາດຊະທານີ ຄັ້ງທີ XI ຂຶ້ນ ທີ່ຫ້ອງປະຊຸມ VIP ຊັ້ນ 2 ສະໂມສອນ​ໃຫ່ຍຂອງແຂວງສາລະ​ວັນ, ໂດຍການປະທານຮ່ວມ ຂອງ ທ່ານ ສີສຸວັນ ວົງຈອມສີ ກຳມະການສູນກາງພັກ, ເລຂາພັກ – ເຈົ້າແຂວງໆສາລະວັນ ( ຝ່າຍລາວ ) ແລະ ທ່ານ ສະຫຣິດ ວິທູນ ຜູ້ວ່າຣາຊະການຈັງຫວັດອຸບົນຣາຊະທານີ ( ຝ່າຍໄທ ).

ກອງປະຊຸມໃນຄັ້ງນີ້, ທັງສອງຝ່າຍໄດ້ທົບທວນຄືນການຈັດຕັ້ງຜັນຂະຫຍາຍເນື້ອໃນຈິດໃຈບົດບັນທຶກກອງປະຊຸມ ຄັ້ງທີ X  ​ແລະ ປືກສາຫາລືກັນ ກ່ຽວກັບທິດທາງການຮ່ວມມືໃນຕໍ່ໜ້າ ​ໂດຍສະ​ເພາະ​ບັນຫາການຮ່ວມມື ​ໃນ​ການຮັກສາຄວາມສະຫງົບຮຽບຮ້ອຍຕາມບໍລິ​ເວນຊາຍແດນ; ການຮ່ວມມືທາງດ້ານເສດຖະກິດ; ການລົງທືນ; ການຄ້າ, ການທ່ອງທ່ຽວ; ການຮ່ວມມືທາງດ້ານການພັດທະນາຊັບພະຍາກອນມະນຸດ; ດ້ານແຮງງານ ​ແລະ ດ້ານສາທາລະນະສຸກ. ພ້ອມ​ນັ້ນ ກອງ​ປະຊຸມ​ ກໍ​ໄດ້ຕົກລົງເປັນເອກະພາບຮັບຮອງ​ເອົາ ບົດບັນທຶກ ການຮ່ວມມື ຮັກສາຄວາມສະຫງົບ ຮຽບຮ້ອຍ ຕາມຊາຍແດນ ລາວ – ໄທ ແຂວງ ສາລະວັນ ສປປ ລາວ ແລະ ຈັງຫວັດອຸບົນຣາຊະທານີ ຣາຊະອະນາຈັກປະ​ເທດໄທ ຄັ້ງທີ XI ​ເຊິ່ງມີ​ທັງ​ໝົດ 8 ຫົວຂໍ້ໃຫ່ຍ ດັ່ງ​ນີ້:

  1. ການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມຊາຍແດນ.
  2. ການອຳນວຍຄວາມສະດວກ ແລະ ຄວາມປອດໄຟ ໃນການເຂົ້າ – ອອກເມືອງ.
  3. ການຮ່ວມມື ໃນການປ້ອງກັນ ແລະ ປາບປາມຢາເສບຕິດ.
  4. ການຮ່ວມມືກັນ ໃນການດຳເນີນກິດຈະການຕ່າງໆ ຕາມລຳນ້ຳຂອງ.
  5. ການຮ່ວມມື ທາງດ້ານເສດຖະກິດ.
  6. ການສົ່ງເສີມ ການຮ່ວມມືທາງດ້ານຕ່າງໆ.
  7. ການປະສານງານຮ່ວມກັນ.
  8. ການກຳນົດ ກອງປະຊຸມໃນຄັ້ງທີ XII ​ແມ່ນ​ຈັງຫວັດ​ອະ​ບົນຣາດຊະທານີ ​ເປັນ​ເຈົ້າພາບ ( ສ່ວນ​ວັນ​ເວລາຈະໄດ້ມີການປືກສາຫາລື ແລະ ແລກປ່ຽນການປະສານງານໃນຂັ້ນຕໍ່ໄປ).
    ​​ເນື່ອງໃນ​ໂອກາດ​ທີ່​ ຄະນະ​ຜູ່​ແທນ​ຈັງຫວັດ​ອຸບົນ​ຣາດຊະ​ທານີ ປະ​ເທດ​ໄທ ມາ​ເຄື່ອ​ນ​ໄຫວ​ຮ່ວມ​ກອງ​ປະຊຸມ​ ທີ່ແຂວງ​ສາລະ​ວັນ ​ເປັນ​ເຈົ້າພາບ​ ກໍ​ໄດ້​ເຂົ້າຮ່ວມ​ກິດຈະກຳກິ​ລາ​ຕ່າງໆ. ນອກ​ນັ້ນ, ຄະນະ​ຜູ່​ແທນ​ຍັງ​ໄດ້​ຮ່ວມກັນ​ຕັກບາດ ຖວາຍ​ສັງ​ກະທາ​ນ ​ທີ່​ວັດ​ໃຫ່ຍ​ສີ​ມຸງ​ຄຸນນຳ​ອີກ​ດ້ວຍ.