ກອງປະຊຸມເຜີຍແຜ່ ຖານຂໍ້ມູນສາລະວັນອິນໂຟ, ດາສບອດສຳລັບການຕິດຕາມຈັດຕັ້ງປະຕິບັດແຜນພັດທະນາເສດຖິດ – ສັງຄົມຂັ້ນແຂວງ ຄັ້ງວັນທີ 2 ຕຸລາ 2015 ທີ່ແຂວງ ສາລະວັນ

ເຊົ້າຂອງວັນທີ 2 ຕຸລາ 2015 ທີ່ຫ້ອງ VIP ສະໂມສອນໃຫຍ່ຂອງແຂວງ ສາລະວັນ, ສູນສະຖິຕິປະຈໍາແຂວງ ໄດ້ຈັດກອງປະຊຸມເຜີຍແຜ່ ຖານຂໍ້ມູນ ສາລະວັນອິນໂຟ, ດາສບອດ ສຳລັບການຕິດຕາມຈັດຕັ້ງປະຕິບັດແຜນພັດທະນາເສດກິດ – ສັງ ຄົມຂັ້ນແຂວງ ໂດຍໃຫ້ກຽດການເປັນປະທານຮ່ວມ ລະຫວ່າງ ທ່ານ ວິຊຽນ ນະວິກຸນ ຄະນະປະຈໍາພັກແຂວງ, ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດແລະ ທ່ານ ດຣ ສະໄໝຈັນ ບຸບຜາ ຄະນະບໍລິຫານງານພັກກະຊວງແຜນການ ແລະ ການລົງທຶນ, ຫົວໜ້າສູນສະຖິຕິແຫ່ງຊາດ, ມີ​ບັນດາ​ທ່ານ​​ເຈົ້າ​ເມືອງ, ຮອງ​ເຈົ້າ​ເມືອງ, ຫົວໜ້າ​ ພະ​ແນ​ກການ​ອ້ອມ​ຂ້າງ ​ແລະ ​ຫົວໜ້າ​ສູນ​ສະຖິຕິ​ປະຈຳ 4 ​ແຂວງ​ພາກ​ໃຕ້​ຕະຫຼອດ​ພະນັກງານ​ວິຊາ​ການກໍໄດ້​ເຂົ້າ​ຮ່ວມເປັນຈຳນວນຫຼາຍ. ທ່ານ ວິຊຽນ ນະ​ວິ​ກຸນຮອງ​ເຈົ້າ​ແຂວງ​ໆ ​ສາລະ​ວັນ ​​​​ແຈ້ງໃຫ້​ຮູ້​ວ່າ: ສູນ​ສະຖິຕິ​ແຫ່ງ​ຊາດ​ໃນ​ປັດຈຸບັນ​ໄດ້​ສຳ​ເລັດ​ການ​ສ້າງ​ກົດໝາຍ​ວ່າ​ດ້ວຍສະຖິຕິ ​ແລະ​ ຍຸດ​ທະ​ສາດລະບົບ​ການ​ພັດ​ທະ​ນາ​ສະຖິຕິ​ແຫ່ງ​ຊາດປີ 2010 – 2020 ​ເຊິ່ງ​ເປັນ​ບ່ອນ​ອີງ​ອັນ​ໜັກ​ແໜ້ນ​ໃຫ້​ແກ່​ການ​ເຄື່ອນ​ໄຫວ​ການ​ປັບປຸງ​ລະບົບ​ສະຖິຕິ​ແຫ່ງ​ຊາດ​ແຕ່​ຂັ້ນ​ສູນ​ກາງ ​ແລະ ​ທ້ອງ​ຖີ່​ນ​ໃນ​ຂອບ​ເຂດ​ທົ່ວ​ປະ​ເທດ.ຈາກ​ບົດ ຮຽນ​ທີ່​ຖອດ​ຖອນ​ໄດ້​​ໃນ​ໄລຍະ​ຜ່ານ​ມາ​ໃຫ້​ເຫັນ​ວ່າ: ຄວາມ​ຕ້ອງການ​ທາງ​ດ້ານຕົວ​ເລກສະຖິຕິ​ນັບ​ມື້​ນັບ​ຫຼາຍ​ຂຶ້ນສະ​ນັ້ນ ​ການສະ​ເໝີ​ຖານ​ຂໍ້​ມູນ​ດັ່ງກ່າວ​ຈະ​ເປັນ​ຂີດ​ໝາຍ​ອັນ​ສຳຄັນ​ໃນ​ການ​ສ້າງ​ຄວາມ​ສາມາດ ​ແລະ​ ຄວາມ​ເຂົ້າ​ໃຈ​ຕໍ່​ລະ ບົບ​ສະຖິຕິ​ແຫ່ງ​ຊາດ, ການ​ປັບ ປຸງ​ລະບົບ​ສະຖິຕິ​ທ້ອງ​ຖີ່​ນ ​ແລະ​ ນຳ​ໃຊ້​ຂໍ້​ມູນ​ສະຖິຕິ​ສຳລັບ​ຕິດຕາມພ້ອມ​ທັງ​ເປັນ​ການ​ປະ​ເມີນ​ການ​ພັດ​ທະນາ​ເສ​ດຖະກິດ – ສັງຄົມ.
ທ່ານ ຄຳ​ກິ່​ງ ​ແກ້ວ​ສຸພັນ ຫົວໜ້າ​ສູນ​ສະຖິຕິ​ປະຈຳ​ແຂວງ ສາລະ​ວັນ ​ໄດ້​ສະ​ເໝີ​ ກ່ຽວກັບການ​ນຳ​ໃຊ້​ສະຖິຕິຂໍ້​ມູນ​ນີ້​ເພື່ອ​ເປັນ​ການວາງ​ແຜນ, ນະ​ໂຍບາຍ, ຕິດຕາມ​ຄວາມ​ຄືບ​ໜ້າ, ການ​ຄົ້ນ​ຄວ້າ, ວິ​ເຄາະ, ວິ​ໄຈ ​ແລະ​ ຕັດ​ສີນ​ໃຈ ​ເຊິ່ງ​ໄດ້​ຍົກ​ໃຫ້​ເຫັນ​ເຖີງຄວາມສຳຄັນ​ຂອງ​ສາລະ​ວັນ​ອິນ​ໂຟສາມາດ​ສະ​ເໝີ​ຂໍ້​ມູນ​ໄດ້​ຫຼາຍ​ຮູບ​ແບບ ​ໂດຍ​ສະ​ເພາະ​ ແມ່ນ​ການ​ວິ​ໄຈ​ທ່າ​ອ່ຽງຕ່າງໆ​ທີ່​ມີ​ປະສິດທິພາບ​ສູງ​ເ​ປັນ​ຕົ້ນ: ຮູບ​ແບບ​ຕາຕະລາງ, ຮູບ​ແບບ​ເສັ້ນ​ສະ​ແດງ ​ແລະ​ ຮູບ​ແບບ​ແຜນ​ທີ່ທັງ​ເໝາະ​ສົມ​ສຳລັບ​ຜູ້ນຳ​ໃຊ້​ທົ່ວ​ໄປ ​ແລະ ​ບໍ່​ຈຳ​ເປັນ​ຕ້ອງ​ມີ​ຄວາມ​ຊຳນານ​ດ້ານຄອມ​ພີ​ວ​ເຕີຊັອບ​ແວຣ ​ແລະ​ ຮາດ​ແວຣ, ສ່ວນ​ຖານ​ຂໍ້​ມູນ​ດ້ານ ​ດາສບອດ ​ແມ່ນ​​ເປັນ​ການ​ເບີ່ງຂໍ້​ມູນ​ແບບ​ອອນ​ລາຍ ​ເປັນ​ເຄື່ອງມື​ງ່າ​ຍໆ​ໃນ​ການ​ເຂົ້າ​ເບິ່​ງຂໍ້​ມູນ ​ໃນ​ລະດັບ​ແຂວງ ​ແລະ ​ເມືອງ, ຖານ​ຂໍ້​ມູນ​ດ້ານ​ໂປຣຟາຍ ​ເປັນ​ເຄື່ອງ​ເຜີຍ​ແຜ່​ຂໍ້​ມູນທີ່​ເບີ່​ງງ່າຍ, ​ໄວ​ໂດຍ​ການ​ສັງ​ລວມ​ເອົາ​ບັນດາ​ຕົວ​ຊີ້​ບອກ​ທີ່​ສຳຄັນ​ເປັນ​ບູລິມະສິດ​ຂອງ​​ແຂວງ, ​ເມືອງ​​ເປັນ​ຈຸດ​ລວມ ກັນ ​ເຊິ່ງ​ສາມາດ​ສະ​ແດງ​ຂໍ້​ມູນ​ໃນ​ຮູບ​ແບບ ​ແຜນ​ທີ່, ຕາ​ຕະລາງ, ​ເສັ້ນ​ສະ​ແດງຂໍ້​ມູນ​ທັງ​ໝົດ​ນັ້ນ​ເປັນ​ຂໍ້​ມູນ​ຊ່ວຍ​ໃນ​ການ​ຕັດສິນ.

ພາຍຫຼັງທີ່ ທ່ານ ຄຳ​ກິ່​ງ ​ແກ້ວ​ສຸພັນ ຫົວໜ້າ​ສູນ​ສະຖິຕິ​ປະຈຳ​ແຂວງ ສາລະ​ວັນໄດ້ສະເໜີກ່ຽວກັບການນຳໃຊ້ແລ້ວ, ​ໃນ​ກອງ​ປະຊຸມ​​ໄດ້​ມີການ​ປະກອບ​ຄຳ​ເຫັນ ​ແລກປ່ຽນ​ບົດຮຽນ​ເຊິ່ງ​ກັນ ​ແລະ​ ກັນ​ ລະຫວ່າງ​ແຂວງ, ​ເມືອງພ້ອມ​ດ້ວຍ​ບັນດາ​ພະ​ແນ​ກການ​ຕ່າງໆ ​ແລະ​ ຕ່າງ​ແຂວງ ​ເພື່ອ​ຖອດ​ຖອນ​ເອົາ​ບົດຮຽນ​ດັ່ງກ່າວ ​ເຂົ້າ​ນຳ​ໃຊ້​​ໃນ​ໜ້າ​ວຽກ​ສະຖິຕິ ​ທີ່​ເຫັນ​ວ່າ​ຍັງ​ບໍ່​ທັນ​ເຂົ້າ​ໃຈ, ​ທີ່​ເປັນ​ຂໍ້ຄົງຄ້າງ​ໃນ​ໄລຍະ​ຜ່ານມາ ​ໃຫ້​ຮັບ​ການ​ແກ້​ໄຂພາຍຫຼັງ​ທີ່​ໄດ້​ຝຶກ​ອົບຮົມ​ດ້ານ​ບົດຮຽນ​ດັ່ງກ່າວ​ ​ເພື່ອເຂົ້າມາ​ນຳ​ໃຊ້​​ໃນ​ວຽກ​ງານ​ຕົວ​ຈິງ ​ໃຫ້​ເກີດ​ດອກ​ອອກ​ຜົນ ​ແລະ ​ເຊື່ອມ​ໂຍງ​ກັນ​ໄດ້​ຢ່າງ​ວ່ອງ​ໄວພ້ອມດຽວກັນນັ້ນ ທ່ານ ດຣ ສະ ໄໝຈັນ ບຸບຜາ ຄະນະບໍລິຫານງານພັກກະຊວງແຜນການ ແລະ ການລົງທຶນ, ຫົວໜ້າສູນສະຖິຕິແຫ່ງຊາດ ກໍໄດ້ລວບລວມ ແລະ ໃຫ້ຄຳໂອ້ລົມຕ່າງໆຕໍ່ກັບການສະ ເໜີຂອງແຕ່ລະທ່ານ ເພື່ອນຳໄປແກ້ໄຂ ແລະ ຄົ້ນຄວ້າພິຈາລະນາໃນທິດທາງແຜນການຕໍ່ໜ້າ.
ຕອນທ້າຍ ທ່ານ ວິຊຽນ ນະວິກຸນ ຄະນະປະຈໍາພັກແຂວງ, ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດ ກໍໄດ້ຂຶ້ນສະແດງຄວາມຊົມເຊີຍ ແລະ ໃຫ້ຄຳຄິດຄຳເຫັນໃນການນຳໄປຈັດຕັ້ງປະຕິບັດໃຫ້ມີຄວາມສະດວກວອງໄວ ແລະ ທ່ວງທັນກັບເວລາ ມາຮອດເວລາ 12: 00 ກໍໄດ້ກ່າວປິດກອງປະຊຸມທາງການ.