ກອງປະຊຸມເຜີຍແຜ່ພາລະບົດບາດການຈັດຕັ້ງ ແລະ ເຄື່ອນໄຫວຂອງຄະນະກຳມາທິການເພື່ອຄວາມກ້າວໜ້າຂອງແມ່ຍິງວຽກແມ່ ແລະ ເດັກເມືອງສາລະວັນ

ຕອນເຊົ້າຂອງວັນທີ 4 ພະຈິກ 2015 ທີ່ຜ່ານມານີ້ ຢູ່ທີ່ສະໂມສອນເມືອງ ສາລະວັນ ໄດ້ເປີດກອງປະຊຸມເຜີຍແຜ່ພາລະບົດບາດການຈັດຕັ້ງ ແລະ ເຄື່ອນໄຫວຂອງຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ, ວຽກແມ່ ແລະ ເດັກເມືອງສາລະວັນ ໂດຍພາຍໃຕ້ການເປັນປະທານຂອງທ່ານ ນາງ ນວນໃສ ແກ້ວເມກ ຄະນະປະຈໍາພັກເມືອງ, ຜູ້ຊີ້ນຳວຽກງານວັດທະນະທຳ-ສັງຄົມ, ທັງເປັນປະທານຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ວຽກແມ່ ແລະ ເດັກຂັ້ນເມືອງ ເຊິ່ງມີບັນດາກຳມະການພັກເມືອງ, ຫົວໜ້າຫ້ອງການ, ຮອງຫ້ອງການ ແລະ ຄະນະກໍາມາທິການເພື່ອຄວາມກ້າວໜ້າຂອງແມ່ຍິງວຽກແມ່ ແລະ ເດັກ ເຂົ້າຮ່ວມທັງໜົດ 27 ທ່ານ, ຍິງ 17 ທ່ານ.
ກອງປະຊຸມໄດ້ດໍາເນີນໄປເປັນເວລາ 1 ຄາບ ແລະ ໄດ້ຮັບຟັງການຜ່ານຂໍ້ຕົກລົງແຕ່ງຕັ້ງຫົວໜ້າກອງເລຂາ ຄກມ.ຄມດ ຂັ້ນເມືອງຮັບຟັງການຜ່ານພາລະບົດບາດການຈັດຕັ້ງ ແລະ ເຄື່ອນໄຫວຂອງ ຄກມ.ຄມດ ຂັ້ນເມືອງ ຜ່ານຍຸດທະສາດແຫ່ງຊາດເພື່ອຄວາມກ້າວໜ້າຂອງແມ່ຍິງໄລຍະ III ສົກປີ 2015 – 2020 ແລະ ຜ່ານສົນທິສັນຍາວ່າດ້ວຍ ການລົບລ້າງທຸກຮູບການ ຈໍາແນກຕໍ່ແມ່ຍິງ ( ຊີດໍ ) ໃນກອງປະຊຸມຍັງໄດ້ປັດປ່ຽນກັນປະກອບຄໍາເຫັນເຊິ່ງມີທັງສິ່ງພົ້ນເດັ່ນ ແລະ ສິ່ງຫຍໍ້ທໍ້ໃນການຈັດຕັ້ງ ແລະ ເຄື່ອນໄຫວໃນວຽກງານຜ່ານມາ.
ຕອນທ້າຍຂອງກອງປະຊຸມ ທ່ານ ນາງ ມະນີລາ ຈັນທະວົງສາ ຮອງຫົວໜ້າກອງເລຂາຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ວຽກແມ່ ແລະ ເດັກຂັ້ນແຂວງ ຍັງໄດ້ເນັ້ນຕື່ມບາງບັນຫາທີ່ຄວນເອົາໃຈໃສ່ຄື:
1. ການປັບປຸງ ແລະ ການຂະຫຍາຍການຈັດຕັ້ງໃນຂັ້ນເມືອງລົງຮອດບ້ານ ປະກອບບຸກຄະລາກອນຊ່ວຍວຽກຄວາມກ້າວໜ້າຂອງແມ່ຍິງ ວຽກແມ່ ແລະ ເດັກໃຫ້ໜັກແໜ້ນເຂັ້ມແຂງປະກອບມີທັງຍິງ ແລະ ຊາຍ.
2. ຕິດຕາມຊຸກຍູ້ກ່ຽວກັບການສ້າງຄອບຄົວ,ບ້ານ,ເມືອງຕິດພັນກັບການປະຕິບັດສິດສະເໜີພາບລະຫ່ວາງຍິງ-ຊາຍ ແລະ ປະຕິບັດຈາກການໃຊ້ຄວາມຮຸນແຮງຕໍ່ແມ່ຍິງໃຫ້ໄດ້ຮັບໜາກຜົນໃນລະດັບສູງ ແລະ ເກັບກໍາຂໍ້ມູນສະຖິຕິແຍກເພດຍິງ – ຊາຍໃຫ້ລະອຽດເຊັດເຈນ.
3. ຊຸດຍູ້ກ່ຽວກັບການຈັດຕັ້ງປະຕິບັດແຜນນະໂຍບາຍແຫ່ງຊາດ ເພື່ອຄວາມກ້າວໜ້າຂອງແມ່ຍິງໄລຍະ III ສົກປີ 2015 – 2020 ແລະ ແຜນຍຸດທະສາດແຫ່ງຊາດເພື່ອແມ່ ແລະ ເດັກໃຫ້ປະກົດຜົນເປັນຈິງ.
4. ຊຸກຍູ້ຕິດຕາມກ່ຽວກັບການປະຕິບັດສົນທິສັນຍາກ່ຽວກັບການລົບລ້າງທຸກຮູບການທີ່ຈໍາແນກຕໍ່ແມ່ຍິງ ( ຊີດໍ ) ສົນທີສັນຍາວ່າດ້ວຍ ສິດທີເດັກ ແລະ ການປະຕິບັດເປົ້າໜາຍສະຫັດສະວັດດ້ານການພັດທະນາໃຫ້ບັນລຸຜົນຕາມລະດັບຄາດໜາຍ.
5. ຊຸກຍູ້ກະກຽມສ້າງຂະບວນການສະເຫຼີມສະຫຼອງວັນສາກົນຕ້ານການໃຊ້ຄວາມຮຸນແຮງຕໍ່ແມ່ຍິງ 25 ພະຈິກຄົບຮອບ 54 ປີ ແລະ ວັນສົນທິສັນຍາສາກົນວ່າດ້ວຍສິດທິເດັກຄົບຮອບ 25 ປີ ໃຫ້ເປັນຂະບວນການຟົດຟື້ນ. ມາຮອດເວລາ 11 ໂມງ 30 ນາທີ ກອງປະຊຸມໄດ້ຈົບລົງດ້ວຍຜົນສໍາເລັດອັນຈົບງາມ.