ກອງປະຊຸມສະຫຼຸບຕີລາຄາ ແລະ ປຶກສາຫາລືກ່ຽວກັບການຈັດຕັ້ງປະຕິບັດແຈ້ງການຂອງຫ້ອງວ່າການລັດຖະບານ ສະບັບ ເລກທີ 1434/ຫລບ.ກລຂ

ຕອນ​ເຊົ້າ ​ເວລາ 8:30 ​ໂມງ ຂອງ​ວັນ​ທີ 4 ກຸມພາ 2015 ຢູ່​ທີ່​ຫ້ອງ​ປະຊຸມ​ຊັ້ນ III ຫ້ອງ​ວ່າການ​ປົກຄອງ​ແຂວງ​ສາລະ​ວັນ ​ໄດ້​ຈັດ​ກອງ​ປະຊຸມ​ສະຫຼຸບຕີ​ລາຄາ ​ແລະ ປຶກສາ​ຫາລື ກ່ຽວກັບ​ການຈັດ​ຕັ້ງ​ປະຕິບັດ​ແຈ້ງ​ການ​ຂອງ​ຫ້ອງ​ວ່າການ​ລັດຖະບານ ສະບັບ​ເລກທີ 1434/ຫລບ.ກລຂ ​ເລື່ອງ: ການ​ແກ້​ໄຂ​ສະພາບ​ພົ້ນ​ເດັ່ນກ່ຽວກັບ​ທຸລະ​ກິດ​ໄມ້ ຢູ່​ແຂວງ​ສາລະ​ວັນ. ​ໂດຍ​ພາຍ​ໃຕ້​ການ​ເປັນ​ປະທານ​ຂອງ ທ່ານ ສີ​ເຮັງຫອມ​ສົມບັດ ກຳມະການ​ປະຈຳ​ພັກ​ແຂວງ, ຮອງ​ເຈົ້າ​ແຂວງໆສາລະ​ວັນ ​ແລະ ມີ​ຜູ້​ເຂົ້າ​ຮ່ວມ​ຈາກ​ຂະ​ແໜງການ​ກ່ຽວຂ້ອງ​ອ້ອມ​ຂ້າງ​ແຂວງ ​ແລະ ​ເຈົ້າ​ເມືອງ – ຮອງ​ເຈົ້າ​ເມືອງ ຈຳນວນ 22 ທ່ານ. ກອງ​ປະຊຸມ​ໄດ້​ຮັບ​ຟັງ​ການ​ລາຍ​ງານ​ກ່ຽວກັບ​ການຈັດ​ຕັ້ງ​ປະຕິບັດ​ແຈ້ງ​ການ 1434 ​ແລະ ຄຳ​ສັ່ງ​ 07 ຂອງ​ເຈົ້າ​ແຂວງ ​ໃນ​ໄລຍະ​ຜ່ານ​ມາ​ ຈາກ​ພະ​ແນ​ກກະສິກຳ-ປ່າ​ໄມ້, ພະ​ແນ​ກອຸດ​ສະຫະ​ກຳ ​ແລະ ການ​ຄ້າ, ຂະ​ແໜງການ​ກ່ຽວຂ້ອງ ​ແລະ ບັນດາ​ເມືອງ. ຈາກ​ນັ້ນ, ທ່ານ ຮອງ​ເຈົ້າ​ແຂວງ​ກໍ່​ໄດ້​ປະກອບ​ຄຳ​ຄິດຄຳ​ເຫັນ ທັງເນັ້ນໜັກ​ໃຫ້​ບັນດາ​ຂະ​ແໜງການ​ທີ່​ກ່ຽວຂ້ອງ ​ແລະ ​ບັນດາເມືອງ​​ໃນທົ່ວ​ແຂວງ​ ຈົ່ງສຶບຕໍ່​ເອົາ​ໃຈໃສ່ຈັດ​ຕັ້ງ​ປະຕິບັດ​ວຽກງານ​ດັ່ງກ່າວ​ໃຫ້​ໄດ້​ຮັບ​ຜົນສຳ​ເລັດ ​ແລະ ​ມີ​ປະ ສິດທິພາບ​ສູງ.

ກອງ​ປະຊຸມ​ຄັ້ງ​ນີ້ ​ໄດ້​ປິດ​ລົງ​ໃນ​ເວລາ 11:30 ​ໂມງ ຂອງ​ວັນ​ດຽວກັນ.