SONY DSC

ກອງປະຊຸມສະຫຼຸບຂະບວນການແຂ່ງຂັນ 3 ດີ ຂອງໜ່ວຍສະຫະພັນແມ່ຍິງ ກອງເລຂາຄະນະກຳ ມາທິການ ເພື່ອຄວາມກ້າວໜ້າຂອງແມ່ຍິງ, ວຽກແມ່ ແລະ ເດັກແຂວງ ສາລະວັນ.

ກອງປະຊຸມສະຫຼຸບຂະບວນການແຂ່ງຂັນ 3 ດີ ໄລຍະທີ III ແລະ ເປີດຂະບວນການແຂ່ງຂັນ 3 ດີຂອງໜ່ວຍສະຫະພັນແມ່ຍິງ ກອງເລຂາຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ວຽກແມ່ ແລະ ເດັກແຂວງ ໄດ້ຈັດຂຶ້ນໃນຄັ້ງ ວັນທີ 1 ທັນວາ 2015 ທີ່ຫ້ອງປະຊຸມຊັ້ນ III ຫ້ອງວ່າການປົກຄອງແຂວງ ໂດຍພາຍໃຕ້ການເປັນຄະນະປະທານຮ່ວມຂອງ ທ່ານ ນາງ ດວງມາລາ ສີສະໝຸດ ຄະນະບໍລິຫານງານສະຫະພັນແມ່ຍິງແຂວງ ຮອງປະທານສະຫະພັນແມ່ຍິງແຂວງ, ທ່ານ ເຄນຄຳ ວໍລະຈິດ ຄະນະພັກຮາກຖານຫ້ອງວ່າການປົກຄອງ ແຂວງ ທ່ານ ນາງ ມະນີລາ ຈັນທະວົງສາ ມີແຂກເຂົ້າຮ່ວມຈາກໜ່ວຍສະຫະພັນແມ່ຍິງອ້ອມຂ້າງໜ່ວຍ, ຕາງໜ້າອົງການຈັດຕັ້ງຊາວໜຸ່ມ, ອົງການຈັດຕັ້ງກຳມະບານ ແລະ ແຂກທີ່ຖືກເຊີນ ຈຳນວນ 26 ທ່ານ, ຍິງ 18 ທ່ານ.

ກອງປະຊຸມຄັ້ງນີ້ ແມ່ນເພື່ອສະຫຼຸບການນຳພາຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍຕະຫຼອດໄລຍະ 1 ປີ ທີ່ຜ່ານມາ 2014 – 2015 ຜ່ານການກວດກາປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 3 ດີ ສາມາດຄັດເລືອກສະມາຊິກ 3 ດີ ປະເພດ 1 ໄດ້ 6 ສະຫາຍເທົ່າກັບ 100 % ກອງປະຊຸມໄດ້ດຳເນີນການຍ້ອງຍໍຂະບວນການ ດັ່ງກ່າວໂດຍ ມອບໃບຍ້ອງຍໍຂອງສູນກາງແມ່ຍິງລາວໃຫ້ໜ່ວຍທີ່ເປັນໜ່ວຍ 3 ດີ, ຄະນະຊີ້ນຳ 3 ດີ ແລະ ສະມາຊິກ 3 ດີ ແລະ ມອບໃບຍ້ອງຍໍຂອງສະຫະພັນແມ່ຍິງແຂວງໃຫ້ສະມາຊິກແມ່ຍິງ 3 ດີ ຈາກນັ້ນ ກໍໄດ້ມີການເປີດຂະບວນການແຂ່ງຂັນຕໍ່2015 – 2016 ເພື່ອເຮັດໃຫ້ສະມາຊິກແມ່ຍິງມີຄຸນທາດທາງດ້ານການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຮັກສາໄດ້ຄຸນລັກສະນະທີ່ເປັນມູນເຊື້ອຂອງແມ່ຍິງລາວ, ມີຄວາມສາມັກຄີເປັນປຶກແຜ່ນແໜ້ນໜາ.

ຕອນທ້າຍຜູ້ເຂົ້າຮ່ວມຍັງໄດ້ຮັບຟັງການໂອ້ລົມຈາກ ທ່ານ ນາງ ດວງມາລາ ສີສະໝຸດ ຮອງປະທານສະຫະພັນແມ່ຍິງແຂວງ, ທ່ານໄດ້ຮຽກຮ້ອງໃຫ້ສະມາຊິກສະຫະພັນແມ່ຍິງໃນໜ່ວຍຍົກສູງລະດັບການສຶກສາ, ສ້າງທຸກເງື່ອນໄຂໃຫ້ແມ່ຍິງໄດ້ຮັບການພັດທະນາໃນທຸກດ້ານເຕົ້າໂຮມຄວາມສາມັກຄີໃຫ້ເປັນປຶກແຜ່ນແໜ້ນໜາ, ສຶກສາອົບຮົມການເມືອງແນວຄິດໃຫ້ພ້ອມກັນເອົາໃຈໃສ່ຈັດຕັ້ງປະຕິບັດດຂໍ້ແຂ່ງຂັນ 3 ດີ ໃຫ້ບັນລຸຕາມລະດັບຄາດໝາຍທີ່ວາງໄວ້.