ກອງປະຊຸມປືກສາຫາລືກ່ຽວກັບການສ້າງເຂດເສດຖະກິດສະເພາະຢູ່ແຂວງ ສາລະວັນ

ຕອນເຊົ້າວັນທີ 16 ກັນຍາ 2015 ເວລາ 8:30 ໂມງ ຢູ່ທີ່ສະໂມສອນໃຫ່ຍຂອງແຂວງສາລະວັນ ຫ້ອງ VIP ໄດ້ຈັດກອງປະຊຸມປືກສາຫາລືກ່ຽວກັບການສ້າງຕັ້ງເຂດເສດຖະກິດສະເພາະຢູ່ແຂວງ ສາລະວັນໂດຍພາຍໃຕ້ການເປັນປະທານຮ່ວມຂອງ ທ່ານ ວິຊຽນ ນະວິກຸນ ຄະນະປະຈຳພັກແຂວງ ຮອງເຈົ້ົ້າແຂວງໆສາລະວັນ, ຜູ້ຊີ້ນຳວຽກງານເສດຖະກິດ ແລະ ທ່ານ ນາງ ບົວທາ ຂັດທິຍະ ລັດຖະມົນຕິຊ່ວຍ, ຮອງປະທານ, ຫົວໜ້າກອງເລຂາຄະນະກຳມະການແຫ່ງຊາດລາວ ເພື່ອຄຸ້ມຄອງເສດຖະກິດພິເສດ ແລະ ເຂດເສດຖະກິດສະເພາະ ( ຄຂພສ ) ມີຜູ້ເຂົ້າຮ່ວມປືກສາຫາລື ຈຳນວນ 14 ທ່ານ, ຍິງ 3 ທ່ານ. ກອງປະຊຸມໄດ້ຮັບຟັງການສະເໜີສະພາບການພັດທະນາເຂດເສດຖະກິດພິເສດ ແລະ ເຂດເສດຖະກິດສະ ເພາະໃນຂອບ ເຂດທົ່ວປະເທດ ແລະ ແນະນຳກ່ຽວກັບການສະເໜີສ້າງເຂດເສດຖະກິດສະເພາະຢູ່ແຂວງ ສາລະວັນ ຈາກນັ້ນ ທ່ານ ນາງ ບົວທາ ຂັດທິຍະ ຫົວໜ້າກອງເລຂາ ຄຂພສ ແລະ ການອະທິບາຍກ່ຽວກັບກົນໄກໃນການພັດທະນາຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດ ສະເພາະຢູ່ລາວເວົ້າສະເພາະ ກໍຄື ແຂວງ ສາລະວັນ ຂອງພວກເຮົາໃຫ້ເຂົ້າໃຈກ່ຽວກັບການສ້າງຕັ້ງເຂດເສດຖະກິດສະ ເພາະແຂວງ ສາລະວັນ. ໂດຍບັນຫາທີ່ຍົກຂື້ນມານັ້ນ ກໍລ້ວນແຕ່ມີຄວາມສຳຄັນເພື່ອນຳໄປຈັດຕັ້ງປະຕິບັດໃນຕໍ່ໜ້າ, ພ້ອມນັ້ນກອງປະຊຸມກໍ່ໄດ້ເປັນເອກະພາບກັນບາງບັນຫາດັ່ງນີ້:
1. ທາງດ້ານຫຼັກການແມ່ນເຫັນດີຕາມການສະເໜີຂອງແຂວງ ໃນການສ້າງເສດຖະກິດສະເພາະ 1 ເຂດ ເປັນເຂດເສດຖະ ກິດສະເພາະດິນບໍ່ຕໍ່ແຜ່ນ ມີ 2 ຈຸດຄື: ຈຸດດ່ານລະໄລ ແລະ ຈຸດນາປົ່ງ ໂດຍໃຫ້ຂຶ້ນກັບສະພາບໍລິຫານດຽວ, ທັງນີ້ ກໍອີງໃສ່ທ່າແຮງ ແລະ ຄວາມອາດສາມາດຂອງແຂວງໃນການສ້າງເຂດດັ່ງກ່າວ. ຖ້າບໍ່ດັ່ງນັ້ນ ກໍໃຫ້ສ້າງຈຸດດຽວກ່ອນ ເພື່ອສະດວກໃນການກະກຽມແລ້ວແຕ່ເງື່ອນໄຂ.
2. ເຫັນດີໃຫ້ແຂວງຊອກຄູ່ຮ່ວມພັດທະນາເອງ ໃນການພັດທະນາເຂດເສດຖະກິດສະເພາະຂອງແຂວງ ໂດຍເລືອກເຟັ້ນເອົານັກລົງທືນພາຍໃນທີ່ມີທືນ, ມີຄວາມສາມາດ ແລະ ມີປະສົບການແທ້ໆມາເປັນຄູ່ຮ່ວມພັດທະນາແລ້ວສະເໜີຜ່ານກອງເລຂາ ຄຂພສ ພິຈາລະນາຕື່ມ.
3. ໃຫ້ແຂວງແຕ່ງຕັ້ງຄະນະນຳ ແລະ ວິຊາການຜູ້ທີ່ມີຄວາມຮູ້, ຄວາມສາມາດ, ປະສົບການ ເພື່ອແຕ່ງຕັ້ງເປັນຄະ ນະໜຶ່ງ ໃນການກະກຽມສ້າງເຂດເສດຖະກິດສະເພາະຢູ່ແຂວງສາລະວັນ ໃຫ້ປະກົດຜົນເປັນຈິງ.
4. ສຳລັບການສຳຫຼວດເບື້ອງຕົ້ນ ອາດຈະໃຫ້ຄະນະວິຊາການທີ່ມີປະສົບການຂອງແຂວງ ລົງສຳຫຼວດເກັບກຳຂໍ້ມູນເບື້ອງ ຕົ້ນ ຫຼື ອາດຈະໃຊ້ງົບປະມານຂອງແຂວງແລ້ວແຕ່ຄວາມເໜາະສົມ ແລະ ເງື່ອນໄຂຕົວຈິງ, ມາຮອດເວລາ 11 : 30 ໂມງຂອງວັນດຽວ ກັນກອງປະຊຸມຈິ່ງໄດ້ປິດລົງ.