ກອງປະຊຸມຄົ້ນຄ້ວາປືກສາຫາລືກ່ຽວກັບການຈັດຕັ້ງປະຕິບັດ 2 ວັນປະຫວັດສາດ ຄື ວັນສະຖາປານາ ສປປ ລາວ ຄົບຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວີຫານ ຄົບຮອບ 95 ປີ

ຕອນບ່າຍເວລາ 13:30 ໂມງ, ຂອງວັນທີ 25 ພະຈິກ 2015 ຢູ່ທີ່ຫ້ອງປະຊຸມຊັ້ນ III ຂອງຫ້ອງວ່າການປົກຄອງແຂວງ ສາລະວັນ ໄດ້ເປີດກອງປະຊຸມຄົ້ນຄ້ວາປຶກສາຫາລືກ່ຽວກັບການສະເຫຼີມສະຫຼອງ 2 ວັນປະຫວັດ ສາດ ຄື: ວັນສະຖາປານາ ສປປ ລາວ ຄົບຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 95 ປີ ໂດຍພາຍ ໃຕ້ການເປັນປະທານຂອງ ທ່ານ ບຸນທຽມ ພົມມະສະຖິດຄະນະປະຈຳພັກແຂວງ, ຮອງເລຂາພັກແຂວງ, ຮອງຫົວໜ້າຄະນະຊີ້ນຳສະເຫຼີມສະຫຼອງ 2 ວັນປະຫວັດສາດເຊຶ່ງມີຜູ້ເຂົ້າຮ່ວມທັງໜົດ ຈໍານວນ 28 ທ່ານ. ພາຍຫຼັງທີ່ອະນຸກໍາມະການລາຍງານຄວາມຄືບໜ້າ ແລະ ແຜນໃນຕໍ່ໜ້າແລ້ວ ທ່ານປະທານກອງປະຊຸມຍັງໄດ້ຊີ້ນຳ ແລະ ເນັ້ນໜັກດັ່ງນີ້:
1. ໃຫ້ແຕ່ລະອະນຸກໍາມະການເອົາໃຈໃສ່ປະຕິບັດໜ້າທີ່ຂອງຕົນເອງຢ່າງມີຄວາມຮັບຜິດຊອບ ແລະ ມີຜົນສຳເລັດ ພ້ອມນີ້ ກໍໃຫ້ສືບຕໍ່ປັບປຸງແຜນຂອງຕົນໃຫ້ສອດຄ່ອງກັບວຽກ ແລະ ກິດຈະກໍາທີ່ຈະເຮັດຕົວຈິ່ງ.
2. ແຕ່ລະອະນຸກໍາມະການເນື້ອໃນ, ໃຫ້ເອົາໃສ່ປັບປຸງເອກະສານຕ່າງໆຕາມການແນະນໍາຂອງທ່ານເລຂາພັກແຂວງໃຫ້ສຳເລັດ ພ້ອມກວດກາເນື້ອໃນ, ຂະໜາດຕົວໜັງສື ແລະ ອື່ນໆ ໃຫ້ເໜາະສົມ.
3. ອະນຸກໍາມະການ ປກຊ – ປກສ ໃຫ້ເອົາໃຈໃສ່ຕິດຕາມກຸ່ມເປົ້າໜາຍ, ພ້ອມທັງຈັດວາງກ້ອນກໍາລັງໃຫ້ເຂັ້ມງວດຂຶ້ນຕື່ມ, ເມື່ອມີສະພາບການຕ້ອງແກ້ໄຂໃຫ້ທ່ວງທັນຕາມເວລາ.
4. ອະນຸກໍາມະການເສດຖະກິດ ໃຫ້ເອົາໃຈໃສ່ຈັດວາງແຜນງົບປະມານໃຫ້ແຕ່ລະອະນຸກໍາມະການໃຫ້ເໜາະສົມ, ພ້ອມນີ້ ກໍເອົາໃຈໃສ່ລະດົມທຶນໃຫ້ທຸກພາກສ່ວນມີສ່ວນຮ່ວມໃນການປະກອບສ່ວນເພາະເປັນງານບຸນສຳຄັນຂອງຊາດ, ພາຍຫຼັງທີ່ສຳເລັດງານສະເຫຼີມສະຫຼອງແລ້ວ ໃຫ້ສະຫຼຸບສັງລວມການໃຊ້ຈ່າຍທັງໜົດໃຫ້ຂັ້ນເທິງຮັບຊາບ.
5. ອະນຸກຳມະການ ແລະ ພິທີການຮັບແຂກ, ຕ້ອງເອົາໃຈໃສ່ຈັດວາງວາລະຄັກແນ່, ສ້າງເປັນແຜນງານລະອຽດ ຮັບປະກັນໃຫ້ແຂກທີ່ເຂົ້າຮ່ວມມີຄວາມສະດວກ, ຈັດວາງທີ່ພັກ, ອາຫານການກິນ ແລະ ສະຖານທີ່ທ່ອງທ່ຽວໃຫ້ມີຄວາມເໝາະສົມ, ສຳລັບງົບປະມານຖ້າຍັງບໍ່ທັນມີ ກໍໃຫ້ຂຶ້ນແຜນສະເໜີຂັ້ນເທີງພິຈາລະນາ.
6. ອະນຸກຳມະການໂຄສະນາ ປຸກລະດົມໃຫ້ມ່ວນຊົນເຂົ້າຮ່ວມໃຫ້ໄດ້ຫຼາຍ, ຮັບປະກັນໃຫ້ມີຄວາມມ່ວນຊື່ນ, ຄວາມສະຫົງບ ແລະ ຄວາມປອດໄພ.
7. ອະນຸກຳມະການສະຖານທີ່ ໃຫ້ກະກຽມສະຖານທີ່ໃຫ້ເໝາະສົມ ໃຫ້ມີທາງເຂົ້າ – ອອກ ໃຫ້ມີຄວາມສະ ດວກ ຮັບປະກັນເມື່ອມີບັນຫາສາມາດແກ້ໄດ້ທ່ວງທັນ, ສະຖານທີ່ຈອດລົດ ກໍໃຫ້ຈັດສັນໃຫ້ເໝາະສົມ, ໃຫ້ ປກສ ແຂວງ ແລະ ເມືອງ ສາລະວັນ ເປັນຜູ້ຮັບຜິດຊອບ.
8. ອະນຸກຳມະການວາງສະແດງ, ກໍໃຫ້ເອົາໃຈໃສ່ກວດກາຄືນ ບັນດາພະແນກການ, ທີ່ຈະນຳເອົາຜົນງານຂອງຕົນລົງວາງສະແດງ, ຈະວາງຢູ່ຈຸດໃດ ເພື່ອໃຫ້ທຸກພາກສ່ວນມີສ່ວນຮ່ວມໃນການວາງສະແດງຜົນງານຂອງຕົນ.
9. ສ່ວນອະນຸກຳມະການອື່ນໆ ກໍໃຫ້ປະຕິບັດໜ້າທີ່ວຽກງານຂອງຕົນເປັນປົກກະຕິ. ມາຮອດເວລາ 16:00 ໂມງ ຂອງວັນດຽວກັນ, ກອງປະຊຸມຈິ່ງໄດ້ປິດລົງ.