ກອງປະຊຸມຄົ້ນຄວ້າປຶກສາຫາລືການກະກຽມວຽກງານສະເຫຼີມສະຫຼອງ 2 ວັນປະຫວັດສາດ

ຕອນເຊົ້າຂອງ ວັນທີ 18 ມີນາ 2015 ເວລາ 8: 30 ໂມງ ຢູ່ທີ່ຫ້ອງຮັບຮອງ 207 ຂອງຫ້ອງວ່າການປົກຄອງແຂວງ ສາ​ລະ​ວັນ, ໄດ້​ຈັດ​ກອງ​ປະ​ຊຸມ​ຄົ້ນ​ຄວ້າ​ປຶກ​ສາ​ຫາ​ລື​ ກ່ຽວ​ກັບ​ການ​ກະ​ກຽມງານ​ສະ​ເຫຼີມ​ສະຫຼອງ 2 ວັນ​ປະ​ຫວັດ​ສາດ​ຄື: ວັນ​ສ້າງ​ຕັ້ງພັກ​ປະ​ຊາ​ຊົນ​ປະ​ຕິ​ວັດ​ລາວ ຄົບ​ຮອບ 60 ປີ ແລະ ວັນ​ສະ​ຖາ​ປະ​ນາ ສ​າ​ທາ​ລະ​ນະ​ລັດ ປະ​ຊາ​ທິ​ປະ​ໄຕ​ ປະ​ຊາ​ຊົນ​ລາວ ຄົບ​ຮອບ 40 ປີ. ໂດຍ​ໃຫ້​ກຽດ​ເປັນ​ປະ​ທານ​ຂອງທ່ານ ບົວ​ທອງ ​ຄຸນຍອດ​ປັນ​ຍາ, ຮອງ​ເລ​ຂາ​ພັກ​ແຂວງ ຫົວ​ໜ້າ ຄະ​ນະ​ຈັດ​ຕັ້ງ​ແຂວງ ທັງ​ແມ່ນ​ຫົວ​ໜ້າ​ຄະ​ນະຊີ້​ນຳ​ວຽກ​ງານ​ການ​ກະ​ກຽມງານ​ສະ​ເຫຼີມ​ສ​ະຫຼອງ 2 ວັນ​ປະ​ຫວັດ​ສາດ, ກອງ​ປະ​ຊຸມຄັ້ງ​ນີ້ ​ມີ​ຜູ້​ເຂົ້າ​ຮ່ວມຈາກ​ຄະ​ນະ​ຊີ້​ນຳ ແລະ ອະ​ນຸ​ກຳ​ມະ​ການ​ຕ່າງໆ ​ຕາມ​ມະ​ຕິ​ຕົກ​ລົງ​ຂອງ​ຄະ​ນະ​ປະ​ຈຳ​ພັກ​ແຂວງ ສາ​ລະ​ວັນ, ເລກ​ທີ 43 / ຄ​ຈ​ພ​ຂ. ສວ, ລົງ​ວັນ​ທີ 18 ທັນ​ວາ 2014 ຈຳ​ນວນ 18 ທ່ານ.

ກອງ​ປະ​ຊຸ​ມ​ຍັງ​ໄດ້​ຮັບ​ຟັງ​ການ​ລາຍ​ງານ​ຈາກ ທ່ານ ຄຳ​ຈັນ​ ແຈ່ມ​ສະ​ໝອນ, ກຳ​ມະ​ການ​ປະ​ຈຳ​ພັ​ກ​ແຂວງ, ຫົວ​ໜ້າ​ຄະ​ນະ​ໂຄ​ສະ​ນາ​ອົມ​ຮົບ​ແຂວງ ແລະ ໄດ້​​ຮັບ​ຟັງ​ການ​ລາຍ​ງານ ແລະ ປະ​ກອບ​ຄຳ​ຄິດ​ຄຳ​ເຫັນ ​ຈາກ​ບັນ​ດາຫົວ​ໜ້າ ອະ​ນຸ​ກຳ​ມະ​ການ​ຕ່າງໆ ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດວຽກງານຕາມ​ຄວາມ​ຮັບ​ຜິດ​ຊອບ​. ຫຼັງຈາກນັ້ນ ທ່ານ ປະ​ທານກອງ​ປະ​ຊຸມ ກໍ່​ໄດ້​​ມີ​ຄວາມ​ເຫັນ ເຊີ່ງ​ທ່ານ​ໄດ້ສະ​ແດງ​ຄວາມເປັນ​ເອ​ກະ​ພາບສູງຕໍ່​ກອງ​ປະ​ຊຸມ ແລະ ໃຫ້ແຕ່​ລະ​ອຸ​ກຳ​ມະ​ການ ກະ​ກຽມເນື້ອ​ໃນ, ວັນ​ເວ​ລາ ແລະ ເປົ້າ​ໝາຍ, ການ​ວາງ​ສະ​ແດງ​ຮູບ​ພາບ, ຂະ​ບວນ​ການ, ປ້ອງ​ກັນ​ຄວາມ​ສະ​ຫ​ງົບ, ລົງ​ພົບ​ປະຢ້ຽມ​ຢາມ​ກົມ​ກອງ, ບ້ານ​, ຍ້ອງ​ຍໍບຸກ​ຄົນ​ທີ່​ດີ​ເດັ່ນ​ ໃນ​ຂະ​ບວນ​ການ​ປົກ​ປັກ​ຮັກ​ສາ ແລະ ສ້າງ​ສາ​ປະ​ເທດ​ຊາດ​ໃນ​ໄລ​ຍະ​ທີ່​ຜ່ານ​ມາ ແລະ ປະ​ຈຸ​ບັນ, ນອກ​​ຈາກນັ້ນ: ​ທ່ານຍັງ​ເນັ້ນ​ໜັກ​ໃຫ້​ແຕ່​ລະ​ອະ​ນຸ​ກຳ​ມະ​ກ​ານຕ້ອງ​ເປັນ​ເຈົ້າ​ການ​ໃນ​ການ​ຈັດ​ຕັ້ງ​ປະ​ຕິ​ບັດ​ພາ​ລະ​ບົດ​ບາດ​ຂອງ​ຕົນ​ໃຫ້​ສຳ​ເລັດ.