ກອງປະຊຸມຄົບຄະນະບໍລິຫານງານພັກແຂວງ ສາລະວັນ ເປີດກວ້າງ ຄັ້ງທີ 10 ສະໄໜທີ VIII

ກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 10 ສະໄໜທີ VIIIຂອງອົງຄະນະພັກແຂວງ ສາລະວັນ ໄດ້ດໍາເນີນມາເປັນເວລາ 3 ວັນ ເລີ່ມແຕ່ວັນທີ 5 – 7 ມີຖຸນາ 2019 ນີ້ທີ່ສະໂມສອນແຂວງ,ໂດຍພາຍໄຕ້ການເປັນປະທານ ຂອງສະຫາຍ ສີສຸວັນ ວົງຈອມສີ ກໍາມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ ເຊິ່ງມີບັນດາຄະນະປະຈໍາພັກແຂວງ, ກໍາມະການພັກແຂວງ, ທ່ານ ເລຂາພັກເມືອງ, ຫົວໜ້າພະແນກ, ຮອງພະແນກການ – ອົງການທຽບເທົາອ້ອມຂ້າງແຂວງ ແລະ ລັດວິສາຫະກິດເຂົ້າຮ່ວມທັງໜົດ 145 ສະຫາຍ, ຍິງ 5 ສະຫາຍ.

            ກອງປະຊຸມໄດ້ຮັບຟັງການລາຍງານຜ່ານບົດຕີລາຄາການນໍາພາຮອບດ້ານຂອງຄະນະບໍລິຫານງານພັກແຂວງ ສາລະວັນໄລຍະ 5 ເດືອນຕົ້ນ ແລະ ຈຸດສຸມຮອດທ້າຍປີ 2019, ບົດລາຍງານແຜນພັດທະນາເສດຖະກິດ – ສັງຄົມ 5 ເດືອນຕົ້ນ ແລະ ທິດທາງແຜນການ 6 ທ້າຍປີ 2019, ບົດລາຍງານໂຄງປະກອບບຸກຄະລະກອນກອງປະຊຸມໃຫຍ່, ບົດລາຍງານທິດຊີ້ນໍາຂອງກົມການເມືອງຄະນະເລຂາສູນການກາງພັກກ່ຽວກັບການເລື່ອນການດໍາເນີນກອງປະຊຸມໃຫຍ່ຂັ້ນເມືອງໃຫ້ເລີ່ມແຕ່ເດືອນ 9/2019 ຫາເດືອນທີ 3 /2020 ສ່ວນຂັ້ນແຂວງໃຫ້ເລີ່ມແຕ່ເດືອນທີ 4/2020 ສໍາເລັດໃນເດືອນທີ 9/2020, ບົດລາຍງານການດໍາເນີນຊິວິດການເມືອງກະກຽມກອງປະຊຸມໃຫຍ່ 3 ຂັ້ນຂອງພັກ, ການຈັດຕັ້ງປະຕິບັດແຜນງົບປະມານແຫ່ງລັດປີ 2019. ວຽກງານຈຸດສຸມໃນທ້າຍປີ 2019 ແລະ ບົດລາຍງານການສະຫຼຸບບັ້ນຮົບຫັນເອົາກໍາລັງ ປກສ ລົງສູ່ຮາກຖານການເມືອງແກ້ໄຂປະກົດການຫຍໍ້ທໍ້ຕ່າງໆໃນ 14ບ້ານອ້ອມຂ້າງເທສະບານເມືອງສາລະວັນ. ເຊີ່ງໄດ້ຕີລາຄາການຄືນການຈັດຕັ້ງປະຕິບັດມະຕິ 8 ເຫັນວ່າສັງຄົມມີຄວາມເປັນລະບຽບຮຽບຮ້ອຍ, ເສດຖະກິດມະຫາພາກສືບຕໍ່ຂະຫຍາຍຕົວຕາມທິດທາງວາງໄວ້, ການຈັດເກັບລາຍຮັບເຂົ້າງົບປະມານ ແລະ ການເບີກຈ່າຍເງິນເດືອນໄດ້ຕາມຄາດໜາຍ, ພ້ອມດຽວກັນນັ້ນກອງປະຊຸມຍັງໄດ້ປືກສາຫາລືຍົກໃຫ້ເຫັນດ້ານອ່ອນຂໍ້ຄົງຄ້າງໃນໄລຍະປີຜ່ານມາ ແລະ ທິດທາງແກ້ໄຂໃນປີ 2019.

            ກອງປະຊຸມຄົບຄະນະບໍລິຫານພັກຄັ້ງນີ້ ໄດ້ມີຄວາມເປັນເອກະພາບສູງຕໍ່ການຕີລາຄາຜົນສໍາເລັດ ແລະ ຂໍ້ຄົງຄ້າງໃນການຈັດຕັ້ງປະຕິບັດມະຕິ 8 ຂອງອົງຄະນະພັກແຂວງໃນໄລຍະ 2 ປີກວ່າຜ່ານມາກໍໄດ້ມີຄວາມພະຍາຍາມຍົກສູງຄວາມຮັບຜິດຊອບ, ຄວາມເປັນເຈົ້າການໃນການຈັດຕັ້ງເຊື່ອມຊຶມ, ຜັນຂະຫຍາຍລົງສູ່ຮາກຖານ ຢ່າງທົ່ວເຖິງ, ພ້ອມທັງກໍານົດບັນດາເນື້ອຈຸດສຸມ ໃນການເຄື່ອນໄຫວນໍາພາ, ແບ່ງຄວາມຮັບຜິດຊອບ, ກໍານົດມາດຕະການໃນການແກ້ໄຂຈຸດອ່ອນ-ຂໍ້ຄົງຄ້າງ ແລະ ວາງທິດທາງຮັບມືກັບສະພາບທີ່ຈະເກິດຂື້ນເຊິ່ງສາມາດຮັບປະກັນການປົກປັກຮັກສາຄວາມເປັນເອກະລາດ, ອໍານາດປະຊາທິປະໄຕ ແລະ ຜຶນແຜ່ນດິນອັນຄົບຖ້ວນກໍຄືຂອງແຂວງໄວ້ໄດ້ຢ່າງໝັ້ນຄົງ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ.

ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຈາກ ສະຫາຍ ເລຂາພັກ – ເຈົ້າແຂວງໆ ສາລະວັນ ເຊິ່ງທ່ານໄດ້ເນັ້ນໜັກກ່ຽວກັບບັນຫາການກຽມສ້າງພະນັກງານນໍາພາ – ຄຸ້ມຄອງ ແລະ ພະນັກງານສືບທອດເພື່ອກຽມໃຫ້ແກ່ກອງປະຊຸມໃຫ່ຍໃນຄັ້ງຕໍ່ໄປ, ຮຽກຮ້ອງໃຫ້ແຕ່ລະພາກສ່ວນສຸມໃສ່ປະຕິບັດແຜນສົກປີ 2019 ໃຫ້ສໍາເລັດ ມອບໃຫ້ສະຫາຍຄະນະປະຈໍາຜູ່ຊີ້ນໍາແຕ່ລະຂົງເຂດວຽກງານລົງເລີກຊີ້ນໍາວຽກງານຂອງຕົນຮັບຜິດຊອບ, ຕິດຕາມ, ຊຸກຊູ້ບັນດາພະແນກການ – ອົງການທຽບເທົ່າ, ເມືອງ ໃຫ້ເອົາໃຈໃສ່ໃນການຈັດຕັ້ງປະຕິບັດໃຫ້ມີປະສິດທິຜົນ. ມອບໃຫ້ກໍາມະການພັກແຂວງ, ຫົວໜ້າພະແນກການ – ອົງການທຽບເທົ່າ, ຄະນະພັກ – ອົງການປົກຄອງເມືອງເປັນເຈົ້າການໃນການປຸກລະດົມຂົນຂວາຍບັນດາຂະແໜງການ-ອົງການທຽບເທົ່າ ແລະ ປະຊາຊົນບັນດາເຜົ່າໃນຂອບເຂດຄວາມຮັບຜິດຊອບ, ພ້ອມກັນຍົກສູງຄວາມຮັບຜິດຊອບ ແລະ ເປັນເຈົ້າການໃນການເຊື່ອມຊຶມ, ກໍາແໜ້ນ ແລະ ຈັດຕັ້ງຜັນຂະຫຍາຍມະຕິກອງປະຊຸມ ຄົບຄະນະບໍລິຫານງານພັກແຂວງຄັ້ງທີ 8 ສະໄໝທີ x ໃຫ້ເປັນຂະບວນຟົດຟື້ນ, ແຂງແຮງ ແລະ ຕໍ່ເນື່ອງ ເຮັດໃຫ້ແຂວງມີສະຖຽນນະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບສຸກ, ເປັນລະບຽບຮຽບຮ້ອຍ ແລະ ນໍາພາແຂວງສາລະວັນກ້າວຂື້ນໃຫ້ມີໂສມໜ້າໃໝ່ໃນການພັດທະນາຢ່າງບໍ່ຢຸດຢັ້ງ.