ກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກ້ວາງ ຄັ້ງທີ 8 ສະໄໝທີ VIII ( ກາງສະໄໝ )

ກອງປະຊຸມຄົບຄະນະບໍລິຫານງານພັກແຂວງສາລະ​ວັນ ເປີດກ້ວາງ ຄັ້ງທີ 8 ສະໄໝທີ  VIII ໄດ້ໄຂຂຶ້ນຢ່າງເປັນທາງການ ໃນລະຫວ່າງວັນທີ 9 – 11  ກໍລະກົດ 2018 ທີ່ຜ່ານມາ ໂດຍການເປັນປະທານຂອງທ່ານ ສີສຸວັນ ວົງຈອມສີ ກຳມະການສູນກາງພັກ, ເລຂາພັກ – ເຈົ້າແຂວງໆສາລະວັນ ໃຫ້ກຽດເຂົ້າຮ່ວມຂອງ ທ່ານ ນ ບຸດສະດີ ທະນະເມືອງ ຕາງໜ້າຄະນະຈັດຕັ້ງສຸນກາງ ກົມກໍ່ສ້າງພັກ – ພະນັກງານ ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ຄະນະພັກ​ກອງ​ບັນຊາ​ການ ປກຊ – ປກສ, ຄະນະ​ປະ​ຈໍາ​ພັກ​ເມືອງ, ສະມາຊິກ​ສະພາ​ປະ​ຊາ​ຊົນ​ແຫ່ງ​ຊາດ​ປະຈຳ​ເຂດ​ເລືອກ​ຕັ້ງທີ 14, ສະມາຊິກ​ສະພາ​ປະຊາຊົນ​ແຂວງ, ຄະນະ​ພັກ​ຮາກ​ຖານ – ໜ່ວຍ​ພັກ, ຄະນະ​ພະ​ແນ​ກການ -​ ອົງການ​ທຽບ​ເທົ່າ​ອ້ອມ​ຂ້າງ​ແຂວງ ເຂົ້າຮ່ວມ​ ຈໍານວນ 184 ສະຫາຍ, ຍິງ 24 ສະຫາຍ.

ກອງ​ປະຊຸມ​ໄດ້ຜ່ານ​ບົດ​ຕີ​ລາຄາ ການ​ນຳ​ພາ​ຮອບ​ດ້ານ​ ຂອງ​ຄະ​ນະ​ບໍ​ລິ​ຫານ​ງານ​ພັກ​ແຂວງ ໃນ​ການຈັດຕັ້ງປະຕິບັດ​ມະຕິ​ VIII ​ຂອງອົງຄະນະພັກແຂວງ ​ໄລຍະ 2 ປີກ​ວ່າ​ຜ່ານ​ມາ ​ແລະ ວຽກ​ສືບຕໍ່​ຈັດຕັ້ງປະຕິບັດ​ໃນ​ຕໍ່ໜ້າ. ​ຜ່ານບົດ​ສະຫຼຸບ​ແຜນ​ພັດທະນາ​ເສດຖະກິດ – ສັງຄົມ, ​ບົດ​ສຳ​ຫຼວດການ​ນຳ ພາລວມຂອງ​ຄະນະ​ບໍລິຫານ​ງານ​ພັກ​ແຂວງ​ໄລ​ຍະກາງ​ສະ​ໄໝ. ນອກ​ນັ້ນ, ຍັງ​ໄດ້ເຜີຍ​ແຜ່​ເຊື່ອມ​ຊຶມຄຳ​ສັ່ງ 04/ຄ​ລ​ສ​ພ ວ່າ​ດ້ວຍ: ການ​ດຳ​ເນີນກອງ​ປະ​ຊຸມ​ໃຫ່​ຍ​ ແລະ ​ມະ​ຕິເລກ​ທີ 032/ກມ​ສ​ພ ວ່າ​ດ້ວຍ​ການ​ສ້າງ​ແຜນ​ກຳ​ນົດ​ພະ​ນັກ​ງານນຳ​ພາ – ຄຸ້ມ​ຄອງ, ມະ​ຕິ 030/ກມ​ສ​ພ ວ່າ​ດ້ວຍ​ພະ​ນັກ​ງານ​ຄຸ້ມ​ຄອງ​ແລະ ​​ດຳ​ເນີນ​ການທາບ​ທາມ​ຂຶ້ນ​ແຜນ​ກຳ​ນົດ​ພະ​ນັກ​ງານ​ນຳ​ພາ – ຄຸ້ມ​ຄອງ​ຂັ້ນ​ສູນ​ກາງ​ຂອງ​ແຂວງ ຮອບ​ທີ 1, 2 ແລະ ຮອບ​ທີ 3 ເພື່ອ​ຮອງ​ຮັບ​ໃຫ້​ແກ່ໂຄງ​ປະ​ກອບຄະ​ນະ​ບໍ​ລິ​ຫານ​ງານ​ພັກ​ແຂວງ ສະ​ໄໝ​ທີ IX. ກອງປະຊຸມ​ຍັງ​ໄດ້ຖື​ໂອກາດ​ນີ້ເຜີຍແຜ່ເຊື່ອມມະຕິເລກ​ທີ 037/ຄບສພ ຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ວ່າດ້ວຍ: ການຍົກສູງປະສິດທິພາບຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ. ​ບົນ​ພື້ນຖານ​ການລາຍ​ງານ ​ແລະ ປະກອບ​ຄຳ​ເຫັນ​ຂອງ​ຜູ່​​ແທນ ກອງ​ປະຊຸມ​ໄດ້​ຮັບຮອງ​ເອົາ​ບັນດາ​ຜົນງານ, ຂໍ້​ຄົງ​ຄ້າງ ​ແລະ ທິດ​ທາງ​ທີ່​ຈະ​ສືບ​ຕໍ່​​ແຕ່​ນີ້​ຮອດ​ປີ 2020. ໃນ​ຕອນ​ທ້າຍ​ກໍ ໄດ້​ກວດກາ​ຄືນ​ການ​ແກ້​ໄຂ​ບັນດາ​ກໍລະນີ​ ໃນ​ບັ້ນປັບປຸງ​ປົວ​ແປງ​ພັກ​ ປີ 2017 ຂອງ​ຄະນະ​ບໍລິຫານ​ງານ​ພັກ​ແຂວງ, ​ເ​ຊິ່ງ​ຫຼາຍ​ສະຫາຍ​ ກໍໄດ້​ຈິງ​ໃຈ​ຍົກ​ຂຶ້ນ​ມາ​ເວົ້າ ຢ່າງ​ກົງ​ໄປ​ກົງມາ ​ ​ເພື່ອ​ສືບຕໍ່ລົງເລິກຫັນກຽວໃຫ້ແໜ້ນເຂົ້າຕື່ມ ແລະ ແກ້ໄຂບັນຫາທີ່ຄົງຄ້າງໃຫ້ຄະນະພັກ, ຈະບໍ່ຢຸດຈຶ້ງ ຫຼື ຖອຍຫຼັງເດັດ ຂາດ ເພື່ອນໍາເອົາແຂວງ ສາລະວັນ ກ້າວໄປດ້ວຍບາດຍ່າງທີ່ໜັກແໜ້ນ, ເພື່ອສ້າງສາພັດທະນາແຂວງ  ໃຫ້ໄປຕາມເສັ້ນທາງລັດມັ່ງຄັ່ງ-ເຂັ້ມແຂງ, ປະຊາຊົນຮັ່ງມີ – ຜາສຸກ, ສັງຄົມມີປະຊາທິປະ ໄຕ ແລະ ສີວິໄລ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ.