ກອງຊຸມ ສະຫຼຸບຕີລາຄາຄືນການຈັດຕັ້ງປະຕິບັດວຽກງານສິນເຊື່ອປະຈຳສົກ ປີ 2014

ຕອນບ່າຍຂອງ ວັນ​ທີ 26 ມີ​ນາ 2015 ເວ​ລາ 13:30 ໂມງ ທີ່​ຫ້ອງປະຊຸມຊັ້ນ III ຫ້ອງວ່າການ​ປົກຄອງ​ ແຂວງ​ສາລະ​ວັນ ໄດ້​ຈັດກອງ​ຊຸມ​ ສະຫຼຸບ​ຕີ​ລາ​ຄາຄືນ​ການ​ຈັດ​ຕັ້ງ​ປະ​ຕິ​ບັດວຽກ​ງານ​ສິນ​ເຊື່ອ​ປະ​ຈຳ​ສົກ​ ປີ 2014 ໂດຍ​ພາຍໃຕ້ການເປັນປະທານຂອງ ທ່ານ ສີເຮັງ ຫອມສົມບັດ, ​ກຳ​ມະ​ການ​ປະ​ຈຳ​ພັກ​ແຂວງ, ຮອງເຈົ້າແຂວງໆ ສາ​ລະ​ວັນ ທັງ​ເປັນ​ປະ​ທານ ຄະນະກຳມະການຄຸ້ມຄອງສິນເຊື່ອຂັ້ນແຂວງ, ຜູ້ເຂົ້າຮ່ວມກອງ​ປະ​ຊຸມຄັ້ງນີ້​ມີຫົວໜ້າ​ – ຮອງ ພະ​ແນກ​ການ, ຫົວໜ້າອົງການ, ເຈົ້າ​ເມືອງ – ຮອງ​ເຈົ້າ​ເມືອງ ແລະ ປະທານຄະນະກໍາມະການຄຸ້ມຄອງສິນເຊື່ອຂັ້ນເມືອງ 5 ຕົວເມືອງ, ຫົວໜ້າ ທະນາຄານນະໂຍບາຍ ພ້ອມທັງຄະນະວິຊາການເຂົ້າຮ່ວມ ຈຳນວນ 20 ທ່ານ, ຍິງ 1 ​ທ່ານ.
ກອງປະຊຸມ ໄດ້ສະຫຼຸບຕີລາຄາຄືນ ການເຄື່ອນໄຫວວຽກງານສິນເຊື່ອຂອງທະນາຄານນະໂຍບາຍ ໃນສົກປີ ຜ່ານມາ ກໍຄື ປີ 2014 ແລະ ສະເໜີຮັບຮອງເອົາແຜນການສິນເຊື່ອ ປະຈຳສົກປີ 2015, ໄດ້ປຶກສາຫາລືຄົ້ນຄວ້າແກ້ໄຂໜີ້ສິນທີ່ກາຍສັນຍາ, ດອກເບ້ຍ ແລະ ການສະໜອງສິນເຊື່ອຂອງທະນາຄານນະໂຍບາຍໃນຕໍ່ໜ້າ. ນອກຈາກນັ້ນ; ກອງປະຊຸມ ກໍໄດ້ເຫັນດີຮັບຮອງເປັນເອກະພາບຕໍ່ແຜນ ການສິນເຊື່ອ 2015 ປະກອບມີເມືອງເປົ້າໝາຍ, 10ຈຸດສຸມຂອງລັດຖະບານ, 54 ຈຸດສຸມຂອງທ້ອງຖິ່ນ ແລະ ຈຸດທົດລອງສາມສ້າງ.
– ສິນເຊື່ອເມືອງເປົ້າໝາຍ 3 ເມືອງ, ມີ 3 ໄລຍະຄື: ໄລຍະສັ້ນ, ໄລຍະກາງແລະໄລຍະຍາວມີມູນຄ່າ 15,404,000,000 ກີບ.
– ສິນເຊື່ອ 54 ຈຸດສຸມ 03 ເມືອງ, ມີ 3 ໄລຍະຄື: ໄລຍະສັ້ນ, ໄລຍະກາງ ແລະ ໄລຍະຍາວ ມີມູນຄ່າ 7.962.000.000 ກີບ.
– ຈຸດທົດລອງ ສາມສ້າງ 03 ຕົວເມືອງມີ 3 ໄລຍະຄື: ໄລຍະສັ້ນ, ໄລຍະກາ ແລະໄລຍະຍາວ ມີມູນຄ່າ 6.694,000,000ກີບ.
ສາມາດລວມມູນຄ່າທັງໝົດໃນ 3 ແຫຼ່ງທຶນ ມີມູນຄ່າ 30,060,000,000 ກີບ. ພາຍຫຼັງທີ່ໄດ້ລາຍງານ ແລະ ຮັບຮອງແລ້ວ ທ່ານ ສີ​ເຮັງ ຫອມ​ສົມ​ບັດ, ​ກຳ​ມະ​ການ​ປະ​ຈຳ​ພັກ​ແຂວງ, ຮອງ​ເຈົ້າ​ແຂວງ ປະທານຄະນະກຳມະການຄຸ້ມຄອງສິນເຊື່ອຂັ້ນ ແຂວງ, ກໍ​ໄດ້​ປະ​ກອບ​ຄຳ​ເຫັນ ແລະ ເນັ້ນ​ໜັກ​ຕໍ່ຫຼາຍບັນ​ຫາ ເປັນຕົ້ນ ກໍແມ່ນການປ່ອຍສິນເຊື່ອໃຫ້ມີປະສິດທີຜົນ ແລະ ຖືກຕ້ອງ ຕາມເປົ້າໝາຍ, ເອົາໃຈໃສ່ການປະສານສົມທົບພົວພັນລະຫວ່າງກຳມະການ ແລະ ອຳນາດການປົກຄອງຢ່າງໜັກແໜ້ນ ແລະ ແກ້ໄຂ ໜີ້ທີ່ມີບັນຫາດອກເບ້ຍຄ້າງຮັບທີ່ໄດ້ປ່ອຍຜ່ານມາ. ມາຮອດເວລາ 16:30 ໂມງ ຂອງວັນດຽວກັນ ກໍໄດ້ອັດລົງ.